„Канва“ продава акции со процена од 42 милијарди долари, како чекор пред ИПО

„Канва“ (Canva Inc.) започна продажба на акции од вработените со процена од 42 милијарди долари, што претставува значителен скок на вредноста за австралискиот стартап за софтвер за дизајн, кој за раст се обложува на вештачката интелигенција.

Вработените можат да продаваат акции на нови и постојни инвеститори, вклучувајќи ги „Фиделити менаџмент“ (Fidelity Management & Research Co.) и одделот за управување со средства на „ЏП Морган Чејс“ (JPMorgan Chase & Co.), соопшти денеска „Канва“. Понудата ја зголемува процената на „Канва“ за повеќе од 30 проценти – во 2024 година компанијата беше проценета на 32 милијарди долари.

„Канва“ работи на подобрување на вештачката интелигенција во своите алатки за дизајн во обид да го забрза растот на приходите и да се подготви за потенцијална почетна јавна понуда (ИПО). Во април лансираше нови производи, вклучувајќи уредувач/креатор за фотографии со вештачка интелигенција чија работа се базира на разговор, обидувајќи се да привлече повеќе корпоративни клиенти од конкурентот „Адоб“ (Adobe Inc).

„Канва“ е во борба за корисници со производителот на „Фотошоп“ (Photoshop) и „Лајтрум“ (Lightroom), „Адоб“, кој развива свој модел на вештачка интелигенција приспособен на неговите апликации, наречен „Фајрфлај“ (Firefly). „Фигма“ (Figma Inc.), со седиште во Сан Франциско, е уште еден силен конкурент, сега проценет на 34 милијарди долари откако во јули излезе на берза.

„Оваа рунда е значително преоптоварена“, рече главниот оперативен директор и коосновач на „Канва“, Клиф Обрехт. „Огромната побарувачка и од новите и од постојните инвеститори е огромен глас на доверба во нашиот замав.“

Лансирана во 2013 година, „Канва“ доби рана поддршка поради леснотијата на користење во креирањето сè, од свадбени покани до објави на социјалните медиуми. „Канва“ регистрираше повеќе од 3,3 милијарди долари годишна продажба и сега има над 240 милиони активни корисници на месечно ниво, според податоците од компанијата.

Стартап-компаниите често преговараат за продажба на акции за своите вработени како начин за наградување и задржување на персоналот, а исто така и за привлекување надворешни инвеститори. Со продажбата на акции, компанијата предводена од Мелани Перкинс може да ја искористи побарувачката на инвеститорите за да им обезбеди на вработените ликвидност, а сепак да остане приватна компанија. Инвеститорите долго време ја гледаат „Канва“ како кандидат за котација на берза, иако компанијата не откри никакви конкретни планови за таков потег.

Во моментов нема коментари за веста. Биди прв да коментира...

Остави коментар