„Гугл“ ќе започне со производство на лаптопи „хромбук“ (Chromebook) во Индија, станувајќи уште една од многубројните глобални технолошки компании што одлучија да ги прошират операциите на овој клучен пазар во раст.
„’Гугл’ соработува со HP за производство на 'хромбук' во таа јужноазиска земја“, објави во понеделникот извршниот директор на „Алафабет“ (Alphabet), Сундар Пичаи, на социјалната мрежа X.
Овој потег ќе му помогне на „Гугл“ да ја зголеми својата понуда во Индија и поефикасно да се натпреварува со производителите на компјутери со оперативен систем Видноус, како што се „Дел“ (Dell Technologies) и „Асус“ (Asustek Computer). Ова исто така е уште една победа за стимулативниот план на премиерот Нарендра Моди од 2 милијарди долари, насочен кон поттик на технолошките гиганти да ја направат Индија своја производствена база.
Земјата со 1,4 милијарда жители го проширува својот сектор за производство на електроника бидејќи компаниите го диверзифицираат производството надвор од Кина во услови на зголемени тензии меѓу Вашингтон и Пекинг.
Производството во Индија ќе му помогне на „Гугл“ да одржува стабилно снабдување во земјата и да избегне какви било потенцијални ограничувања на увозот. Тенденцијата за уредите „хромбук“ е да имаат најниска цена на пазарот и мали профитни маржи, што ги прави ранливи на какви било тарифни мерки.
Њу Делхи ги олеснува планираните ограничувања за увоз на лаптопи, таблети и друг ИТ-хардвер, давајќи им на производителите повеќе време да се подготват за потенцијалните ограничувања, објави претходно „Блумберг“.
Лаптопите ќе се произведуваат во фабриката „Флекс“ (Flex Ltd.) во близината на Ченаи, во јужна Индија, каде што HP произведува лаптопи и десктоп-компјутери од 2020 година. Производството на „хромбук“ треба да започне на 2 октомври и главно е насочено кон образовниот сектор, се наведува во соопштението на HP.
.webp){kind=icon}