Триесет отсто од професионалците ја испробале вештачката интелигенција на ChatGPT

Некои рани корисници веќе експериментираат со програмата за вештачка интелигенција ChatGPT во своите канцеларии. За неколку секунди, консултантите добиваат корисни белешки, а софтверските инженери го дебагираат кодот.

Околу 30 отсто од речиси 4.500 професионалци анкетирани овој месец од „Фишбоу“ (Fishbowl), социјална платформа во сопственост на сајтот за рецензии и рејтинг на работодавци „Гласдор“ (Glassdoor), велат дека тие веќе го користеле ChatGPT на „Опен еј-ај“ (OpenAI) или друга програма за вештачка интелигенција во својата работа. Испитаниците вклучуваат работници во „Амазон“ (Amazon), Банката на Америка (Bank of America), „ЏП Морган“ (JPMorgan), „Гугл“ (Google), „Твитер“ (Twitter) и „Мета“ (Meta). Четботот користи генеративна вештачка интелигенција и само за неколку секунди одговара на поставените прашања со елоквентност на начитан човек, но бидејќи се базира на информации јавно достапни на интернет, книги и Википедија, одговорите не се секогаш точни.

Иако ChatGPT „вжешти“ одредени делови на интернетот кога беше лансиран за јавна употреба во ноември, свеста за него сè уште се филтрира во пошироката јавност. Експертите предвидуваат дека овој вид на вештачка интелигенција ќе биде револуционерен: ChatGPT ќе стане „калкулатор за пишување“, вели еден врвен економист од универзитетот „Стенфорд“. „Мајкрософт“ е во преговори со „Опен еј-ај“ за инвестирање до 10 милијарди долари. Софтверскиот гигант исто така има намера да го интегрира GPT, јазичниот модел што лежи во основата на ChatGPT, во неговите нашироко користени програми „Тимс“ (Teams) и „Офис“ (Office). Ако се случи тоа, технологијата за вештачка интелигенција може многу лесно да навлезе во мејнстримот.

Професионалците за маркетинг се особено заинтересирани да ја тестираат алатката: 37 отсто рекле дека користеле вештачка интелигенција на работа. Работниците во сферата на технологијата не заостануваат многу зад нив, со 35 отсто. Следуваат консултантите со 30 отсто. Многумина ја користат технологијата за да подготвуваат е-пошта, да генерираат идеи, да пишуваат и да решаваат делови од код и да ги сумираат белешките од истражувања или состаноци.

Извршните директори го користат ChatGPT за да разработат идеи и да ги состават своите електронски пораки. „Секој што не го користи ова, наскоро ќе биде во сериозно неповолна положба. И тоа наскоро. Многу, многу наскоро“, вели Џеф Маџионкалда, извршен директор на онлајн платформата за учење „Корсера“ (Coursera), за Си-ен-ен. „Размислувам за мојата когнитивна способност со оваа алатка. За разлика од претходно, таа е многу повисока, а и мојата ефикасност и продуктивност се многу повисоки“.

Брзината и разновидноста на алатката заслепија многу корисници. „Го открив ChatGPT пред околу еден месец“, објави на „Фишбоу“ лице што се идентификува себеси како главен извршен директор. „Го користам секој ден. Тоа ми го промени животот. И мојот кадровски план за 2023 година“.

Некои дури се потпираат на него како на бастун: еден нововработен продукт-менаџер во финтек-фирма побарал совети на „Фишбоу“, велејќи дека е „100 отсто изгубен“ во својата нова улога. „Лажирај додека не успееш, слично како на интервјуто за работа. Потоа, кога си во дилема за нешто, едноставно прашај го ChatGPT“, гласи одговорот.

Среде возбудата, истражувачите се огласија со ноти за претпазливост.

Додека голем дел од анксиозноста се концентрираше на тоа што значи ChatGPT за образованието - а јавните училишта во Њујорк ја забранија неговата употреба  - експертите велат дека компаниите треба порано да размислат за своите политики за новата алатка. Ако не го сторат тоа, тие ризикуваат некои од замките што може да произлезат од ChatGPT и другите модели на вештачка интелигенција, како фактички грешки, прекршување авторски права и протекување чувствителни информации за компанијата.

Оваа технологија е тука да остане и најверојатно ќе стане сè поприсутна. Веќе постојат многу програми помогнати од вештачка интелигенција, а со подготовките на „Опен еј-ај“ да го претстави API или интерфејсот за програмирање, бројот на специјализирани апликации изградени на алатката ќе се зголемува.

Додека некои професионалци не се импресионирани од практичноста на употребата и квалитетот на резултатите, други се убедени дека идејата за замена на работниците со технологија може да се оствари само за неколку години. „Ако ChatGPT почне да прави слајдови, јас сум готов“, напиша еден вработен во „Делојт“ (Deloitte). („Извини брат… Тоа веќе постои“, напишаа двајца други.)