Како се бори Париз да го зачува статусот на престижна дестинација

Ако сe изненадивте што цената на сместувањето во хотел со три ѕвезди во Париз за време на Олимпијадата ќе биде околу 650 евра за ноќ, како што веќе објави „Блумберг Адрија“, почекајте да ја видите цената во двата веројатно најлуксузни хотели во француската престолнина. „Риц Карлтон“ (Ritz Carlton) и хотелот „Кријон“ (Hôtel de Crillon), од синџирот хотели „Роузвуд“ (Rosewood), се најчестиот избор на оние што одат во Париз, а му припаѓаат на супербогатиот клуб. Покрај специјалитетите достапни во баровите и рестораните со богата историја и луксузот на самото сместување, до совршенство се доведени и специјалните услуги, како што се, меѓу другото, услугата на личен батлер, фризер и бербер, создадени да ги задоволат дури и најделикатните барања на посетителите.

Но, не се само суперлуксузните хотели со традиција начинот на кој се бори Париз да го зачува својот статус на престижна дестинација за задоволство на оние што можат да си дозволат да престојуваат на најлуксузните места. Имено, кога во 2015 година зголемувањето на загаденоста на воздухот накратко го направи Париз најзагаден град во светот, со смог толку густ што речиси целосно ги скри знаменитостите на градот, вклучувајќи ја и Ајфеловата кула, Градскиот совет наложи секоја прва недела во месецот да биде ден без автомобили во четирите најцентрални квартови. Иако не беше првиот град што ја примени таа практика, по Париз, тоа почна да се применува и во другите градови, така што во последните години до 1.000 града во светот се вклучени во Светскиот ден без сообраќај, кој се слави на 22 септември на глобално ниво.

Во пресрет на Олимписките и Параолимписките игри, еколошките активисти повикаа на целосна забрана на сообраќајот на автомобили во Париз.

Дејвид Белијар, поранешен лидер на француската Партија на зелените, се појави на француската телевизија и рече дека, наместо тоа, може да се поттикнат пешачење и возење велосипед, заедно со бесплатен јавен превоз. Сепак, идејата за „пешачки Париз“ во текот на шестнеделниот период околу Игрите е опишана како „нереална“, иако некои медиуми велат дека тоа е секако значаен поттик за амбициите на градските лидери да го направат Париз да биде „најзелената метропола во Европа“.