Доколку возењето со оригиналниот редизајниран воз „Ориент експрес“ во 2025 година и престојот во хотелот „Ориент експрес“ се на врвот на вашата листа на желби, го имаме токму она што ви е потребно: „Ориент експрес силенсис“ (Orient Express Silenseas), луксузен брод долг 220 метри, со три јарболи високи речиси100 метри. Тоа треба да биде најголемата едрилица во светот, а наедно и суперјахта. Бродот ќе плови по медитеранските и карипските поморски маршрути, почнувајќи од пролетта 2026 година, а ќе нуди 54 апартмани за 120 патници. Резервациите ќе започнат веќе во 2024 година.
„Ориент експрес силенсис“ е првиот исчекор на глобалниот угостителски гигант „Акор“ (Accor) во индустријата за крстосување, во партнерство со француската бродоградителска компанија „Шантје де Л’Атлантик“ (Chantiers de l'Atlantique). „Акор хотелс“ (AccorHotels) сподели со „Блумберг“ детали за своите идни линии за крстосување. Ќе бидат конструирани две јахти, а испораката на втората е планирана за првиот квартал од 2027 година.
„Се обидуваме да се вратиме во најдобрите години на бродоградбата, меѓу 1934 и 1938 година, исклучително иновативни во тоа време“, вели Себастиен Базин, главен извршен директор на „Акор хотелс“. Базин потсетува на сцените на француската ривиера, Сен Тропе и Кан - времето на музиката, филозофите и уметноста. Ова ќе значи „враќање во историјата, но со модерен дизајн“.
Комерцијалните банки ќе финансираат до 70-80 проценти од проектот, а остатокот ќе го обезбеди конзорциум од акциски партнери во кои „Акор“ ќе има малцински удел. „Акор“ одби да ги сподели трошоците за изградба на овој брод, но како референца, двојно помалата луксузна јахта на Џеф Безос од 130 метри, исто така со три јарболи, се проценува дека чини повеќе од 500 милиони долари; запленетата суперјахта од 160 метри на рускиот милијардер Алишер Усманов се проценува на 600-750 милиони долари.
Максим Д'Анжак и Мартин Дарзак за „Ориент експрес“
Дизајнот и изработката се 100 проценти француски, а Базин вели дека неговите цели за „Ориент експрес силенсис“ се двократни: да го понуди најдоброто во однос на луксузот, искуството и дизајнот и да биде воден од одржливоста, односно идејата за заштита на планетата. Индустријата за крстосување е туристички сектор што е најмалку познат по својата чувствителност за животната средина или климата и сериозно заостанува во напорите за намалување на емисиите на јаглерод.
Позелено крстосување
„Ориент експрес силенсис“ ќе работи без дизел и ќе користи хибриден погонски систем со ветер како примарен извор на енергија, доколку временските услови го дозволуваат тоа. Името на пловилото се однесува на фактот дека тивко ќе се лизга по морето, благодарение на трите цврсти едра направени од стаклени полиестерски листови и систем за погон на ветер, сето тоа дизајнирано од „Шантје де Л’Атлантик“. „Можеби нема да застанеме точно кога имаме намера ако ветрот е премногу силен, но јас го сакам токму тоа“, вели Базин.
Бидејќи станува збор за крстосување на редовни линии, за кое Базин вели дека најверојатно ќе започне во Медитеранот, бродот исто така ќе биде опремен со мотор што работи на течен природен гас (LNG), што би ги намалило емисиите на јаглерод диоксид за 20 проценти во споредба со користењето дизел. (Имајте на ум дека во моментот нема крстосувања по океанот без емисии, а ЛНГ е еден вид фосилно гориво, иако помалку загадува.)
„Ориент експрес силенсис“ исто така ќе биде подготвен да користи зелен водород кога прописите ќе дозволат негова употреба, што, според Базин, може да се случи пред лансирањето на бродот. Дополнителните амбиции за „позеленување“ вклучуваат употреба на електрична енергија од брегот, што му овозможува на бродот да се приклучи откако ќе се закотви, наместо да работи со мотор и сонарен систем за откривање морски цицачи на маршрутата за да се избегнат судири.
Максим Д'Анжак и Мартин Дарзак за „Ориент експрес“
Сосема ново искуство
Возењето на „Ориент експрес“ на море несомнено нуди мистичност и луксузен комфор, по кој е познат брендот. Познатиот француски архитект Максим д'Анжак, чии проекти ги вклучуваат идниот воз „Ориент експрес“, продавницата „Герлен“ (Guerlain) на Елисејските полиња и хотелот „Ориент експрес“ во Рим, е мозокот зад дизајнот на ентериерот, кој треба да ја долови француската ривиера.
„Искуството на бродот е многу слично со искуството што го обезбедуваме на 'Рафлс' (Raffles) во Сингапур, во хотелот и надвор од него“, вели Базин. „’Ориент експрес’ како луксузен бренд не е производ, тоа е чувство“.
„Очекувајте да биде многу полуксузна од суперјахтата ’Риц Карлтон’ (Ritz-Carlton). Ќе биде и двојно поскапa“, продолжува Базин, истакнувајќи дека вториот брод, иако со речиси иста должина, прима двојно повеќе патници. За споредба, цените на билетите за „Евримa“ (Evrima) долга 190 метри, која може да прими речиси 300 луѓе, се движат од 7.000 до 25.000 долари по лице за крстосување со седум ноќевања.
„Меѓу луксузот што го бараат ултрабогатите по пандемијата е просторот“, вели Базин. Според тоа, апартманите имаат просечна површина од 230 квадратни метри, што е приближно колку еден просечен еднособен стан во Њујорк. Шесте апартмани на горната палуба може да се комбинираат во претседателски апартман од 1.400 квадратни метри со приватна тераса од 530 квадрати.
Максим Д'Анжак и Мартин Дарзак за „Ориент експрес“
Гостите на „Ориент експрес силенсис“ ќе имаат на располагање два базена, ресторан и бар, спа-центар, амфитеатар-кабаре и приватно студио за снимање за луѓе што се креативни на море. Екскурзиите на брегот ќе се фокусираат на културни и природни искуства.
Уште една препознатлива карактеристика на „Ориент експрес силенсис“: планирано е да им се издава на приватни компании за различни настани околу една третина од времето. На пример, јахтата може да се користи за фестивалот во Кан, за ревиите на париските модни куќи, за посета на гран при на места како Дубаи и Монако, или за приватни прослави на кои можете да поканите околу 50 ваши најдобри пријатели.
Кога ќе започне првото крстосување, тоа ќе биде момент на враќање на оригиналната муза на брендот „Ориент експрес“ - морето. Имено, токму трансатлантското патување со луксузен брод од Европа до Америка во 1867 година го инспирирало белгискиот градежен инженер Жорж Нагелмакерс да го лансира светски познатиот воз во 1883 година.
„Единствено што сè уште не знаеме е дали треба да носиме костум и вратоврска на бродот“, заклучува Базин.
.webp){kind=icon}
Во моментов нема коментари за веста. Биди прв да коментира...