Организациите низ светот со ентузијазам користат и инвестираат во генеративна вештачка интелигенција (ГенВИ). Но кои региони и земји водат во нејзината употреба? Според резултатите од глобалната студија подготвена за САС од страна на „Колман паркс“ (Coleman Parkes), Кина води во користењето на генеративната вештачка интелигенција, додека САД предничат во целосната имплементација на оваа технологија.
Кинеските носители на деловни одлуки известуваат дека 83 проценти од нивните организации користат ГенВИ, повеќе од Обединетото Кралство (70 проценти), САД (65 проценти) и Австралија (63 проценти). Сепак, американските организации се понапред во однос на зрелоста и целосната имплементација на технологиите ГенВИ со 24 отсто, во споредба со 19 отсто во Кина и 11 отсто во Велика Британија.
Што значи ова во однос на глобалното економско влијание на вештачката интелигенција и ГенВИ? Во извештајот од 2023 година „Мекинзи“ процени дека ГенВИ може да додаде еквивалент од 2,6 до 4,4 трилиони долари годишно преку различни промени, споредливи со целиот БДП на Обединетото Кралство во 2021 година. Ова го зголемува целокупното влијание на вештачката интелигенција за 15 до 40 проценти.
САС
Разлики меѓу регионите
Со оглед на овие економски импликации, САС и „Колман паркс“ целеа на1.600 носители на одлуки од различни индустрии, вклучувајќи ги банкарството, осигурувањето, јавниот сектор, животните науки, здравството, телекомуникациите, производството, трговијата на мало, енергијата и комуналните и професионалните услуги. Најмалите организации што учествувале во истражувањето вработуваат меѓу 500 и 999 луѓе, додека најголемите вработуваат повеќе од 10.000 .
Различни региони покажаа различни стапки на имплементација на политиките за користење ГенВИ. Северна Америка е водечки регион со 20 проценти целосна употреба и стапка на имплементација на ГенВИ, следуваат Азија-Пацифик со 10 проценти и Латинска Америка со осум проценти, додека Европа е кон дното со седум проценти. Во Азија-Пацифик 71 процент од организациите ги имплементирале политиките на ГенВИ, додека во Северна Америка процентот е 63. Европа бележи 59 отсто, а Латинска Америка 52 отсто. Кога станува збор за наменските буџети за инвестирање во ГенВИ во следната финансиска година, Азија-Пацифик води со 94 отсто, по што следуваат Европа со 91 отсто, Северна Америка со 89 отсто и Латинска Америка со 84 отсто.
„Додека Кина води во стапките на усвојување ГенВИ, поголемото усвојување не мора да значи ефикасна имплементација или подобри приноси“, рече Стивен Со, управен директор во „Колман паркс“. „Всушност, САД водат во трката со 24 отсто организации што целосно спроведуваат ГенВИ во споредба со 19 отсто во Кина“.
Индустриите ја прифаќаат ГенВИ со различни стапки
Податоците покажуваат дека банкарството (17 проценти), телекомуникациите (15 проценти) и осигурувањето и професионалните услуги (11 проценти) водат во другите индустрии во однос на инкорпорирање на ГенВИ во секојдневните деловни операции преку различни метрики. Малопродажбата е со 10 проценти, додека јавниот сектор, на пример, е со девет проценти, како и здравството, а преработувачката индустрија е со седум проценти. Во секојдневната употреба на ГенВИ, телекомуникациите (29 проценти), малопродажбата (27 проценти) и банкарството (23 проценти) се водечки индустрии, по што следуваат личните услуги (23 проценти) и осигурувањето (22 проценти) со другите под 20 проценти. Во рамките на организациите, продажбата (86 проценти), маркетингот (85 проценти) и ИТ (81 проценти) најмногу користат или планираат да користат ГенВИ, а потоа следуваат финансиите и производството со 75 проценти.
„Со секоја нова технологија, организациите мора да поминат низ фаза на откривање, одвојувајќи ја возбудата од реалноста, за да ја разберат комплексноста на вистинската имплементација. Дојдовме до тој момент со генеративна вештачка интелигенција“, рече Брајан Харис, извршен потпретседател и директор во САС. „Како што излегуваме од циклусот на возбуда, сега станува збор за намерна имплементација и испорака на повторливи и сигурни деловни резултати благодарение на ГенВИ“.
![](/data/images/2024-07-18/66004_genai-user2_iff.jpg?t=1721304796)
Бариери за користење и имплементација
Прв на листата на предизвици со кои се соочуваат организациите при рутинската употреба на ГенВИ е недостигот од јасна стратегија за ГенВИ.
Само девет проценти од лидерите што учествуваа во истражувањето изјавија дека се исклучително запознаени со усвојувањето на ГенВИ во нивната организација. Меѓу испитаниците чии организации целосно имплементирале ГенВИ, само 25 проценти велат дека се исклучително запознаени со стратегијата за усвојување ГенВИ. Дури и носителите на одлуки одговорни за одлуките за инвестиции во технологијата не се запознаени со вештачката интелигенција, вклучувајќи ги и оние во организациите што се пред кривата на усвојување.
Девет од десет високотехнолошки носители на одлуки признаваат дека не ги разбираат целосно ГенВИ и нејзиното потенцијално влијание врз деловните процеси.. Но само 36 отсто од главните технолошки службеници велат дека се целосно свесни за тоа.
И покрај овој недостиг од разбирање, повеќето организации (75 проценти) велат дека буџетирале за инвестиции во ГенВИ во следната финансиска година.
Другите предизвици вклучуваат недостиг од податоци за дотерување големи јазични модели и недостиг од соодветни алатки за успешна имплементација на интерфејсот. Организациските ИТ-лидери се најмногу загрижени за приватноста (76 проценти) и безбедноста на податоците (75 проценти). Само една десеттина од организациите велат дека се целосно подготвени да се усогласат со претстојните прописи за вештачка интелигенција.
Во исто време некои што рано ја усвоиле веќе гледаат значителни придобивки: 89 проценти пријавуваат подобрено искуство и задоволство на вработените, а 82 проценти пријавуваат заштеда на оперативните трошоци и поголемо задржување на клиентите.