.webp){kind=icon}
Њујорк го претекна Хонгконг на листата најскапи градови во светот од аспект на живот за доселениците, а вртоглавиот раст на трошоците за домување за првпат го доведе Сингапур меѓу првите пет рангирани на овој список.
Растечката инфлација и цените за сместување го рангираа Њујорк на врвот на листата според трошоците за живеење во рамките на истражувањето што го спроведе ЕКА (ECA International) за 2023 година, додека Женева и Лондон останаа на третата и четвртата позиција.
Од минатогодишното 13-то место, Сингапур скокна меѓу првите пет. Тоа не е во согласност со општиот тренд на азиските градови, кои се соочуваат со пад на листата. Тоа делумно им се припишува на пониските стапки на инфлација во однос на другите региони.
Поради големиот раст на цените за сместување Сингапур од минатогодишното 13-то место скокна меѓу првите пет најскапи града годинава / Depositphotos
„Растот на финансискиот центар во Југоисточна Азија е главно последица на големото зголемување на трошоците за сместување“, рече регионалниот директор на ЕКА за Азија, Ли Куан. Зголемената побарувачка за куќи за изнајмување, делумно поттикната од претходно ублажените ограничувања поврзани со ковид-19 во споредба со другите клучни локации во регионот, не ја следеше соодветна понуда за сместување.
Најголем раст оваа година забележа Истанбул, кој на листата се искачи дури за 95 позиции и го зазеде 108-то место како резултат на скокот на цените за 80 проценти, поттикнат од економската политика на претседателот Реџеп Таип Ердоган, се наведува во извештајот.
Најголем раст оваа година оствари Истанбул, кој се искачи дури за 95 позиции, на 108-то место на листата / Bloomberg
Истражувањето покажа и дека наемнините во Дубаи пораснаа речиси за третина поради големиот број руски доселеници, што беше причина овој светски центар да се искачи на 12-то место од претходното 23-то.
Додека поголемиот број европски градови напредуваат на листата, норвешките и шведските паднаа поради слабите валути, а се спуштија и француските градови поради пониските стапки на инфлација во споредба со преостанатите земји од Европската Унија.
Кинеските градови исто така паднаа на оваа листа поради влијанието на слабоста на валутата и пониските стапки на инфлација во однос на другите земји, додека рангирањето на сите американски градови напредуваше поради силниот долар и високата инфлација, така што Сан Франциско влезе меѓу десетте најскапи града на светот.
„ЕКА интернешнел“ ги анализира трошоците на потрошувачите за стоки и услуги, земајќи ги предвид трошоците за наемнини во областите каде што вообичаено се населуваат доселениците, па листата опфаќа 207 града во 120 земји и територии низ светот.
Во продолжение е листата на 20 најскапи светски места за живот на иселениците, а во заградите е нивното рангирање во 2022 година:
1. Њујорк, САД ( 2)
2. Хонгконг, Кина (1)
3. Женева, Швајцарија (3)
4. Лондон, Обединето Кралство (4)
5. Сингапур (13)
6. Цирих, Швајцарија (7)
7. Сан Франциско, САД (11)
8. Тел Авив, Израел (6)
9. Сеул, Јужна Кореја (10)
10. Токио, Јапонија (5)
11. Берн, Швајцарија (16)
12. Дубаи, Обединети Арапски Емирати (23)
13. Шангај, Кина (8)
14. Гуангжу, Кина (9)
15. Лос Анџелес, САД (21)
16. Шенжен, Кина (12)
17. Пекинг, Кина (14)
18. Копенхаген, Данска (18)
19. Абу Даби, Обединети Арапски Емирати (22)
20. Чикаго, САД (25)
