.webp){kind=icon}
Додека Европа се бори со летото кое е во знак на патничкиот хаос, најбогатите ги преземаат работите во свои раце.
Употребата на приватни авиони се зголеми за речиси една третина во последниве месеци во споредба со нивоата пред пандемијата, растегнувајќи ги уште повеќе капацитетите на аеродромите од Ибица до Миконос и предизвикувајќи политички реакции во Франција.
Лондон забележа најмногу приватни летови, повеќе од 12.000 во јули, додека Неапол, Амстердам и Берлин забележаа најголем пораст во приватниот сообраќај меѓу најпопуларните аеродроми, во споредба со нивоата од 2019 година, според податоците собрани од Европската асоцијација за бизнис авијација.
Побарувачката „полета“
Употребата на приватни авиони во најпопуларните европски дестинации се зголеми во јули
Овој наплив доаѓа откако Европејците, желни да патуваат откако беа укинати ограничувањата за Ковид-19, навалија на авиокомпаниите кои, пак, имаа мака да го вратат персоналот што го отпуштија за време на пандемијата, кога едноставно немаа никаква работа. „Бритиш ервејс“ (British Airways Plc), „Луфтханза“ (Deutsche Lufthansa AG) и други големи авиопревозници летово откажаа десетици илјади европски летови поради недостигот на работници.
„Нивото на погодност е едноставно неспоредливо ако се потпирате на редовни авиокомпании кои уште не се целосно вратени во игра“, вели Ричард Кое, управен директор во консултантската компанија за авијација „Вингекс“ (WingX). „Бројот на луѓе кои за прв пат користат приватни летови порасна за цели 40 отсто“, рече тој.
Извршни директори од Европа направија ваква транзиција за да ги избегнат нарушувањата во патувањето, а приватни летови користат и некои американски патници кои можат да си дозволат да уживаат во неодамнешните добивки на доларот во однос на еврото. Северна Америка го сочинува најголемиот дел од меѓународни пристигнувања во Европа.
Летовите на европските приватни авиони ги надминуваат нивоата пред пандемијата
Ваквиот наплив предизвика политичка бура во Франција поради емисиите на јаглерод од приватните авиони додека земјата се обидува да ги исполни своите климатски цели. Во интервју за „Ле Паризен“ (Le Parisien) од 20 август, министерот за транспорт Клемент Бон рече дека сака да побара од приватните авиони да ги објавуваат деталите за летот и да се постават упатства за нивна употреба кога се достапни соодветни железнички или комерцијални воздушни опции.
И во Обединетото Кралство, каде таблоидите веќе долго време ги прозиваат познатите личности, членовите на кралското семејство и другите поради користењето на приватни авиони, може да се согледаат промени. Со зголемената инфлација и кризата на трошоците за живот што ги зафати ниската и средната класа во земјата, употребата на авиони стана клучна точка на економскиот контраст во земјата.
Лондон објави 37 отсто повеќе приватни летови во јули отколку во истиот период во 2019 година, додека Париз забележа пораст од 43 отсто, според објавените податоци. Севкупно во Европа, приватниот сообраќај се зголемил за речиси 30 отсто од нивото пред пандемијата, на скоро 179.000 летови.
Бројките се уште повпечатливи со оглед на падот на воздушниот сообраќај од Русија, по војната во Украина и острите меѓународни санкции. Во јули, Москва пријави само 354 приватни летови, што е само мал дел во споредба со 1.862 регистрирани пред три години.
Сепак и приватната авијација имаше свои турбуленции. На пример, многу авиони се надвор од употреба поради доцнење на одржувањето предизвикано од проблеми со синџирот на снабдување во Кина.
„Луѓе се јавуваа 24 или 48 часа однапред за да резервираат авион до Ибица“, вели Изабел Клерк, раководител на продажба во „Аероаферс“ (Aeroaffaires), мрежа на оператори со приватни авиони во Европа. „Ова не беше проблем минатата година, но годинава, ако не сте резервирале една недела претходно, подобро заборавете на патувањето“, објаснува таа.
Bloomberg Mercury
Цените соодветно се зголемија, поттикнати не само од недостигот на авиони, туку и од растот на цените на горивото за авиони за 73 отсто од минатото лето. Приватен лет од Париз до Миконос сега чини околу 25.000 евра, речиси двојно повеќе од пред една година, посочуваат од Aeroaffaires.
Со глобална рецесија на повидок, изгледите се нејасни. Кое од WingX вели дека сегашната затегнатост на пазарот на приватни авиони може да продолжи ако авиокомпаниите бидат принудени да продолжат да ги намалуваат летовите во зима.
Клерк е повнимателна.
„Иако имавме многу добра година, тоа не значи дека зголемувањата ќе продолжат до бескрај. Ќе има стабилизација, а оваа есен и зима нема да бидат лесни периоди“, вели таа.
