Во рамките на европската кампања „Виарплеј“ (#WeArePlay) за иновации што имаат корисно влијание врз околината, „Гугл плеј“ (Google Play) одбра три македонски стартапи чии апликации се дел од неговата понуда. Станува збор за „Челинџер“ (Challenger) на компанијата „Грин ај-ти“ (GreenIT), „Еркеар“ (AirCare) и „Сноубол гејмс“ (SnowballGames).
#WeArePlayEurope | Google Play Console
Целта на кампањата на „Гугл“ е да ги промовира и да ги стави во центарот на вниманието европските бизниси што создаваат влијателни апликации и игри, истакнувајќи ги иновативните лидери на таа сцена од секоја земја, а се присутни на платформата „Гугл плеј“.
„Еркеар“ (AirCare)
Коосновачи на компанијата, која инаку има четворица вработени, се Горјан Јовановски и Драган Гелевски, а нивната апликација „Мој воздух“ е преземена од над 300.000 корисници на „Гугл плеј“.
Нивната приказна започнува низ нивната шега за тоа дека во студените зимски ноќи во Македонија мирисот на воздухот е многу лош, но подоцна сфаќаат дека тоа е поради лошиот квалитет на амбиенталниот воздух. Искористувајќи ги своите технички вештини и знаења за кодирање, ја создале апликацијата што ќе ви го покаже квалитетот на воздухот каде и да сте. „Еркеар“ доби и глобална награда од Обединетите нации.
Како што велат креаторите, нивната цел е да продолжат да ги едуцираат луѓето, а нивната апликација се користи како кампања за почист воздух.
„Ние не сакаме само да информираме туку сакаме да едуцираме и поттикнеме. Наша цел е да им кажеме на луѓето за квалитетот на воздухот, да им помогнеме да разберат дека тоа не е само лош мирис или кашлица, тоа е вистински проблем“, велат креаторите на апликацијата.
Горјан Јовановски и Драган Гелевски, основачи на „Еркеар“ (AirСare) / Приватна архива
Во врска со тоа што се одбрани од „Гугл плеј“ за промоција на најуспешните стартапи, кои имаат приказна зад себе и апликации што се однесуваат на подобрување на некој сегмент од општеството, велат дека клучно е тие апликации да имаат некакво влијание на околината, добра приказна и соодветен квалитетен тим зад себе.
„Ние сме една од трите компании одбрани од Македонија. Дефинитивно, тоа прво значи претставување на најдоброто од секоја земја секаде во светот. Кампањата на ‘Гугл’ не застанува тука, наскоро ќе продолжи и со издавање печатена книга со промоција на овие одбрани стартапи, а следната недела за истата цел ќе се одржи и конференција во Амстердам. Тоа, секако, ќе ни ја зголеми популарноста и ќе ни го отвори патот до нови пазари“, вели Горјан Јовановски.
„Еркеар“ (AirCare) е дел од тримесечна акцелераторска програма на „Техстарс“ (Techstars), која е глобална мрежа на акцелератори.
„Ние сме дел од акцелераторот во Берлин, каде што досега биле само неколку стартапи од Македонија, а во моментов се одбрани вкупно 12 од целиот свет. Работиме на тоа да го смениме процесот на работа за да не мери само аерозагадување туку да е фокусиран општо на секакви мерења на планетата, од температура, пожари, поплави, до урагани. Целта е да станеме централен хаб за информации за животната средина, кои ќе бидат од корист и за луѓето и за компаниите и соодветните институции“, вели Јовановски.
„Челинџер“ (Challenger)
Оваа апликација, која е под капата на компанијата „Грин ај-ти“ (GreenIT), според информациите на „Гугл плеј“ е преземена над 10.800 пати. Фирмата има петмина вработени, а коосновачи се Стефан Алексиќ, Олга Рајчиќ, Симон Јаневски, Митко Орцев и Теодора Чизбаноска-Калошева.
Нивната апликација ги наградува луѓето со поени секогаш кога користат одржлив транспорт. Тие поени може да се користат за попусти кај локални бизниси. Иновативниот тим планира во целата приказна да воведе рециклирање, исхрана и други здрави активности. Тие исто така почнаа да соработуваат со хуманитарна организација за деца, па вклучените компании донираат пари за секој испешачен километар на нивните вработени што ја презеле апликацијата или за секој километар минат возејќи велосипед.
„Луѓето се вклучуваат, ни даваат повратни информации и создадовме вистинска заедница. Тоа е неверојатно чувство и одлично за мотивација“, велат креаторите на оваа апликација.
Приватна архива
„Ние сме неверојатно горди што нашата апликација ‘Челинџер’ е дел од кампањата #WeArePlay на ‘Гугл плеј’. Ова признание не само што го става ‘Челинџер’ на мапата туку и го привлекува меѓународното внимание на растечката стартап-сцена во Македонија. Тоа е доказ за капацитетот на нашата земја за иновации, а преку кампањата испраќаме порака до светот дека имаме што да понудиме и сме подготвени за раст и инвестиции.“, вели коосновачката Олга Рајчиќ.
Креаторите на оваа апликација се надеваат дека ова признание ќе ја зголеми нивната препознатливост, а со тоа ќе добијат нови клиенти и корисници, како локално така и во регионот. Тие се надеваат и дека ова достигнување ќе инспирира повеќе млади луѓе од земјава да ги искористат технологијата и креативноста за да изградат подобра иднина.
„Сакаме нашите корисници и деловни корпоративни партнери да ни се придружат во градењето подобра заедница. ‘Челинџер’ е повеќе од само апликација, тоа е платформа за создавање општество каде што граѓаните и корпорациите ќе можат да работат заедно кон заедничка цел - почиста и поздрава животна средина“, вели Рајчиќ.
Откако доби значајно признание во 2019 година, кога победија на регионалниот натпревар за зелени идеи, „Грин ај-ти“ постојано ја надградува својата апликација. Тимот моментално работи на воведување дополнителни функционалности во апликацијата и овој пат има цел да ги мотивира компаниите да бидат активен дел од промената заедно со своите вработени.
„Сноубол гејмс“ (SnowballGames)
Основач е Љупчо Кошчицовски, компанијата има петмина вработени, а нивната апликација е преземена од речиси 1,6 милион корисници.
Во образложението од „Гугл плеј“ пишува дека Љупчо отсекогаш сакал игри со табла и карти, особено оние со незгодни математички елементи. Во 2019 година тој го претвора своето хоби во професија, лансирајќи ја „Сноубол гејмс“. Неговото студио зема класични стари игри и ги приспособува за онлајн играчите. Неговиот најпопуларен наслов е „Јетци ултимејт“ (Yatzy Ultimate). Креаторот планира да издаде игра со карти за да ги едуцира децата за здравата исхрана, како и серија инспирирана од античките игри, особено од Египет.
„’Гугл плеј’ ни дава пристап до широка публика. За некој од мала земја, да се има овој широк дофат е од суштинско значење за дистрибуцијата и на крајот за успехот на играта“, посочува Кошчицовски.
Љупчо Кошчицовски, основач на „Сноубол гејмс“ (SnowballGames) / Приватна архива
Тој во разговор за „Блумберг Адрија“ вели дека за него и за „Сноубол“ претставува особена чест да бидат препознаени од „Гугл“ како една од идните успешни развојни компании.
„Позитивно се изненадив и при првиот контакт и во моментот кога ме известија дека нашата приказна ќе биде дел од оваа кампања, која ги препознава малите самостојни компании како вистинска срцевина на пазарот за мобилни апликации и игри“, вели тој.
Според него, ова е едно охрабрување за сета работа во последните четири години, особено во периодот на карантини и несигурност, кога се случила и обновата на „Сноубол“ како вистинско инди гејминг-студио, кое не само што прави игри туку и ги издава и промовира самостојно.
„Нашите планови се поделени на краток рок и долг рок. На краток рок, оваа година ќе започнеме со градење нов тим, кој ќе работи на развој на нова (casual) игра. На долг рок, во иднина, се надевам дека ќе направиме доволно простор за да имаме поголема финансиска слобода преку која ќе може навистина да започнеме со експериментални механики и игри кои ќе нè доведат до една различна гејминг-околина. WeArePlay ни ја дава таа шанса за да успееме со развој на следните проекти“, вели основачот Љупчо Кошчицовски.
.webp){kind=icon}
