Луксузните возови ја враќаат златната доба на патувањата

Авионите со децении важеа за синоним за брзина и луксуз. Директните летови, бизнис-класата и ВИП-салоните го направија летањето прв избор за луѓето низ светот. Но растот на цените на авиобилетите, строгите безбедносни протоколи и повеќечасовните чекања на аеродромите придонесоа возовите да станат сериозна алтернатива, која последниве години добива и нова димензија: од удобност, еколошка одржливост и можност за непречено работење, па до враќање на носталгијата и престижот што потсетува на златната доба на патувањата.

„Возот ми овозможува удобно да се сместам, да го отворам лаптопот, да се поврзам на стабилен интернет и да работам без прекин“, објаснува Јелена Зец, која моментално живее и работи во Германија. Според неа, дополнителна бенефиција е тоа што возовите пристигнуваат директно во центарот на градот, без потреба од долги трансфери. „Ако од Штутгарт стигнам во Салцбург за три и пол часа за 30 евра и веднаш можам директно од железничката станица на состанок, тоа ми заштедува половина ден, а и пари, во споредба со летање со авион.“

Сала за ручек во возот „Венис симплон-Ориент експрес“. Извор: Belmond

Новиот избор на бизнис-патниците

Европската Унија последниве години силно инвестира во железничка инфраструктура. Само во рамките на стратегијата Европскиот зелен договор (EU Green Deal), до 2030 година е планирано бројот на ноќни линии да се зголеми за 50 отсто. Целта е кратките летови постепено да се заменат со возови – решение што е поодржливо за животната средина, но и попријатно за патниците.

Истражувањата покажуваат дека возот може да испушти и до десет пати помалку јаглерод диоксид од авион на иста релација. На пример, патување од Лондон до Париз со воз создава околу 22 килограми CO₂, додека со авион таа бројка достигнува дури 244 килограми. Брзите линии, како онаа што ги поврзува Париз и Милано за шест часа или Франкфурт и Амстердам за нешто повеќе од четири, веќе нудат комфор што тешко може да се спореди со тесните седишта во авион, долгите редици на аеродромите и напорните безбедносни контроли.

Легендарниот воз „Венис симплон-Ориент експрес“ некаде меѓу Софија и Истанбул, 2017 година. Извор: Depositphotos

Според податоците на Глобална асоцијација за деловни патувања (Global Business Travel Association – GBTA), деловните патувања последниве неколку години по пандемијата повторно стануваат актуелни, но искуството е значително променето. Дури 40 отсто компании во Европа, особено во Франција и Велика Британија, усвоиле корпоративни „зелени политики за патување“ со кои ги поттикнуваат вработените за пократки службени патувања да избираат воз, како и практиката со едно патување да се обединат повеќе состаноци или настани. На тој начин се заштедуваат трошоци и време, а наедно се зајакнува и корпоративната репутација преку намалување на бројот на летови, кои се меѓу најголемите извори на емисии на јаглерод диоксид во бизнис-секторот.

Меѓу носталгија и хедонизам

Иако економските и одржливите фактори се важни, туристичките и елементите од животниот стил се тие што најмногу ги привлекуваат патниците. Возовите станаа симбол на престиж – од модерните брзи и дневни до легендарните ноќни и побавни, чии ентериери потсетуваат на ексклузивни хотели на шини.

Луксузна кабина во возот „Ла долче вита Ориент експрес“. Извор: La Dolce Vita Orient Express

Луксузните возови станаа еден од најатрактивните туристички формати, а побарувачката за вакви патувања во последните пет години е зголемена за 158 отсто. Најчесто ги избираат помладите патници и генерацијата зед, привлечени од ретро-шармот и концептот на „бавно патување“, кое нуди уникатно и ексклузивно доживување. За оваа комбинација од хедонизам, носталгија и современо бегство, цените достигнуваат и до 7.000 евра за ноќ. Некои ексклузивни линии, како зимските тури низ Алпите, се распродаваат за само неколку дена по објавата, а за некои од нив се чека и на листи за резервација.

Сè е подготвено за свечен ручек во возот „Стетсман рејл“ во Велика Британија. Извор: Depositphotos

Овие возови примаат ограничен број патници, но нудат врвно искуство: менија со потпис на славни шефови, панорамски вагони со погледи кон најубавите предели во светот, кабини што се претвораат во приватни апартмани и батлер-услуга достапна во текот на целото патување. Дополнителен шарм носи фактот што многу од вагоните се реставрирани оригинали од минатиот век – со резби во дрво, витражи и арт-деко мебел – така што секој детаљ носи автентична историја и приказна. На тој начин патниците добиваат комбинација од гламурот на златната доба на патувањата и комфорот на модерни хотели со пет ѕвезди.

Луксуз на шини

Од раскошни кабини и менија на „Мишелин“ до панорамски пејзажи што оставаат без здив.

„Ла долче вита Ориент експрес“, Италија

Најновиот проект на легендарниот бренд „Ориент експрес“ го враќа гламурот на 1960-тите години во современо издание. Ретро-дизајнот, гастрономијата под водство на шефот на „Мишелин“ Хајнц Бек и рутите низ 14 италијански региони, осмислени да ги спојат уметноста, природата и гастрономијата, го прават ова патување вистински сон. Цените почнуваат од околу 3.500 евра по лице за ноќ во двокреветна кабина.

Приказ на соба во „Ла долче вита Ориент експрес“. Фото: La Dolce Vita Orient Express

„Белмонд ројал скотсман“, Шкотска

Еден од најпрефинетите возови во Европа, со само 40 патници по поаѓање, нуди интимно искуство на патување низ шкотските пејзажи. Кабините се уредени во едвардијански стил, со дрвени панели и кадифени детали. За време на патувањето, патниците уживаат во врвни оброци, вински дегустации и ексклузивни излети, вклучувајќи посети на замоци и дестилерии. Цените се движат околу 2.700 евра по ноќ, додека најексклузивните маршрути достигнуваат и над 30.000 евра.

 

 

 

„Белмонд Британија експлорер“, Велика Британија

Луксузен ноќен воз што во јули годинава ја имаше својата прва тура низ Англија и Велс. Прима 30 патници и располага со 18 кабини со модерен ентериер во палета на бои инспирирани од природата и класичните британски мотиви. Патувањата од три или шест ноќи тргнуваат од Лондон, со можност за комбинирани рути. Аранжман од три ноќи во двокреветна кабина чини 11.000 фунти.

 

 

 

„Венис симплон-Ориент експрес“, Европа

Икона на луксузното патување, која ја спојува златната доба на железницата со современиот комфор. Автентични вагони од 20-тите и 30-тите години на минатиот век, елегантни ресторани и барови, кабини и „гранд“ апартмани со мермерни бањи. Патувањата поврзуваат градови како Париз, Венеција и Прага, со вклучени оброци, пијалаци и внимателно осмислени излети, нудејќи незаборавна европска авантура. Цените по ноќ, во зависност од типот на кабина, се движат од 4.500 евра до 10.000 евра.

Апартманот „Л’Обсерватоар“ во возот „Венис симплон-Ориент експрес“. Извор: Belmond

„Голден игл Дунав експрес“, Источна Европа

Воз што поврзува градови како Будимпешта, Виена, Прага и сè до Истанбул, нудејќи им на патниците незаборавно искуство преку различни тематски тури. Вкупно прима 62 патници и се состои од седум спални вагони, еден панорамски вагон, салони и два ресторана со врвна гастрономска понуда. Цените почнуваат од околу 2.500 евра по лице за пократки тури, додека подолгите достигнуваат и над 10.000 евра по ноќ.

Во моментов нема коментари за веста. Биди прв да коментира...

Остави коментар