Инстаграм воведува нови поставки со кои родителите ќе ја следат активноста на децата

Инстаграм (Instagram) ги менува стандардните поставки за приватност за многу тинејџери во САД, како дел од напорите за нивна поголема безбедност и давање поголема контрола на родителите над тоа како нивните деца се однесуваат онлајн.

Новите поставки ќе направат профилите на тинејџерите да бидат приватни по автоматизам, ќе го ограничат бројот на луѓе на кои тие можат да им испраќаат приватни пораки и ќе ги стават тинејџерите во „најрестриктивната“ категорија кога станува збор за прегледување чувствителна содржина. Тоа значи дека апликацијата ќе ги блокира тинејџерите од гледање чувствителни фотографии и видеа, вклучувајќи објави што покажуваат тепачки или одредени козметички процедури.

Овие порестриктивни поставки автоматски ќе се активираат за сите корисници на платформата под 18 години, соопшти компанијата во вторникот, иако 16 и 17-годишниците ќе можат сами да ги променат. Ако помлад тинејџер се обиде да ги избегне новите ограничувања преку промена на својот роденден во услугата, „Мета“ (Meta) изјави дека ќе користи вештачка интелигенција за да се обиде „проактивно да ги најде тие тинејџери и да ги постави“ во порестриктивни профили.

Ограничувањата за тинејџерите под 16 години можат да се олеснат ако родителот даде дозвола преку својот профил на Инстаграм.

Овие значајни промени доаѓаат по години критики дека Инстаграм, кој е во сопственост на „Мета“, матичната компанија на Фејсбук (Facebook), не успеа адекватно да ги заштити младите онлајн. Минатата година „Мета“ беше тужена од група од повеќе од 30 држави, кои тврдеа дека апликациите на компанијата им штетат на младите, а извршниот директор Марк Закерберг се појави на сослушување во Конгресот годинава на тема безбедноста на децата, каде што „Мета“ беше критикувана за овозможување експлоатација на деца. Закерберг се бори на суд за да избегне лична одговорност за наводните штети.

Во 2021 година свиркач од Фејсбук излезе во јавноста со стотици страници од внатрешни документи на „Мета“, вклучувајќи ги и истражувањата на компанијата што покажаа дека Инстаграм негативно влијае врз менталното здравје на некои девојчиња.

Bloomberg

Шефот на Инстаграм, Адам Мосери, изјави дека новите политики и ограничувања биле во изработка речиси цела година и дека не биле дизајнирани за да им угодат на, како што рече, гневните законодавци. „Искрено, не се направени за ниту еден од нив“, истакна тој. „Мојата надеж е дека ќе бидат добро примени од родителите и од тинејџерите, затоа што се направени токму за нив“.

Новите поставки на профилите претставуваат најагресивен напор на компанијата досега за заштита на помладите корисници. Тинејџерите ќе можат да примаат пораки само од луѓе што веќе ги следат или со кои веќе се поврзани и ќе можат да бидат означени или спомнати само од корисници што ги следат. Тинејџерите исто така ќе добиваат нотификација за да ја напуштат апликацијата по 60-минутно користење секој ден.

Родителите исто така ќе можат да видат со кои профили нивните деца разменуваат пораки, но нема да можат да ја читаат содржината на пораките.

Мосери изјави дека идејата зад зголемените ограничувања е слична на планот што „Мета“ го имаше за „Инстаграм јут“ (Instagram Youth), предлог за верзија на апликацијата за деца под 13 години. Тој план беше откажан во 2021 година, а Мосери рече дека нема да заживее.

Можно е овие нови „Тин акаунти“ (Teen Accounts),, како што ги нарекува „Мета“, да се прошират и до други апликации на компанијата, вклучувајќи го и Фејсбук. „Подобро е да се почне со една апликација, да се научи и да се усоврши, па потоа брзо да се примени и на остатокот од семејството на апликации“, рече Мосери.

Новите ограничувања ќе бидат достапни за сите корисници под 18 години во САД, Велика Британија, Канада и Австралија во наредните 60 дена, а „Мета“ планира да ги воведе во остатокот од Европската Унија подоцна годинава. Тие ќе бидат воведени глобално од почетокот на 2025 година.

Во моментов нема коментари за веста. Биди прв да коментира...

Остави коментар