Повлечени над 230 милиони евра депозити од банките

Граѓаните коишто традиционално се најзначајниот депонент во македонскиот банкарски систем (со учество од 67,1 проценти во вкупните депозити на 31 март 2022 година), во првото тримесечје од 2022 година, ги намалија своите средства во банките за 3,9 милијарди денари (63 милиони евра) или за 1,3 проценти, покажуваат податоците на Народната банка. 

„Од друга страна, на годишна основа, средствата на домаќинствата депонирани во банките и понатаму бележат раст, но побавен во споредба со последниот квартал од 2021 година. Енергетската криза и започнувањето на воениот конфликт во Украина имаа негативно влијание и врз однесувањето на нефинансиските друштва, коишто во првиот квартал од 2022 година ги намалија своите депозити за 10,6 милијарди денари (173 милиони евра), или 7,5 проценти, а извесно забавување се забележува и кај нивната годишна стапка на раст (4,7 проценти) во однос на крајот на 2021 година (кога изнесуваше 11,8 проценти)“, се вели во новиот извештај на Народната банка за ризиците во банкарскиот сектор во првиот квартал од 2022 година.

Од Народната банка објаснуваат дека покрај наведените фактори, намалувањето на корпоративните депозити во првиот квартал од 2022 година е под влијание и на вообичаените сезонски фактори, коешто најчесто се одразува преку променливи и претежно надолни движења на депозитите за трансакциски цели.

„Пролонгираната неизвесност под влијание на силни надворешни шокови во изминатите две години предизвика извесни промени на валутната и рочната склоност на депонентите за чување на нивните средства во банките, видливи преку растот на депозитите во девизи и на многу кратки рокови. Така, од аспект на валутата, кварталниот пад на депозитната база во целост произлезе од денарските депозити, коишто во првиот квартал од 2022 година се намалија за 18,7 милијарди денари(305 милиони евра), или 7,3 проценти. Притоа, намалувањето на денарските депозити најмногу произлегува од намалувањето на депозитите по видување, со речиси подеднаков придонес на овие депозити од двата сектора (домаќинствата и нефинансиските друштва)“, укажуваат од Народната банка.

Од друга страна, девизните депозити забележаа квартално зголемување од 4,6 милијарди денари (75 милиони евра), или за 2,2 проценти, што е забавување во однос на растот од претходниот квартал (7,3 проценти).

„Притоа, кварталниот раст на девизните депозити најмногу произлегува од зголемувањето на депозитите по видување, и тоа во целост како резултат на зголемувањето на овие депозити кај секторот „домаќинства“. Следствено на ваквите движења, се намали учеството на денарските депозити во вкупната депозитна база, коешто на крајот на првиот квартал од 2022 година изнесува 52,6 проценти (55 проценти на 31.12.2021 година), додека уделот на девизните депозити се зголеми до нивото од 47,3 проценти (44,8 проценти на 31.12.2021 година)“, информираат од Народната банка.  

Оттаму дополнуваат дека согласно со забележаната зголемена склоност на штедење во странска валута, придружени со неосновани шпекулации за стабилноста.на денарот, Народната банка презела целни мерки, односно направи промени во задолжителната резерва, како реакција на ваквите тенденции.