„Опен еј-ај“ ќе им плаќа на медиуми за да обучува ВИ со нивните содржини

Компанијата за вештачка интелигенција „Опен еј-ај“ (OpenAI) е во преговори со „Си-ен-ен“ (CNN), „Фокс“ (Fox Corp.) и „Тајм“ (Time) за лиценцирање на нивната содржина, според луѓе запознаени со ова прашање, во обид да обезбеди пристап до вестите врз чија основа ги гради своите производи за вештачка интелигенција, во услови кога се соочува со обвинувања дека неовластено презема материјали заштитени со авторски права.

Стартапот што стои зад ЧетГПТ (ChatGPT), алатка што им овозможува на корисниците брзо да создадат текст, код и друга содржина преку внесување едноставни команди, се обидува да склучи договори со голем број продукции на вести, видеа и други дигитални медиуми што може да се користат за четботот со вештачка интелигенција да се направи попрецизен, релевантен и ажурирани. „Опен еј-ај“ исто така се бори со тужби за наводни прекршувања на авторските права.

Компанијата е во преговори за лиценцирање статии од „Си-ен-ен“ на „Ворнер брос“ (Warner Bros. Discovery Inc.) што може да послужат за обука на Чет ГПТ, а исто така и содржини на „Си-ен-ен“ за производите на „Опен еј-ај“, според еден од изворите, кој зборувал под услов да остане анонимен бидејќи станува збор за внатрешни преговори. „Си-ен-ен“ и „Фокс“ преговараат не само за лиценцирање текст туку и за слики и видеосодржини, велат изворите. „Си-ен-ен“ и „Фокс“ одбија да коментираат.

Главната извршна директорка на „Тајм“, Џесика Сибли, изјави дека издавачот е во разговори со „Опен еј-ај“ и „ние сме оптимисти за постигнување договор што ќе ја одразува вредноста на нашата содржина на фер начин“. Претходно немаше известувања за разговорите на „Опен еј-ај“ со трите издавачи.

„Опен еј-ај“ минатата недела за „Блумберг њуз“ соопшти дека разговара со десетици издавачи за договори за лиценцирање, но не наведе конкретни компании. Овие партнерства се клучни за иднината на компанијата бидејќи преку нив се балансира потребата за ажурирани, точни податоци за развој на нејзините модели, во услови кога дел од јавноста е скептичен во однос на изворите од кои се земаат информациите. Една од компаниите со која стартапот за вештачка интелигенција беше во преговори, „Њујорк тајмс“ (The New York Times), ги тужеше „Опен еј-ај“ и „Мајкрософт“ кон крајот на минатиот месец за користење на нејзините написи без дозвола.

Bloomberg

Како одговор на барањето за коментар за разговорите со издавачот, портпаролот на  „Опен еј-ај“ укажа на неодамнешен блогпост на компанијата, кој упатува на „продолжена соработка со новинските организации“.

„Нашите цели се да поддржиме здрав екосистем за вести, да бидеме добар партнер и да создаваме заемно корисни можности“, соопшти „Опен еј-ај“ преку објавата во понеделникот. Компанијата соопшти дека „реализира партнерства со новински организации“ за да ги обучи своите системи за вештачка интелигенција за „содржини што не се јавно достапни“ и да прикажува „содржини во реално време со атрибуција“ преку ЧетГПТ.

Оттаму исто така посочија дека се во разговори со „Њуз/Медија алајанс“ (News/Media Alliance), трговска група што претставува над 2.200 медиуми низ светот, „за да ги истражи можностите, да разговара за нивните грижи и да обезбеди решенија“. Стартапот за вештачка интелигенција разговарал и со „Ганет“ (Gannett), „Њуз корп“ (News Corp.) и ИАЦ (IAC), според неодамнешна објава на „Њујорк тајмс“.

Некои други големи медиумски компании се подготвени да влезат во преговори со „Опен еј-ај“. „Имавме првични разговори со широк опсег на програмери, вклучувајќи го и 'Опен еј-ај', за кои очекуваме дека сега може да преминат во комерцијални дискусии за употребата на нашето новинарство при создавањето и надградувањето на нивните производи“, соопшти издавачот на „Гардијан“ (The Guardian). 

„Опен еј-ај“ неодамна потпиша повеќегодишен договор за лиценцирање со матичната компанија на „Политико“ (Politico), „Аксел Спрингер“ (Axel Springer SE), за десетици милиони долари, објави претходно „Блумберг“. Во јули, „Опен еј-ај“ објави договор со „Асошиејтед прес“ (Associated Press), но сумата не беше откриена. 

Сепак, не сите големи издавачи брзаат да се вклучат во преговорите. „Вашингтон пост“ (The Washington Post) не разговарал со „Опен еј-ај“ во последните месеци, според портпаролот на издавачот. Еден медиумски директор, кој сакаше да остане анонимен, рече дека нивната компанија размислува да преземе правни мерки против „Опен еј-ај“, слично како „Њујорк тајмс“.

Клучна грижа за издавачите е компензацијата. Според претходни информации, „Опен еј-ај“ им понудил на издавачите од 1 до 5 милиони долари годишно за лиценцирање на нивните статии. Тој износ се смета за премногу низок од страна на некои познати издавачи, според упатените. Некои медиумски компании се отворени за суми поблиски до она што го доби „Аксел Спрингер“, посочил еден од изворите.

Во моментов нема коментари за веста. Биди прв да коментира...

Остави коментар