Накратко од светот - Трамп му се закани на Зеленски, сега ѝ подава рака на Кина

Доналд Трамп го нарече украинскиот лидер „диктатор“ и го обвини за злоупотреба на американската помош. Трамп, исто така, рече дека постои шанса за склучување нов трговски договор со Кина. „Епл“ (Apple) го претстави новиот паметен телефон наречен „ајфон 16е“ (iPhone 16e), а фјучерсите на европските акции утрово се тргуваат главно во минус.

 

ПОЛИТИКА

Трамп го нарече Зеленски „диктатор“

Американскиот претседател го нарече украинскиот водач Володимир Зеленски „диктатор“, а истовремено го зголемува притисокот врз Киев да ги прифати условите од договорот за завршување на војната, за што САД преговараат со Русија. Трамп го обвини Зеленски за злоупотреба на американската помош и посочи дека Украина е виновна за тековниот конфликт.

Можен трговски договор со Кина

Трамп подоцна зборуваше за Кина, наведувајќи дека е можен нов трговски договор со таа азиска земја. „Има малку конкуренција, но односот што го имам со претседателот Шји е, би рекол, одличен“, истакна Трамп. Тој воведе царини од 10 отсто на стоките од таа земја, што повторно ја разгоре трговската војна меѓу најголемите светски економии. Кина одговори со царини за низа американски производи и најави истрага против „Гугл“.

„Епл“ го претстави „ајфон 16е“

На корпоративен план, „Епл“ го претстави новиот паметен телефон наречен „ајфон 16е“, со цена од 599 долари, во обид да ја зголеми продажбата по слабата сезона на одмори. Ребрендираниот уред ќе биде пуштен во продажба од 28 февруари и ќе чини 170 долари повеќе од „ајфон СЕ“ (iPhone SE). „Епл“ го модернизира уредот со отстранување на копчето хоум (Home) и додавање поголем дисплеј од 6,1 инчи, со фејс ај-ди (Face ID). Моделот има камера од 48 мегапиксели, ист чип A18 како и „ајфон 16“ и порта за полнење УСБ-Ц.

БЕРЗИ

Европа

Фјучерсите на европските акции утрово се тргуваат главно во минус, пред објавувањето на податоците за довербата на потрошувачите во еврозоната. За потсетување, европските берзи го затворија тргувањето со загуби во средата, додека инвеститорите продолжуваат да ги анализираат корпоративните приходи и повисоката инфлација во Велика Британија.

САД

Во минус се тргуваат и американските индексни фјучерси, додека доларот ослабе во однос на кошницата меѓународни валути. Во меѓувреме, записниците од состанокот на Фед покажаа дека креаторите на политиката нема да брзаат со дополнително намалување на каматните стапки. Имено, во јануари официјалните лица изразија подготвеност да ги задржат каматните стапки на стабилно ниво, поради постојаната инфлација и неизвесната економска политика.

Азија

Кога станува збор за акциите во азиско-пацифичкиот регион, тие исто така се тргуваат со загуби. Технолошкиот берзански индекс Han Seng падна за цели 3,6 отсто, откако претходно се искачи на највисокото ниво во последните три години.

 

НАФТА

Нафтата се стабилизира по серијата мали добивки. Брентот се тргуваше под 76 долари за барел по тридневен раст, додека ВТИ (West Texas Intermediate) беше околу 72 долара. Американскиот институт за нафта извести за 3,3 милиони барели зголемување на комерцијалните резерви во САД минатата недела, што треба да биде потврдено со официјалните податоци доцна в четврток.

Bloomberg