Вилата на Одри Хепберн во Швајцарија се продава за 21 милион долари

Најпознатата Белгијка на филмското платно, модна икона, официјално една од најелегантните жени во светот и обожавана холивудска дива Одри Хепберн последните три децении од својот живот ги помина во живописна вила, со огромна градина, во близината на Женевско Езеро.

Селската вила од 18 век се наоѓа во живописното село Толохеназ во Швајцарија, блиску до француската граница и на само половина час возење од аеродромот во Женева. Хепберн го поседуваше овој имот од 1963 година до нејзината смрт во 1993 година. Таа е погребана на локалните гробишта во овој мал град.

Осум години по смртта на нивната мајка, синовите Шон Ферер и Лука Доти им ја продадоа вилата од над 1.000 квадратни метри на новите сопственици Катарина Божолин и нејзиниот сопруг Жан-Марк Божолин, поранешен директор на увозно-извозната компанија „Јуроп континентс сервисис“ (Europ Continents Services SA).

„Најт Френк“ (Knight Frank)

„Куќата се вика ’Ла песибл’ (La Paisible), што значи ’мирно место’ и навистина е мирно место. Има неверојатна атмосфера“, вели Катарина Божолин, зборувајќи ексклузивно за „Блумберг“ за продажбата. Таа вели дека таа и нејзиниот сопруг барале голем имот каде што ќе ги одгледуваат своите шест деца и дека се вљубиле во оваа куќа поради чувството на смиреност што го обезбедува, како и нејзината пространост. Посебен бонус за нив е фактот што претходно куќата беше во сопственост на холивудската легенда.

„Одамна, кога бев во интернат, се сеќавам дека на ѕидот имав многу фотографии на Одри Хепберн од нејзините филмови. Таа навистина беше мојата омилена актерка“, вели Божолин. На ѕидот до влезот на имотот е поставена плоча со името на Одри Хепберн и годините на раѓање и смрт. „Повремено доаѓаа туристи да ја фотографираат куќата, но тоа никогаш не ни пречеше бидејќи никогаш не беше наметливо. Всушност е многу трогателно, бидејќи таа почина пред повеќе од 30 години, а фактот што луѓето сè уште сакаат да видат каде живеела покажува колку им значела“, додава сегашната сопственичка.

Bloomberg Mercury

Дваесет и четири години подоцна, таа и нејзиниот сопруг го ставија на продажба имотот „Ла песибл“ преку „Најт Френк“ (Knight Frank) за 19 милиони швајцарски франци (20,8 милиони долари). Потенцијалниот купувач ќе добие вила од 1.000 метри квадратни, со 12 спални соби и осум бањи, сместена на имот од четири хектари. Куќата се наоѓа во близина на центарот на градот, од едната страна опкружена со висока жива ограда, додека од другата страна има простран парк со бујни дрвја и поглед кон планините.

Сегашните сопственици велат дека уживале да живеат во куќата. „Сите наши деца одеа овде на училиште и на универзитети и беа многу среќни“, додаваат тие. „Тука има одлични училишта, врвни универзитети, езеро и планини - што повеќе би сакале? Куќата е на само 20 минути возење од Лозана и се наоѓа во близината на Женевско Езеро“.

Со оглед на тоа што нивните деца се пораснати, велат дека имотот станал преголем за нив двајца. „Решивме да се преселиме во помала куќа бидејќи сега сме сами во овој огромен дом и чувствуваме дека е вистинско време за промена“, велат сопствениците.

Куќата има три ката, две скалила и лифт. На приземјето се сместени дневната соба, библиотеката и кујната - делот од куќата што сегашната сопственичка најмногу го користела кога готвела за своите шест деца.

Главната спална соба се наоѓа на катот, со прозорци свртени кон исток, кои пропуштаат многу природна светлина наутро. На таванот има дополнителни спални соби, што обезбедува доволно простор за гостите, вклучувајќи ги и нивните деца и внуци кога ќе дојдат на гости.

Во дворот има базен долг 15 метри со грејачи. „Тоа е убаво место за собирање во текот на летото, кога децата се тука со своите семејства. Исто така, нашите пријатели со мали деца сакаат да доаѓаат, па базенот често е многу зафатен“, се пошегува таа, велејќи дека метежите понекогаш биле толку големи што се чувствувала како да е во јавен базен.

Сопственичката вели дека домот е совршен за одржување настани и собири, истакнувајќи дека двајца од нивните синови се венчале токму на тој имот, каде што можеле да примат околу 150 гости. Градината има пространи тревници и големи стари дрвја.

Кога Одри Хепберн наполнила 60 години модната куќа „Живанши“ (Givenchy) испратила 60 бели рози, па направила градина со рози. Некои од нив и натаму го красат имотот. Depositphotos

Кога семејството Божолин го купило имотот, тие преуредиле некои делови за да го приспособат на своите потреби. Кујната била преместена и модернизирана, бидејќи веруваат дека Хепберн најверојатно имала готвач, додека новата сопственичка сакала кујна што е во центарот на куќата, со оглед на тоа што таа самата готви. Ги реновирале и бањите и електричните инсталации и направиле дополнителни гостински соби.

„Иако куќата го носеше белегот на својата позната сопственичка, по толку години беше неопходно реновирање. Декорот беше во стилот на Одри Хепберн, со многу цвеќиња низ завесите, но можеби малку застарен“, вели Катарина.

Сепак, некои лични детали на познатата стилска икона сè уште се присутни. Од кујната сè уште се гледа градината со рози, која модната куќа „Живанши“ ѝ ја подари на актерката.

„Кога Одри Хепберн наполни 60 години ѝ испратија 60 бели рози, па затоа засади градина со рози. Половина од тие рози уште се тука“, вели Катарина, изразувајќи жалење што не го издржале сите тестот на времето.

Покрај своето славно наследство, куќата содржи и автентични историски елементи, вклучувајќи пет оригинални камини, од кои едниот се наоѓа во главната спална соба.

Одри Хепберн е вечна инспирација и таа и сега влијае на цената и привлечноста за купување на вилата. Depositphotos

Тоа што куќата се поврзува со една од најголемите холивудски ѕвезди на 20 век секако ќе го привлече вниманието на купувачите. Катарина верува дека овој имот е идеален за големо семејство како нивното, кое сака простор и ужива во безбеден и идиличен живот во мало швајцарско гратче.

„На почетокот најважно беше тоа што куќата ѝ припаѓаше на Одри Хепберн, но со текот на времето го заборавате тоа. Сега, се разбира, повторно размислуваме за Хепберн, бидејќи тоа е добар аргумент за потенцијалните купувачи“, вели таа.

Соговорничката е свесна дека е вистинско време тие да продолжат понатаму, но признава дека ќе ѝ биде тешко да ја напушти куќата. Сега таа разбира зошто холивудската легенда го избрала токму ова од сите места на планетата: „Тоа е навистина мирно место“.

Во моментов нема коментари за веста. Биди прв да коментира...

Остави коментар