Кои се петте најпопуларни бизнис-книги во Македонија?

Побарувачката за бизнис-литература кај нас вртоглаво расте. Сѐ повеќе читатели купуваат книги што содржат практични совети, искуства од успешни луѓе и водичи за личен и професионален развој. Интересот за теми како стартап-култура, менаџмент, финансиска писменост, продуктивност, технолошки иновации и претприемаштво е во сериозен подем, а тоа го покажуваат и тековните извештаи на „Бокси“ (Boksy.mk), македонска апликација за читање и слушање книги. 

„Литературата за личен раст и деловен успех станува масовен тренд што ја менува читачката култура во земјава“, вели Ивана Каралиева Петреска, извршна директорка и соосновачка на компанијата.

Ивана Каралиева Петреска, извршна директорка на „Бокси“

 

За „Блумберг Адрија“ таа истакнува дека интерес за оваа литература особено покажува младата публика, која, според неа, сака да биде информирана, инспирирана и чекор понапред, а во продолжение ни откри и кои пет бизнис-книги во моментов се најпопуларни на нивната платформа.

• „Да се смислува и да се талка“ - Џеф Безос 

Оваа книга претставува уникатна збирка од писма, размислувања и визии на основачот на „Амазон“. Читателот влегува во светот на Џеф и го согледува начинот на кој размислува еден од највлијателните претприемачи на денешницата, со акцент на иновацијата, долгорочната визија и лидерството.

• „Без правила: Нетфликс и културата на реинвенција“ - Рид Хејстингс и Ерин Маер 

Оваа книга ја раскажува приказната за културата што ја изгради гигантот за стриминг, кој успеа да го трансформира светот на забавата. Авторите објаснуваат како слободата и одговорноста, транспарентноста и довербата се клучни за градење иновативна организација.

• Do Hard Things - Стив Магнес 

Психологот за издржливост ги урива традиционалните поими за храброст и ментална цврстина. Наместо со притисок и сила, тој предлага нова дефиниција за храброст - онаа што доаѓа од самосвест, ранливост и внатрешна сигурност.

• Hustle Harder, Hustle Smarter - Куртис Џексон 

Од уличен живот до империја, американскиот рапер Фифти Сент во оваа мотивациска и деловна автобиографија ги споделува лекциите што ги научил патем. Книгата нуди практични совети за дисциплина, интуиција и изградба на личен бренд.

• „Речи НЕ без чувство на вина“ - Дејмон Захаријадес 

Ова е водич за сите што се борат со поставување граници. Книгата учи како да кажеме „не“ со самодоверба и почит, без чувство на вина - нешто што е суштинско за менталното здравје и професионалниот успех.

Дигитализација на книги со ВИ само за неколку минути 

Инспирирани од модел успешно применет на нордискиот пазар, Каралиева Петреска и нејзините бизнис-партнери ја создадоа „Бокси“ во 2022 година. На почетокот оваа апликација беше комплетно фокусирана на детската литература, а сега располага со илјадници наслови од различни жанрови и во моментов има над 20.000 регистрирани корисници. Она што нејзините основачи најмногу ги радува е што публиката бара квалитетна содржина на македонски јазик, па и во иднина ќе продолжат значајно да инвестираат во локална продукција и во автори од регионот.

„Освен за мотивациски книги, домашната публика покажува силен интерес за психолошка литература, трилери и современа проза“, открива нашата соговорничка.

Апликацијата во моментов има над 20.000 корисници

 

На платформата од неодамна е достапна уште една услуга, а тоа е дигитализација на книги само за неколку минути со помош на вештачка интелигенција. Станува збор за алатка што им овозможува на издавачите и на авторите многу побрзо и поедноставно да ги претворат своите книги во аудиоформат, кој, пак, станува сѐ поатрактивен за оние што немаат доволно време, па сега „читаат“ и додека возат или вежбаат.

„Овој процес, кој традиционално бараше студио, диктор, монтажер и неколку дена работа, сега е достапен речиси веднаш, со можност за избор на емоција, тон и стил на нарација. Услугата е наменета за оние што сакаат брзо, квалитетно и економично да понудат аудиоверзија на своите изданија, без компромис во однос на квалитетот.  Достапни се повеќе од 70 јазици, со тоа што засега сме фокусирани на регионот Адрија и јазиците тука со своите богати дијалекти“, објаснува Каралиева Петреска.

Корисниците плаќаат месечна претплата од 399 денари, а, како што вели таа, за оваа сума тие добиваат неограничен пристап до библиотека со над 50.000 книги достапни за читање или слушање директно од мобилен телефон или таблет во секое време. Апликацијата е достапна и на Ап стор (App Store) и на Гугл плејстор (Google Play store) и е едноставна за користење.

„’Бокси’ функционира како ’Нетфликс’, само за книги. Засега искуството се сведува на читање/слушање во апликацијата и книгите се достапни само преку интернет-конекција. Во иднина би сакале да претставиме можност за симнување на книгите за да може корисниците да ги читаат/слушаат и во момент кога се офлајн“, вели таа.  

Регионален раст и освојување на скандинавскиот пазар

Со овој производ компанијата е присутна и на шведскиот и на албанскиот пазар. Иако во секоја земја користат различни маркетинг-кампањи, искуството им покажало дека навиките на тамошните читатели во однос на нашите се исти.

„Сите бараат што поразновидна и побројна литература за да може да си го најдат правиот наслов во право време. Исто така, на сите пазари еднакво е важно дигиталното искуство во апликацијата, и на телефон и на таблет. Корисникот денес има високи очекувања, што нам ни поставува одлично целно ниво на дигиталното искуство, кое се трудиме секогаш да го постигнеме, а е соодветно за цел свет“, вели Каралиева Петреска.

Сериозен бизнис во овој стартап веќе препознале и регионални инвеститори од Словенија, Албанија, Косово и од Грција. Нивните очекувања во наредните пет години се регионален раст и продлабочување на услугите за аудиокниги базирани на вештачка интелигенција. 

„По освојување на регионот Адрија, амбициите ни се да се прошириме на европските пазари, а подоцна и на другите континенти“, вели таа.

Во моментов нема коментари за веста. Биди прв да коментира...

Остави коментар