Знаете ли што се дивидендни аристократи?

Тековниот нестабилен пазар без јасна насока не може да се опише со термини како биковски или мечкин пазар, но наместо тоа се повеќе и повеќе аналитичари го користат терминот кенгурски пазар. Во вакво опкружување, фокусот природно се префрла од акциите со „раст“, ​​чии вреднувања се засноваат на очекувањата за идните приходи, на акции со солидни фундаменти, особено оние кои редовно исплаќаат дивиденди. Компаниите кои со децении исплаќаат и ги зголемуваат дивидендите на своите акционери се здобиваат со статус на дивидендни аристократи, а таквите компании не само што се извор на принос, туку и знак на отпорност и сигурност.

Иако американскиот пазар е историски синоним за раст, во сегашното макроекономско опкружување предвидливоста на тој раст се намалува. Во исто време, САД никогаш не биле познати како извор на високи дивидендни приноси. Од другата страна на Атлантикот, европските двидендни аристократи во моментов изгледаат значително попривлечни и поради поповолните вреднувања и пазарната позиција, за кои веќе пишувавме,  и поради потенцијалот за стабилен извор на приход преку дивиденди. За инвеститорите кои бараат стабилност во турбулентни времиња, европските дивидендни аристократи се чини дека нудат интересен сооднос на приносот и стабилноста. Меѓу тие компании издвојуваме една што ни е интересна.

„Бритиш Американ Тобако“

„Бритиш Американ Тобако“ (British American Tobacco - BAT), еден од глобалните лидери во тутунската индустрија, се наметнува како одбранбена позиција за инвеститорите во неизвесни времиња. Стабилните парични текови, високиот дивиденден принос и отпорноста на деловниот модел на турбуленции на пазарот го прават посакувана позиција во портфолиото. Компанијата со децении успешно работи во високо регулирано опкружување, што и дава дополнителна предност сега кога се интензивираат геополитичките тензии и разговорите за нови царини. Отпорноста на компанијата се одразува и на пазарот, каде акциите на БАТ одржуваат стабилност од февруари, кога почнаа посериозните разговори за царините.

Она што особено привлекува внимание кај БАТ е фактот што компанијата во последните 25 години не го намалува износот на исплатената дивиденда, туку континуирано го зголемува. Заедно со таа импресивна историја на исплати, БАТ во моментов нуди дивиденден принос од околу 8,5 проценти, ставајќи го далеку над глобалните индекси на дивидендни аристократи. Токму оваа комбинација на долгорочна стабилност и дарежлив дивиденден принос ја прави оваа компанија особено привлечна за инвеститорите кои бараат сигурен извор на приход во нестабилни времиња. Сепак, дали тој принос е одржлив на долг рок?

Може ли „Бритиш Американ Тобако“ да го одржи овој дивиденден принос на долг рок?

Ниту еден производител на цигари не е имун на ризиците кои ги носи падот на потрошувачката на тутунски производи. „Бритиш Американ Тобако“ е свесен за тоа и активно го проширува своето портфолио надвор од класичните цигари, инвестирајќи во таканаречените нови категории. Тој сегмент вклучува електронски цигари, загреани тутунски производи и никотински торбички и моментално претставува околу 20 проценти од приходите на компанијата. Во 2024 година, БАТ исплати дивиденда што изнесуваше околу две третини од готовинскиот тек, во согласност со соодносот за исплата во однос на приспособената заработка (66 проценти). Ова е одржливо ниво на исплата, што сè уште не укажува на ризик за инвеститорите ориентирани кон дивиденди. Но, како што ќе продолжува падот на обемот на цигарите, останува клучната дилема: до кога поскапувањето на цигарите ќе успее да го компензира намалувањето на потрошувачката? Затоа, менаџментот интензивно развива нови категории, со цел тие да сочинуваат повеќе од 50 проценти од вкупните приходи до 2030 година. Инвеститорите засега не треба да се грижат за дивидендата. БАТ сè уште има простор и време за транзиција. Во меѓувреме, со стабилни парични текови и речиси загарантирана побарувачка за основните тутунски производи, компанијата обезбедува солидна заштита од турбуленции на пазарот. Сепак, ова не е акција за купување и заборавање, туку бара активно следење на регулаторните и потрошувачките трендови на индустријата.

 

 

Во моментов нема коментари за веста. Биди прв да коментира...

Остави коментар