Претставниците на американските Федерални резерви (Фед) ги задржаа каматните стапки непроменети трет последователен состанок и забележаа дека гледаат растечки ризик и од повисока инфлација и од зголемување на невработеноста. Официјалните лица едногласно гласаа за задржување на референтната каматна стапка во опсег од 4,25 до 4,5 проценти, колку што всушност е од декември. Индексот S&P 500 на американските акции и приносите од државни обврзници паднаа по објавувањето на одлуката, додека доларот ги намали претходните добивки.
Добро утро, јас сум Мирјана Јовеска, а следуваат петте важни вести за почетокот од овој ден.
Зошто „Крка“ е предводник на дивидендните аристократи во регионот?
Пишувавме за глобалните дивидендни аристократи, но има компании и во регионот што може да се класифицираат во таа категорија. Меѓу регионалните индекси, словенечкиот SBITOP има највисок дивиденден принос, околу 6 проценти, што го прави особено привлечен за инвеститорите фокусирани на пасивен приход. Речиси сите компании од SBITOP имаат солидна дивидендна политика, поради што е тешко да се издвои само една. Сепак, кога зборуваме за конзистентноста, стабилноста на работењето и долгорочната практика на исплата на дивиденда, „Крка“ се наметнува како природен избор. Во контекст на регионалните дивидендни аристократи, „Крка“ е веројатно најблискиот пример за таа дефиниција. Анализираме што ја прави „Крка“ дивиденден аристократ.
Инфлацијата во Македонија во април достигна 2,6 проценти
Индексот на трошоците на животот во април 2025 година во однос на април 2024 година бележи зголемување од 2,6 проценти, а индексот на цените на мало бележи зголемување од 2,7 проценти, соопшти Државниот завод за статистика.
Инфлацијата мерена преку индексот на трошоците на животот во април 2025 година во однос на март 2025 година изнесува 0,6 проценти. Цените на мало во април 2025 година во однос на март 2025 година се зголемиле за 1,6 проценти.
Додека чекаме од Грција, плаќаме најскап гас во Европа
Договорот за изградба на македонскиот дел од гасоводниот интерконектор Македонија-Грција беше потпишан вчера во Скопје. Изведбата ќе ја реализира домашната компанија „Рапид билд“, а трасата за изградба ќе биде предадена веднаш по потпишувањето на договорот. На потпишувањето на договорот за стратегискиот проект за енергетската иднина на земјата и регионот присуствуваа претставници на грчкиот партнер – ДЕСФА.
Интерконекторот, во должина од 68 километри на територијата на Македонија, ќе овозможи транспорт на природен гас и водород, придонесувајќи кон енергетска безбедност, намалување на загадувањето и забрзување на транзицијата кон зелени извори на енергија. Проектот, чија проценета вредност изнесува над 5,1 милијарди денари (околу 83 милиони евра), ќе се реализира со поддршка од ЕУ, ЕИБ и ЕБОР, преку грантови, техничка помош и поволни заеми.
На плажа во Грција или по патот на Инките - каде на одмор годинава?
Анализирајќи ги понудите за одмор на повеќе туристички агенции во земјава, заклучокот е дека има аранжмани за речиси сечиј џеб: почнувајќи од еднонеделен одмор во Грција во раното лето за 90 евра по лице со вклучен автобуски превоз и сместување во двокреветни или трикреветни соби, преку кратки или подолги опции за крстосувење, до луксузни долги одмори на егзотични локации или необични патувања низ светот.
Ако веќе изборот не е сопствена режија, што доколку сте вешти во планирањето и имате време за тоа може да го направи одморот значително поевтин, тогаш важно е да се знае дека опциите за одмор се толку широки што некои од агенциите дури и креираат индивидуална понуда според буџетот на клиентите. Освен тоа, секогаш може да заштедите доколку направите резервација преку агенциите многу порано, опција што може да ја намали цената за речиси третина.
„Опен еј-ај“ ќе им помага на државите во развој на вештачката интелигенција
Компанијата предводник во сферата на вештачката интелигенција (ВИ), „Опен еј-ај“ (OpenAI), започна нова иницијатива за да им помогне на други земји да изградат обемна инфраструктура за примена и ширење на новата технологија, зголемувајќи ја иницијативата што започна со проектот „Старгејт“ (Stargate) за поставување центри за податоци со вештачка интелигенција во САД.
Според новата програма, која започна во средата, креаторот на ЧетГПТ (ChatGPT) ќе соработува со национални влади за активности како што е изградба на капацитети за центри за податоци. Компанијата исто така ќе им помага на земјите да ги приспособат производите на „Опен еј-ај“ за специфични јазици и локални потреби, како дел од напорите за она што извршниот директор Сем Алтман го нарекува „комерцијална дипломатија“.
.webp){kind=icon}
