text size
„Светлината секогаш ја победува темнината“, изјави Карла Софија Гаскон, транс глумица која ја толкува улогата на мексикански наркобос кој поминува низ родова транзиција во победничкиот филм „Емилија Перез“ (Emilia Pérez).
„Можеби можете да нè ставите во затвор. Можеби можете да нè малтретирате. Но, никогаш не можете да ни ја одземете душата, постоењето или идентитетот. Јас сум тоа што сум. А не тоа што вие сакате.“
Изјавата на силен начин го одреди тонот на овогодинешното доделување на наградите Златен глобус одржано синоќа во Беверли Хилс, САД. Судејќи по наградените остварувања, во фокусот се темите на личен идентитет и трансформација, потоа политичка и социјална правда, како и емиграција и можности за повторно креирање на животот дури и во најтешки околности.
Иако 82-то доделување на Златните глобуси донесе многу изненадувања, изборот на теми не беше едно од нив. Финансиерот Тод Боли и холивудскиот издавач Џеј Пенске, кои ја презедоа контролата над програмата во 2023 година, свесно работат на исправување на грешките на претходното раководство, Холивудското здружение на странски новинари (Hollywood Foreign Press Association).
Освен скандалите, најголемите критики беа упатени поради недостаток на разновидност, инклузивност, етички пропусти и дури расизам. Овогодинешната листа на добитници силно одговори на сите овие предизвици.
„Емилија Перез“, филм на шпански јазик, освои дури четири награди: за најдобар филм (комедија или мјузикл), за најдобра споредна глумица за Зои Салдана, најдобра песна („El Mal“) и најдобар филм на не-англиски односно странски јазик.
Филмот „Бруталист“ (The Brutalist), кој ја освои наградата за најдобар филм во категоријата драма, ја следи приказната за унгарски архитект, Евреин кој го преживува Холокаустот и добива признание за својата работа по емиграцијата во САД. Адријан Броди ја освои наградата за најдобар актер, а филмот донесе и награда за најдобар режисер на Брејди Корбет, откако освои Сребрен лав на премиерата на Филмскиот фестивал во Венеција во септември.
Адријан Броди, Фото: Depositphotos
Ова е прв Златен глобус за актерот Адријан Броди. Остана без Глобус за филмот „Пијанист“, но за него доби Оскар! Во многу емотивно обраќање, актерот истакна дека приказната за повоената емиграција и повторното креирање на животот во САД е судбината на неговите предци, дедо и баба и родители, кои беа во публиката. |
Она што е интересно е што „Бруталист“ е нискобуџетен филм кој трае три часа, а некои го споредуваат со класиците како „Кум“. Сепак, ретко кој очекуваше ваков успех, па дури и самиот режисер. „Ми рекоа дека филмот е невозможно да се дистрибуира. Дека никој нема да дојде да го гледа. Ми рекоа дека филмот нема да успее…“, рече Корбет и повика на поддршка на филмските творци. „Филмовите не постојат без филмските творци. Да ги поддржиме.“
Наративот за инклузивност и правда за сите, како и можноста поединецот и животот да се трансформираат, го поттикна и актерот Себастијан Стан, познат по улогата во филмот „Приправник“ (The Apprentice) каде го толкува Доналд Трамп на неговиот пат кон успехот.
Во емотивен говор, актерот призна недостаток на еднакви можности за лицата со инвалидитет на екранот. „Нашето незнаење и непријатност во врска со инвалидитетот и деформациите мора да престанат. Мораме да го нормализираме тоа и да продолжиме да се изложуваме себеси и нашите деца на тоа. Треба да поттикнуваме прифаќање“, рече тој.
Романскиот актер беше награден за улогата во филмот „Друг човек“ (А Different Man), за актер кој се бори со неврофиброматоза, состојба која предизвикува тумори и деформации на лицето, кој поминува низ експериментален медицински процес за да го промени својот изглед. Потоа усвојува нов живот како Гај Морац, тврдејќи дека неговиот поранешен идентитет е мртов.
Promo/A Different Man
Најмногу номинации за филмови со ниска заработка
Kevin Winter/Getty Images
Она што е изненадување во однос на минатата година е тоа што нискобуџетните филмови и филмовите со релативно ниски приходи на благајните, а не блокбастерите, имаа најмногу номинации.
„Емилија Перез“ десет, „Бруталист“ седум, додека трилерот за интригите во Ватикан „Конклава“ („Conclave“), во кој Ралф Фајнс толкува кардинал задолжен за избор на нов папа, имаше 6 номинации и ја освои наградата за најдобро сценарио.
Некои сајтови успешно предвидоа дека „Бруталист“, кој од декемвриската премиера оствари приход од само 1,2 милиони долари на кино-благајните, ќе ја освои наградата за најдобар филм — драма, додека „Конклава“ го следеше во чекор.
Филмот „Анора“ (Anora), кој од премиерата во октомври заработи 31 милион долари, беше фаворит за освојување на наградата за најдобар филм — мјузикл или комедија.
Да потсетиме, минатата година двата најголеми блокбастери од 2023 година добија и најмногу номинации. „Опенхајмер“ (Oppenheimer) ја освои наградата за најдобар филм, Кристофер Нолан за најдобар режисер, додека „Барби“ (Barbie) ја доби наградата за најголем филмски успех на кино-благајните. Оваа година, наградата во таа категорија ја освои „Откачено“ (Wicked), филмска адаптација на бродвејскиот хит, во кој глумат Аријана Гранде и Синтија Ериво. Филмот на „Јуниверзал“ досега заработи 681 милион долари од продажба на билети ширум светот.
Прва награда за Деми Мур
Големите победници во актерските категории синоќа вклучуваа и неколку изненадувања. Едно од најголемите изненадувања беше победата на Деми Мур за најдобра актерка во комедија или мјузикл. Нејзиниот повратнички настап во филмот „Супстанција“ (The Substance), за холивудска ѕвезда која користи експериментален процес за да ја врати младоста, и донесе прв Златен глобус на 62 години, победувајќи ја убедливата фаворитка Мајки Медисон од филмот „Анора“.
„Шокирана сум. Оваа работа ја работам веќе долго, повеќе од 45 години, и ова е првата награда што сум ја освоила како актерка“, рече Мур, која последен пат беше номинирана за Златен глобус во 1991 година за улогата во филмот „Дух“ (Ghost).
Деми Мур, Фото: Depositphotos
„Пред триесет години продуцент ми рече дека сум актерка која игра само во филмови за со пуканки“ - Деми Мур |
Изненадување се случи и во категоријата најдобра актерка во драмски филм. Фернанда Торес, бразилска актерка, ја освои наградата за улогата во филмот „Јас сум сè уште тука“ (I’m Still Here), драма заснована на вистинита приказна за семејство кое го преживува исчезнувањето на политичкиот дисидент Рубенс Паива во Рио де Жанеиро во 1970-тите.
Ова е многу силна победа ако се земе предвид силната конкуренција во оваа категорија, во која беа номинирани оскаровките Анџелина Џоли за долго очекуваната улога на оперската дива Марија Калас, Никол Кидман за улогата во филмот „Бејбигрл“, Кејт Винслет („Ли“), Тилда Свинтон („Соседната соба“ / The Room Next Door) како и Памела Андерсон за филмот „Последната изведувачка“ (The Last Showgirl).
ТВ награди
Златен глобус е еден од првите настани во сезоната на награди која кулминира со доделувањето на Оскарите кое оваа година се одржува на 2 март. Студијата интензивно водат кампањи за да ги освојат овие награди, кои можат да ја зголемат продажбата на кино-билетите и онлајн купувањето на нивните филмови, и да обезбедат подобри шанси за освојување на Оскарите.
Но, за разлика од Оскарите, Златните глобуси наградуваат и телевизиски остварувања. Во таа категорија триумфираа „Хакс“ (Hacks), која се емитува на стриминг платформата Макс (Max) во сопственост на „Ворнер брос Дискавери“ (Warner Bros. Discovery Inc.), како најдобра хумористична серија.
Нетфликс серијата „Бејби рејндир“ (Baby Reindeer), заснована на вистинита приказна за неостварен актер и стенд-ап комичар кого немилосрдно го прогонува жена, ја освои наградата за најдобра лимитирана серија.
„Волт Дизни“ (Walt Disney Co.) понесе најмногу награди за серијата „Шогиун“ (Shōgun), јапонска историска драма која се емитува на „Еф-екс“ (FX) и стриминг платформата „Хулу“ (Hulu).
Серијата освои признанија за најдобар актер и најдобар спореден актер во драмска серија, најдобра актерка во ТВ драма и награда за најдобра ТВ серија.
Али Вонг ја освои наградата за најдобар стенд-ап настап, Џоди Фостер за улогата во „Вистински детектив“ (True Detective), а Колин Фарел за неговата физичка трансформација во „Пингвин“ (The Penguin).
.webp){kind=icon}
