Може ли партнерството со Ким Кардашијан да го врати „Најк“ на врвот?

Во избезумената потрага по светлина на крајот од тунелот, производителот на спортска опрема и обувки „Најк“ (Nike) ѝ се обрати на иконата на американската поп-култура Ким Кардашијан. Пред неколку дена „Најк“ и брендот за долна облека на Кардашијан, „Скимс“ (Skims), ги здружија силите за да создадат нов женски фитнес-бренд.

„Најк“ и „Скимс“ преку соопштение за печат објавија дека заеднички подготвуваат „опсежна линија“ на облека, обувки и додатоци под брендот „Најкскимс“ (NikeSkims). Новите партнери нагласуваат дека имаат долгорочна визија за женска спортска облека што се приспособува на телото, наведува „Блумберг“.

„Ова партнерство претставува кулминација на заедничката визија бидејќи испорачува производи што се внимателно дизајнирани за да се обликуваат и функционално да пасуваат за секое тело“, рече Кардашијан, коосновачка на „Скимс“. Таа додаде дека првата колекција на „Најкскимс“ ќе биде претставена напролет.

Bloomberg

 

„Најк“ сака да се врати на врвот

„Најк“ видел и подобри денови. Акциите на компанијата со седиште во Орегон минатата година изгубија околу 30 отсто од својата вредност, онлајн и директните продажби се во пад, а најблиските конкуренти, како „Адидас“ (Adidas) и „Њу баланс“ (New Balance), го пополнуваат просторот на полицата што „Најк“ невнимателно го напушти.

Актуелните проблеми следуваа по турбуленциите на самиот врв на компанијата, која минатата есен го смени извршниот директор Џон Донахо. Под водство на Донахо, искусен технолошки директор и консултант што отиде во „Најк“ со мало познавање на спортската индустрија, компанијата успешно ги преброди раните фази на пандемијата на почетокот на неговиот мандат.

„Блумберг бизнисвик“ ја сумираше стратегијата на Донахо во една реченица: „Неговата стратегија функционираше додека не запре“. Под негово водство „Најк“ беше критикуван за недостиг од иновации во развојот на производите, драстично преминување кон директна продажба на потрошувачите (D2C) преку дигитализација и паралелно намалување на бројот на малопродажните партнери. Дупката што со ваквите потези ја отвори водечката компанија на пазарот, конкурентите вешто ја пополнија, рече во јануари Флоријан Роперт, раководител на маркетинг-агенцијата „Спонтанцо“ (Spontanzo).

„Најк“ сега повторно се фокусира на спортистките во потрага по пресврт на пазарните состојби под водство на новиот извршен директор Елиот Хил. На почетокот од месецов компанијата емитуваше реклама за време на Супербоул, првпат по децении, истакнувајќи врвни женски спортски ѕвезди, како Кејтлин Кларк од ВНБА (WNBA), спринтерката Шакари Ричардсон и гимнастичарката Џордан Чајлс, извести „Блумберг“.

„Само овој потег нема да ги извлече од проблемите, но ќе биде важен чекор кон враќање на старите патеки“, коментира експертот за спортски маркетинг Матеј Кадак за заедничкиот проект на „Најк“ и брендот „Скимс“. „’Најк’ со години агресивно цели на женските потрошувачи во таканаречениот спортски сегмент. Оваа категорија вреди повеќе од 300 милијарди долари на глобално ниво, а се очекува да расте осум-девет отсто годишно во текот на следната деценија“, додава тој.

„Најк“ долго време беше неприкосновен крал на спортската индустрија, но во последниве години се соочи со силна конкуренција од „Лулулемон“ (Lululemon) и други нови брендови на пазарот за женска спортска облека, објаснува Кадак.

„Брендот, кој првично се сметаше за ниша, сега вреди 9,6 милијарди долари и презеде голем удел од ’Најк’ во овој брзорастечки сегмент“, вели Кадак.

 

„’Најк’ сега се обидува да го врати тој удел, а во ’Скимс’ гледа идеален партнер. ’Скимс’ моментално вреди четири милијарди долари и е еден од најпрепознатливите брендови за женска облека, па има силно влијание на жените потрошувачи, а тоа за ’Најк’ е повеќе од потребно“, вели експертот за спортски маркетинг.

Елиот Хил, нов извршен директор на „Најк“ / „Блумберг“

 

Кој ќе добие повеќе: „Најк“ или „Скимс“?

„Сè поголем дел од потрошувачите кон кои целат спортските брендови доаѓаат од светот на забавата. Традиционалните спортски амбасадори, како врвните спортисти, повеќе не се единствениот клуч за успех - сега се важни и инфлуенсерите, музичарите и другите познати личности чие присуство на социјалните мрежи ги обликува одлуките за купување“, вели Кадак, мислејќи на 360-те милиони следбеници на Ким Кардашијан на Инстаграм. „Тие се токму публиката што ’Најк’ сака да ја привлече. За споредба, ’Најк’ има 305 милиони следбеници“, додава тој.

Раководството на новиот бренд „Најкскимс“ има и планови за глобално проширување. Во изјава за медиумите тие ветија дека во 2026 година ќе се прошират надвор од американскиот пазар.

Како реагираа акциите на „Најк“ на оваа вест?

Во средината на јануари акциите на компанијата со седиште во Орегон паднаа за околу 30 отсто на годишно ниво. Во моментот на пишување, падот на годишно ниво се намали на 25,67 проценти, при што акциите само во изминатиот месец се зголемија за нешто помалку од пет проценти.

„Најавата за соработката предизвика раст на акциите на ’Најк’ за 6,2 проценти, што веднаш ја зголеми вредноста на компанијата за 6,7 милијарди долари. Со оваа соработка ’Најк’ не само што обезбедува пристап до нова база на потрошувачи, туку и силен маркетинг, бидејќи Кардашијан лично ги промовира производите, а секоја колекција што таа ја презентира многу брзо се продава“, додава Кадак.