.webp){kind=icon}
Ова се само некои од најновите примери на лошо однесување на туристите:
Група германски гости урнале статуа стара 150 години во вила во северна Италија. Туристка од Данска гола возела мотор на Бали. Маж од Полска недозволено се искачил на светиот храм во Чичен Ица, Мексико. Група американски туристи вознемирувале мечки во националниот парк Јелоустоун.
Туристите отсекогаш имале лоша репутација, но владите на некои земји сега се многу порешителни да ги спречат несовесните посетители, користејќи различни тактики за да го контролираат лошото однесување и да ги предупредуваат.
Во последните месеци неколку земји донесоа закони со сериозни санкции: од високи парични глоби дури до затворски казни. На Бали, локалното население има нова телефонска линија на која може да ги пријави туристите, а земјата годинава веќе депортирала повеќе туристи отколку во цела 2022 година.
„Стариот град Дубровник не е дискотека“, вели Јелка Тепшиќ, заменик-градоначалничка на историскиот хрватски град. „Таму всушност живеат луѓе“, вели таа. „Тие сакаат добро да се одморат во текот на ноќта“.
Тепшиќ вели дека туристите треба да се потсетат дека се наоѓаат во светско наследство на УНЕСКО и дека одредено однесување е несоодветно: седење и консумирање храна и пијалаци на скалите на историските градби, брзање со велосипеди или електрични тротинети низ пешачките зони, шетање низ градот во костим за капење. „Ова не е плажа“, вели таа.
Во јуни градот објави видео за да ги потсети туристите на она што треба и што не треба да прават. Видеото со наслов „Почитувај го градот“ се емитува на бродовите за крстосување, авионите и аеродромите како дел од поголем проект започнат во 2018 година за да се подобри сликата на градот преполн со туристи.
Потоа, тука е таа проклета бучава: звукот на куферите што се тркалаат по калдрмата. „Многу, многу е бучно“, додава Тепшиќ. „Дубровник има илјадници скали. Немојте да се изненадите ако ве запре полицијата: таа е задолжена да им укаже на туристите да го подобрат своето однесување кога ќе забележи нешто непримерно“.
Во Италија, туристите што ги запираат своите автомобили и ги блокираат патиштата со поглед кон центарот на пристаништето Портофино се соочуваат со казни до 279 евра. Градскиот закон донесен во април им забранува на луѓето да го попречуваат сообраќајот на најпопуларните места помеѓу Пјацета и пристаништето Моло Умберто I, од 6 до 18 часот, во текот на летните месеци, до октомври. Посетителите сè уште можат да шетаат низ овие области и да прават самослик пред познатиот плоштад со неговите светло обоени фасади.
„Целта не е да се направи местото ексклузивно, туку да им се овозможи на сите да уживаат во убавината на Портофино“, изјави градоначалникот Матео Виакава за локалните медиуми.
Италија продолжува да ги зголемува казните за лошо однесување, вклучувајќи казни до 60.000 евра и можни затворски казни за уништување историски споменици, според законот усвоен во април. Тоа доаѓа по голем број инциденти во кои беа вклучени климатски активисти, како и туристи што цртаа по ѕидовите на римскиот Колосеум.
Некои политичари велат дека не се доволни ниту паричните казни и заканата со затвор. Кон крајот на јули, едно лице влегло во Фонтана да Треви во Рим, се качило на една од скулптурите и скокнало во водата, со овации од присутните. По тоа, член на градскиот совет предложи фонтаната да се затвори.
Бали исто така зазема построг пристап кон недоличното однесување на туристите. Од 6 август, индонезискиот остров депортирал 198 туристи, повеќе од вкупниот број за 2022 година, изјави претставник на Бали за „Си-ен-ен Индонезија“ (CNN Indonesia). Нови работни групи работат на сузбивање на непочитувањето од туристите и посетителите што незаконски ги надминуваат визите. „Секако дека е неопходно активно учество на заедницата во следењето и преземањето мерки против несовесните туристи“, се наведува во соопштението на една од работните групи, одговорна за управување со локалната телефонска линија за пријавување лошо однесување на странските туристи.
Има и правила на однесување донесени во јуни, меѓу кои е дека не е дозволен влез на свети места, освен заради молитва во соодветна облека. Нема лоши коментари, директно или на социјалните мрежи.
Што се однесува на борбата на Амстердам да го исчисти центарот на градот со отстранување на непримерното однесување, најновата видеокампања личи на епизода од полициска ТВ-серија, со слики од скршени пивски шишиња на улица и мажи што се апсат со трепкачки ротациски светла.
„Доаѓате во Амстердам за да направите хаос? Останете што подалеку“, се наведува во пораката. Во спротивно ќе се соочите со парични глоби, записник од апсење и „несакано досие“, продолжува предупредувањето. Резултатите од кампањата се очекуваат во септември, изјави портпаролот на градот за „Блумберг“.
