Хелсинки ќе користи необичен извор на енергија за да ги загрева домовите, ладна вода од дното на Балтичкото море.
Главниот град на Финска се приклучува кон европската трка за пронаоѓање нови извори на енергија, со цел намалување на зависноста од увозно фосилно гориво, така што се насочува кон нов карбонски неутрален систем на греење. Градската енергетска компанија, „Helen Oy“ ќе се здружи со шпанскиот конгломерат „Acciona SA“, што се занимава со инфраструктура и обновливи извори на енергија, како и со локалната компанија „YIT Oyj“, со цел заеднички да го изградат тунелот за извлекување вода од длабокото морско дно, каде што температурите на водата се константни. Системот за преработка на водата преку подземни топлотни пумпи може да снабдува со топлинска енергија дури 40 проценти од градот.
За сега поголемиот дел од домовите во Хелсинки имаат систем на централно греење, кој што во голема мера се потпира на јаглен и природен гас за производство на електрична и топлинска енергија. Минатата година фосилните горива учествуваа со повеќе од 75 проценти во вкупното производство на топлинска енергија во овој град.
Прочитај повеќе
Унгарија во ноември стартува со програма за енергетска ефикасност на фабриките
Државата ќе субвенционира 30, односно 45 отсто од инвестициите зависно од локацијата на фабриките
22.10.2022
ЕУ одвојува уште 40 милијарди евра за справување со енергетската криза
ЕУ ќе ги земе парите од заедничката сметка а ќе се користат за помош на луѓе и компании погодени од кризата
18.10.2022
Проектот за користење морска вода би требало да одигра клучна улога во транзицијата кон обновлива енергија и на тој начин ќе се исполни поставената цел на овој град до 2030 година да постигне карбонска неутралност. Тоа претставува предизвик за Хелсинки, каде што климата е ладна и побарувачката за греење е голема. Компанијата „Helen Oy“ ќе користи нуклеарна и обновлива енергија за струјата што ќе ги движи топлотните пумпи на системот.
Depositphotos
Проектот е вреден околу 400 милиони евра и моментално е во фаза на развој, која ќе трае околу 2 години, а потоа за изградба на системот ќе бидат потребни уште 5 години, пред електраната од 500 мегавати да биде подготвена за користење. Иако веќе има неколку помали градови, кои се потпираат на сличен систем со комбинација на морска вода и топлотни пумпи, како Џуно на Алјаска и Драмен во Норвешка, сепак Хелсинки ќе го има најголемиот таков објект во светот, изјави Фернандо Вара, раководител на проекти за тунели и железница од компанијата „Acciona“.
„Тоа е единствениот проект кој се развива во многу деликатен момент“, рече Вара во едно интервју. Руската инвазија врз Украина и одлуката за намалување на испораките на природен гас, донесена како одговор на санкциите што ги воведе Западот кон Русија, доведоа до нагло зголемување на цените на фосилните горива во Европа, со што се отвори врата за можно продолжување на енергетската криза во Европската Унија (ЕУ).
Меѓутоа, морската вода која ќе го напојува системот во Хелсинки, ќе биде неограничена и бесплатна, рече Вара. За да се изгради системот, неговата компанија ќе користи машини за пробивање на 17 километри долг подводен тунел во Балтичкото море, во кои ќе се чува водата на постојана температура од 2 Целзиусови степени, дури и во текот на ладните месеци, кога површината на морето замрзнува.
„Потоа, подземните топлотни пумпи ќе ја преработуваат водата, а нив „Helen“ планира да ги изгради на локацијата на една од своите електрани на јаглен“, изјави Јако Титанен, проектен менаџер на оваа компанија. Таа електрана секако би требало да се затвори во 2024 година.
„Водата која што ќе се користи подоцна ќе биде вратена преку друг тунел долг 9 километри. Собраната енергија потоа ќе поминува низ топлотна пумпа, достигнувајќи температура од 80 до 95 степени, после што ќе може да стане дел од системот за затоплување“, изјави Титанен.
„Температурите што ги користат топлотните пумпи се на слично ниво како температурата во постоечките геотермални системи, но масата на протокот на вода е многу поголем во однос на обемот, дотолку што слично ниво не може да се постигне дури ни во големите геотермални системи“, додаде Титанен.
Во текот не летото топлотните пумпи исто така може да се користат за складирање енергија од ладната морска вода за системот за централно ладење во градот.
„Изградбата на оваа електрана е многу моќен проект, кој потенцијално би можел да се прошири“, рече Вара од компанијата „Acciona“, кој смета дека би можело да дојде време кога целиот град ќе се грее на морска вода.
.webp){kind=icon}