Париз уште еднаш покажа дека е главен моден град во светот. Овој пат не на модната писта, туку на штотуку завршените Олимписки игри. Како што пишувавме претходно, очекувањата беа дека ова ќе биде најгламурозната Олимпијада што се одржала.
Со користење на широкиот избор на дигитални канали и фокус на моќни наративи, многу брендови имаа цел да дојдат до маркетиншкото злато на годинашните Игри. Со теми во фокусот како што се еколошките прашања, социјалните проблеми и родовата еднаквост, брендовите се натпреваруваа преку обликување наративи со длабоки пораки што ги надминуваат класичните рекламни слогани. Еве некои од победниците.
Со пораката „Не е важно од каде доаѓаш, туку што правиш“, „Најк“ (Nike) во соработка со Олимписката фондација за бегалци обезбеди униформи за олимпискиот тим за бегалци. Во промотивното видео за оваа соработка „Внимавајте каде одите“ (Watch Where We’re Going) се прикажани спортисти што иако ги изгубиле своите права, својата земја, својот дом, велат дека не го изгубиле правото на победа.
Брендот, кој е и спонзор на опремата за златниот српски ватерполо-тим од 2023 година, пред Олимпијадата во соработка со брендот „Жакемус“ (Jacquemus) создаде колекција инспирирана од верувањето дека спортот не е само за перформанси туку и за проширување на стилот и личноста. Во кампањата е Ша'Кари Ричардсон, која го освои златниот медал со тимот на САД во штафетата 4х400 метри за жени, победа остварена со време од 41,78 секунда.
Nike
Новак Ѓоковиќ, кој го освои златото на Олимписките игри, во кариерата освои и околу 182,5 милиони во наградни фондови, но еднакво е познат и по соработките со брендови, односно приходите од тие спонзорства. Соработката што славниот тенисер особено ја истакна по победата е онаа со јапонскиот бренд „Асикс“ (Asics). Јапонската мултинационална корпорација што произведува спортски производи и чие име е акроним за латинската фраза anima sana in corpore sano (во здраво тело, здрав дух) соработува со Ѓоковиќ од 2018 година. Во своето портфолио ја има и колекцијата на машки патики „Новак“, чија цена е околу 180 долари, како и Вимблдон колекција, лансирана во јуни годинава.
„Овој медал немаше да биде можен без сите луѓе во мојот тим, вклучувајќи го и семејството 'Асикс'. Благодарен сум за страста и генијалноста на техничкиот тим на 'асикс тенис' (asicstennis). Ви благодарам за непосредната соработка, ги слушавте моите идеи и го испорачавте најнапредниот можен модел на патики. Беше одлично да го прославиме златото со сите вас во 'Асикс хаус' (ASICS House) во Париз“, напиша Ѓоковиќ на својот инстаграм-профил пред неколку дена.
Брендот „Лакост“ (Lacoste), со кој има договор од 2019 година, има и колекција на гардероба инспирирана од тенисерот, но се чини дека има некоја посебна врска со јапонските брендови. Покрај „Асикс“, тука се и часовниците на „Сеико“ (Seiko), со кој соработува од 2014 година. На официјалната веб-страница на брендот, по лансирањето на моделот „астрон ГПС солар“ (Astron GPS Solar) беше напишано: „Новак е горд што е Србин како што 'Сеико' е горд што е јапонски. Дизајнот на новата белезица, на суптилен и ведар начин, ја отсликува љубовта што Новак и 'Сеико' ја негуваат за своите татковини. Црвената и белата боја се боите што ги споделуваат двете знамиња и се користат во секој детаљ, заедно со длабокосината, која е исто така централна боја за српското знаме и означува победа во јапонската култура. Временските зони на Србија и Јапонија се означени со црвена боја на УТЦ (UTC) индикатор на позициите +1 и +9, додека рамката на бројчаникот е бела, а керамичката рамка е сина со тенка црвена линија“.
Часовниците се едни од победниците во трката за маркетиншко злато, меѓу другото, затоа што нивните амбасадори ги носат на самиот терен.
Јамајската спринтерка Шели-Ен Фрејзер-Прајс се тркаше носејќи „ричард мил РМ 07-04 кварц ТПТ автоматик спорт“ (Richard Mille RM 07-04 Quartz TPT Automatic Sport), кој се продава за 185.000 долари. Тоа е првиот женски спортски часовник на овој бренд.
Скокачот со стап Арман Дуплантис го вчудовиде светот соборувајќи го сопствениот светски рекорд со скок од 6,25 метри - деветти пат го соборува рекордот. Овој пат тоа го направи носејќи часовник „омега“ (Omega). Станува збор за „си мастер аква тера 150М титаниум“ (Sea Master Aqua Terra 150M Titanium), кој се продава за 48.400 фунти.
„Омега“ има долга историја на поврзување со врвни спортисти и прецизен тајминг, така што ваквите соработки не се изненадувачки. Марката е официјален мерач на времето на Олимписките игри од 1932 година. Меѓу другите амбасадори на брендот се: Индиецот Нерај Чопра, италијанската параолимписка мечувалка Беатрис Вио и швајцарскиот тркач во инвалидска количка Марсел Хуг.
Деценискиот глобален амбасадор на брендот, актерот Даниел Крег, беше во специјална посета на Олимписките игри носејќи уникатен нов модел „омега си мастер“ (Omеga Sea Master), чии детали ќе бидат откриени дури на крајот на годината. Крег беше виден на јавање во дворот на Версај и натпревари во скејтборд во Ла Конкорд, пред да се повлече во куќата Омега хаус (Omega House) на фотосесија.
Рандеву за иднината
Со употреба на вештачка интелигенција и креативни идеи, не помалку импресивни беа искуствата што познатите брендови ги подготвуваа за посетителите или минувачите. Олимпиското рандеву на „Самсунг“ (Samsung), скокачки простор во срцето на градот, понуди визуелно патување низ историјата и наследството на Олимпијадата до најновите иновации на „самсунг галакси“ (Samsung Galaxy).
Bloomberg
Исто така, за време на настанот „Заедно за утре, оспособувајќи ги луѓето“, (Together for Tomorrow, Enabling People) амбасадорите на брендот ги споделија своите проекти „Решенија за утре“ (Solve for Tomorrow), смислени да решаваат реални проблеми во иднина. Беа претставени голем број иновативни решенија, од помагање на луѓето да ги надминат визуелните нарушувања до нови начини за подобрување на безбедноста при работа.
Програмата им дава поттик на младите луѓе да дизајнираат иновативни решенија користејќи спорт и технологија за справување со клучните општествени предизвици во согласност со приоритетите на Олимписките игри и олимпизмот. На тој начин, „Мув челинџ“ (Move Challenge) ги охрабрува љубителите на Игрите низ светот да се движат и да пешачат повеќе. „Криејт челинџ“ (Create Challenge) им овозможува на учесниците да бидат креативни во иновативна заедница на дигитални уметници што користат паметен уред „самсунг“ и пенкало С (S).
Bloomberg
Познат како пионер на иновативни идеи, „Убер“ (Uber) им овозможи на посетителите да уживаат во бесплатно крстосување со речен чамец низ градот по должината на реката Сена за да ги обиколат сите знаменитости со стил за време на Олимпијадата, известува АБС-ЦБН (ABS-CBN News).
„Убер круз“ (Uber Cruise) по реката Сена е една од најновите понуди на „Убер технолоџис“ (Uber Technologies), која воведува услуги за воден транспорт во европските земји. Ако бесплатен брод низ срцето на Париз не е доволно примамлив, турата вклучува и шише француски шампањ, па патниците можат да наздрават со стил додека уживаат во раскошот на француската престолнина.
За да ја прошири својата понуда и да вклучи искуства, а не само услуга, во мај компанијата го објави „Убар баблс“ (Uber Bubbles) - првата турнеја со шампањ што може да се резервира директно во апликацијата на „Убер“, во партнерство со куќите за шампањ „Перие Жует“ (Perrier-Jouët) и „Г.Х. Мам“ (G.H. Mumm). Ова сеопфатно искуство чини 200 евра и вклучува целодневна екскурзија, вклучувајќи и поаѓање во 10 часот со возило „тесла“ означено со „Убер баблс“, со прва станица за дегустација на три кувеа и ручек во „Селие бел епок“ (Cellier Belle Époque Perrier-Jouët) во Епренај. Потоа, патниците одат во куќата Г.Х. Мам во Ремс за специјална посета на визбата и дегустација на „кордон руж“ (Cordon Rouge) пред да се вратат во Париз во раните вечерни часови.
Олимписка елеганција со француската висока мода (Haute Couture)
И додека горенаведените брендови на пенливо вино се служеа на Сена, „Моет и Шандон“ (Moet & Chandon) се служеше во ВИП-ложите, а се разбира станува збор за бренд во сопственост на премиум спонзорот на Олимпијадата, луксузниот конгломерат ЛВМХ (LVMH). Покрај тоа што, според многумина, е апсолутен победник кога станува збор за маркетиншкото злато, ЛВМХ поддржа некои од спортистите чии достигнувања беа наградени со олимписки медали дизајнирани исто така од нивниот бренд „Шаумет“ (Chaumet): Антоан Дипон, кој освои златен медал во рагби 7, Леон Маршан, кој освои пет медали во пливање, четири златни и една бронза во екипна дисциплина, поставувајќи неколку олимписки рекорди, и Енцо Лефор, кој освои бронзен медал во екипно мечување. Француската парациклистка Мари Патује му се приклучи на луксузниот бренд како амбасадор.
Сепак, еден од најзаслужните за олимписката елеганција е „Диор“ (Dior).
Од динамичното партнерство со велосипедската ѕвезда Мари Патује, кое започна кога таа, облечена во „Диор“, го носеше олимпискиот оган на Канскиот филмски фестивал, па до церемонијата на затворањето во неделата.
Меѓу другите изведувачи, брендот е особено горд на облеката на „Исулт“ (Yseult), дизајнирана од Марија Грација Чиури, се наведува во соопштението на ЛВМХ од понеделникот. Креацијата го реинтерпретира иконскиот блејзер „диор бар“, клучот за „њу лук“ (New look) што го направи познат Кристијан Диор. Техниката на кроење ја подобрува флуидноста, секој бод и превиткување е доказ за уметноста на „Диор кутур“ (DiorCuture).
Инаку, во пресрет на Олимпијадата, Чиури создаде и специјална колекција, еден вид ода на Олимписките игри каде што ехото на античкиот свет е дополнето со модернистички тенденции.
.webp){kind=icon}