Показателите за профитабилноста на банкарскиот систем забележаа подобрување во првите три месеци од 2022 година, што е резултат на остварената повисока добивка, во споредба со истиот период од претходната година.
Податоците на Народната банка покажуваат дека банкарскиот систем во првите три месеци од годинава оствари добивка од работењето во износ од 2,6 милијарди денари (42,6 милиони евра) којашто во споредба со претходната година кога добивката изнесувала 32,2 милиони евра е поголема за 32,6 проценти, или за околу 10 милиони евра.
Во новиот извештај за ризиците во банкарското работење во првиот квартал од годинава се вели дека повисоката добивка на банкарскиот систем произлегува од пониските нето-трошоци за исправка на вредноста и растот на нето некаматните (нетоприходите од провизии и другите редовни приходи) и нето каматните приходи.
„Поголемата добивка произлезе од помалите трошоци за исправка на вредноста (за 42,8 проценти), од растот на нето каматните приходи (за 7,1 проценти) и нето-приходите од провизии и надоместоци (за 7,9 проценти), како и од зголемувањето на другите редовни приходи (за 30 проценти). Единствено оперативните трошоци имаа негативен ефект врз растот на добивката. Тие се зголемија за 11,6 проценти. Анализирано по одделна банка, една средна и една мала банка забележаа загуба од работењето, додека останатите единаесет банки остварија позитивен финансиски резултат. Оперативните трошоци на банките забележаа раст, со што негативно придонесоа кон годишниот раст на профитабилноста на банкарскиот сектор. Зголемувањето на овие трошоци е најмногу последица на повисоките трошоци за плати и зголемените општи и административни трошоци на банките“, пишува во извештајот.
Се укажува дека во првиот квартал од 2022 година, продолжи трендот на намалување на активните и пасивните каматни стапки на банките. Каматниот распон помеѓу пондерираната просечна каматна стапка на вкупните кредити и депозити на годишна основа забележа минимално намалување.
На 31.3.2022 година, бројот на банките во Република Северна Македонија e непроменет во однос на претходниот квартал и изнесува тринаесет банки. Девет банки се во претежна странска сопственост, од кои пет се подружници на странски банки.
Банките во претежна странска сопственост и натаму имаат најголемо учество во структурата на поважните позиции од билансите на банкарскиот систем. Промените во споредба со претходниот квартал се минимални. И понатаму, најизразено е учеството на банките во странска сопственост во вкупните кредити на нефинансискиот сектор (81,8 проценти).
.webp){kind=icon}
