Блускај (Bluesky), децентрализираната социјална мрежа создадена од поранешниот извршен директор на Твитер (Twitter), Џек Дорси, го проширува пристапот до својата апликација до сите заинтересирани корисници, напуштајќи го системот само со покани што мрежата го користеше за регулирање на растот во изминатата година.
Социјалната мрежа беше отворена за јавноста минатиот февруари и сега има три милиони корисници, но Блускај дозволи пристап до нови корисници само преку код за покана за да се осигури дека технологијата што ја поддржува мрежата може нормално да се справи со сообраќајот.
„Друг клучен аспект на Блускај, познат како ’федерација’, исто така доаѓа кон крајот на февруари“, рече Џеј Грабер, извршен директор на Блускај. Федерацијата е централна во мисијата на Блускај и секому ќе му овозможи да создаде своја социјална мрежа користејќи го технолошкиот протокол на платформата. Овие различни мрежи ќе бидат интероперабилни, а корисниците на едната мрежа ќе можат да гледаат објави од луѓе од другата или да скокаат од мрежа на мрежа, додека со себе ги носат својот профил и следбениците. Секоја мрежа исто така би можела слободно да поставува свои правила за говор и да создава алгоритми за да одреди каква содржина гледаат корисниците.
Џек Дорси
Bloomberg
Идејата за Блускај настана кога Дорси сè уште беше на Твитер (сега наречен X) и беше претставена како начин да им се овозможи на корисниците нов вид на социјална мрежа што не е контролирана од ниту една корпорација или ентитет. Првичната идеја беше Блускај да создаде протокол за социјално вмрежување на кој потоа ќе се приклучи Твитер, дозволувајќи им на луѓето да го пренесат својот твитер-профил, како и објавите, на други мрежи што исто така претходно го усвоиле протоколот.
„Блускај создаде протокол што го нарече AT-протокол и исто така создаде своја апликација за социјално вмрежување за да докаже дека идејата може да функционира“, рече Грабер. „Почнавме да ја правиме апликацијата подоцна, а потоа навистина беше наменета да биде главен пример за тоа што можеме да направиме со овој вид отворен протокол“, рече тој. „Оттогаш изградивме заедница околу неа и вложивме многу напор да го направиме навистина добар простор за луѓето“.
Таа заедница се наметна како една од главните замени за X, особено за оние корисници што се фрустрирани од новиот сопственик - Илон Маск. Дорси го напушти Твитер кон крајот на 2021 година, и додека напорите на Блускај продолжија преку форма на самостоен ентитет, не е познато дали X некогаш ќе го усвои АТ-протоколот како што некогаш замислуваше Дорси. Тој инаку е член на Управниот одбор на Блускај.
.webp){kind=icon}
