Револуција во дигиталниот маркетинг: ЧетГПТ воведува платени реклами

„Опен еј-ај“ (OpenAI) го потврди она што индустријата го очекуваше: стигнуваат реклами на ЧетГПТ (ChatGPT). За бесплатните корисници и претплатниците на поевтината опција Го (Go), огласите ќе се појавуваат дискретно, на дното на одговорите, кога разговорот вклучува релевантни производи или услуги.

На хартија, оваа промена изгледа мала. Но, во пракса, ова може да биде најголемиот пресврт во дигиталното рекламирање уште од моментот кога Фејсбук во 2007 година започна со целни реклами.

Но постои клучна разлика:

Фејсбук знаеше што сакате.
Гугл знаеше што барате.
ЧетГПТ знае точно што и зошто ви е потребно нешто.

 

Зошто ова е поголем исчекор од рекламите на Гугл?

Гугл ги следи клучните зборови. Ако некој внесе „лаптоп за видеомонтажа“, алгоритамот реагира на поимот „лаптоп“. ЧетГПТ, од друга страна, го следи целиот контекст: буџет, рок, ниво на искуство, софтвер што се користи, па дури и фрустрацијата на корисникот.

Со други зборови, Гугл го гледа прашањето - ЧетГПТ ги гледа намерите.

Колку подолго некој го користи ЧетГПТ, толку системот гради подлабок профил: не само интереси туку и цели, стравови и планови. Границата помеѓу асистент и личен советник станува тенка  - а токму тука се отвора огромен рекламен потенцијал.

ЧетГПТ денес има околу 800 милиони неделни активни корисници, што го прави една од најбрзорастечките дигитални платформи во историјата. За споредба, на Инстаграм му требаа речиси шест години да достигне сличен обем, додека ЧетГПТ го постигна тоа за помалку од две.

 

 

Ново ниво на целење: ВИ-профили наместо кориснички податоци

„Опен еј-ај“ тврди дека не им продава кориснички податоци на огласувачите и дека разговорите остануваат приватни. Технички - тоа може да биде точно. Системот не мора да дели податоци за да го направи најпрецизниот рекламен механизам досега.

Меѓутоа, имајќи предвид дека трошоците и инвестициите на „Опен еј-ај“ се огромни и се мерат во стотици милијарди долари, а приходите сега достигнаа 20 милијарди, при што растот на бројот на нови корисници не е огромен, ќе биде тешко да се финансираат само со претплати. Маркетингот ќе биде единствениот начин за постигнување профитабилност, па не можеме да веруваме во тврдењето дека ВИ-рекламите нема да бидат подложни на буџетите на големите компании.

Индустриските податоци покажуваат дека само 2,1 отсто од корисничките прашања се однесуваат на директно купување. Тоа значи дека повеќето реклами ќе се појавуваат во разговори што не изгледаат комерцијално, што отвора клучно прашање: кога советот престанува да биде неутрален, а започнува да биде маркетинг, и тоа суптилен маркетинг што нема ни да го забележиме?

„Опен еј-ај“ веќе тестира формати на спонзорирани содржини во кои алгоритамот им дава приоритет на платените информации - со јасни ознаки, но без класични „огласи“ какви што ги знаеме од Гугл.

Пазар што мора да експлодира

Гугл денес заработува повеќе од 200 милијарди долари годишно од огласување, затоа што го контролира начинот на кој луѓето бараат информации. ЧетГПТ се обидува да заземе иста позиција, но не како пребарувач, туку како интерфејс за донесување одлуки.

Разликата е клучна. Гугл му прикажува на корисникот листа на линкови. ЧетГПТ дава директен одговор. Кога Гугл прикажува реклама, корисникот знае дека гледа оглас. Кога ЧетГПТ интегрира спонзорирана информација, таа граница станува нејасна.

Bloomberg

Затоа аналитичарите проценуваат дека пазарот на рекламирање воден од вештачка интелигенција во САД ќе порасне од 1,1 милијарда долари во 2025 година на 26 милијарди долари до 2029 година, што е раст од дури 23 пати за само 4 години. Глобалниот пазар на рекламирање веќе надмина 1,1 билион долари на годишно ниво.

За „Опен еј-ај“ ова не е експеримент, туку неопходност. Компанијата очекува 29 милијарди долари приходи во 2026 година, но долгорочно мора да достигне околу 200 милијарди долари за да го задржи одржливиот бизнис-модел. Претплатите не можат сами да го покријат тоа. Рекламите можат и мораат.

Адрија агол: Мал пазар, но голема промена

За регионот Адрија, рекламите на ЧетГПТ доаѓаат во специфичен контекст. Пазарот е мал и фрагментиран, но дигиталните канали веќе се заситени, особено платформите Гугл и Мета.

Процените на индустријата покажуваат дека во регионот:

• Гугл користи 85-90 отсто од интернет-популацијата, односно околу 14-16 милиони активни корисници.

• ЧетГПТ има меѓу 1,2 и 1,6 милион активни корисници, но со натпросечен удел на програмери, претприемачи, маркетинг-професионалци и фриленсери.

Со други зборови, ЧетГПТ во регионот сè уште не е масовен медиум, но е премиум канал.

За локалните стартап-компании, ИТ-фирми, едукативни платформи, финтек и сервиси B2B, ова може да стане најефикасниот огласен простор досега: корисникот не е во фаза на скролање, туку во момент кога бара решение или совет за својата одлука.

Локалните маркетинг-агенции ќе мора да го променат целосно својот бизнис-модел, затоа што ЧетГПТ ќе стане нов канал за маркетинг, а промпт-маркетингот нова наука. Промпт-маркетингот е едноставен начин да се користат различни промптови (клучни зборови и прашања) во рамките на ВИ-моделот за да го мапирате својот производ на основа на тоа што вашите корисници прашуваат и разговараат со самиот ВИ-модел на ЧетГПТ.

Истовремено, за корисниците се отвора важно прашање на доверба. ЧетГПТ веќе се користи за совети во кариера, финансии, образование, па дури и здравје. Ако спонзорираната содржина се интегрира сè повеќе во одговорите, границата помеѓу неутралниот совет и платената препорака станува сè потенка.

„Опен еј-ај“ тврди дека рекламите нема да влијаат на квалитетот на одговорите, но дали тоа е реално? Искуството на интернетот во последната деценија покажува дека економските фактори на платформите директно го обликуваат производот, а потрошувачите секогаш се на удар, а со ЧетГПТ доаѓаат и другите компании...