ЕУ блиску до договор за регулација на вештачката интелигенција

Европската Унија е блиску до договор што треба да прерасне во најсеопфатно регулирање на вештачката интелигенција (ВИ) во западниот свет. Преговарачите се согласија на збир на контролни мерки врз алатките за генеративна вештачка интелигенција, како што се ЧетГПТ на „Опен еј-ај“ (OpenAI Inc.) и Бард на „Гугл“ (Google) - кои се способни за продукција на содржина по команда, велат упатени извори.  

Делегатите на Европската комисија, Европскиот парламент и 27 земји-членки постигнаа компромис на состанокот што започна во средата попладне и се одолжува со часови, со што групата се приближи до формален договор за поширока легислатива, позната како Акт за вештачка интелигенција (AI Act), нагласија изворите, кои побараа да бидат анонимни бидејќи разговорите не се јавни.

Договорот означува клучен чекор во политиката за вештачката интелигенција, која - во отсуство на каква било значајна акција од американскиот Конгрес - ќе ги постави рамките за регулирање на алатките за вештачка интелигенција во развиениот свет. Тој чин би ја направил ЕУ првата влада надвор од Азија што ставила цврсти заштитни огради во однос на технологијата.

Креаторите на политиките со месеци работеа на финализирање на јазичната структура во Актот за вештачка интелигенција и негово усвојување пред европските избори во јуни и пред воспоставувањето нова комисија и парламент што би можеле да принудат повеќе промени и да ги запрат напорите.

Европската комисија не одговори на барањето за коментар испратено надвор од редовното работно време.

Опсежните дискусии до доцна во ноќта нагласуваат колку стана спорна дебатата за регулирање на вештачката интелигенција, што ги подели светските лидери и технолошките директори, додека и натаму цвета популарноста на генеративните алатки. ЕУ - како и другите влади, вклучувајќи ги и САД и Обединетото Кралство - се бореше да најде рамнотежа помеѓу потребата да ги заштити сопствените стартапи за вештачка интелигенција, како што се француски „Мистрал“ (Mistral AI) и германски „Алеф алфа“ (Aleph Alpha), од потенцијалните општествени ризици.

Тоа се покажа како клучна точка на запирање во преговорите, при што некои земји, вклучувајќи ги и Франција и Германија, се спротивставија на правилата за кои тие рекоа дека непотребно би ги попречиле локалните компании. Официјалните лица биле сè поуверени дека договорот ќе биде постигнат рано во четвртокот, иако техничките детали од актот ќе треба дополнително да се прецизираат во серија последователни состаноци.

Креаторите на политиките на ЕУ предложија план што ќе бара од развивачите на модели на вештачка интелигенција што ги поткрепуваат алатките како што е ЧетГПТ да одржуваат информации за тоа како се обучуваат нивните модели, да го сумираат користениот материјал заштитен со авторски права и да ја означат содржината генерирана од вештачка интелигенција. Системите што претставуваат „системски ризици“ ќе мора да соработуваат со комисијата преку индустриски кодекс на однесување. Тие исто така ќе мора да следат и да известуваат за какви било инциденти со моделите.

Во моментов нема коментари за веста. Биди прв да коментира...

Остави коментар