Пазарите можеби штотуку го преживеаја последното од најагресивните зголемувања на стапките во последните четири децении. Но малкумина на Волстрит слават.
Ако зголемувањето на четвртина процент во средата го означи врвот на циклусот на монетарно затегнување во САД, како што сугерираат шансите на пазарот, изгледите за ризичните средства изгледаат мрачно. Тоа е во остар контраст со претходните седум циклуси на затегнување, каде што последното покачување речиси секогаш предизвикуваше раст на акциите и поризичните кредити. Единствениот исклучок се случи на крајот на ерата на „дот ком“ (dot-com) во 2000 година, кога почнаа да се зголемуваат рецесиските притисоци во економијата. Она што е различно сега е тоа што трговците со свопови очекуваат дека следниот потег на Федералните резерви (ФЕД) нема да биде продолжена пауза, туку, наместо тоа, намалување на стапката, можеби уште веднаш во јули.
Ваквиот пресврт кон полесна политика сугерира рецесија што ќе ја приклешти централната банка. Во таа мешаница додајте ги потонатите акции на регионалните банки во САД и прогнозите за млаки профити и ќе добиете мрачни изгледи. Дури и ако САД успеат да избегнат пад, стратезите на „Голдман Сакс“ (Goldman Sachs Group Inc.) и на „Морган Стенли“ (Morgan Stanley) тешко може да замислат што ќе ги зголеми цените на акциите.
Технолошкиот индекс Nasdaq 100 порасна за 21 отсто оваа година и се тргува со околу 25 пати поголема заработка. Зголемени се и високоризичните корпоративни кредити за 3,9 проценти.
„Историски гледано, она што би можеле да го направите е да го купите последното покачување, бидејќи вообичаено оттаму го гледате растот на пазарот. Но сега има инфлација, која е сè уште висока, и сте загрижени за банкарскиот систем. Затоа мислиме дека овој пат исходот ќе биде сосема поинаков“, рече Надија Ловел, висок стратег за капитал во „УБС глобал велт менаџмент“ (UBS Global Wealth Management).
Bloomberg Mercury
Стратезите на најголемите банки на Волстрит се слично песимисти:
- „Морган Стенли“ предвидува дека индексот S&P 500 ќе се намали на 3.900 бода до крајот на годината бидејќи економијата забавува
- „Голдман Сакс“ не гледа добивки кај американските акции по паузата во втората половина годинава, прогнозирајќи дека индексот S&P 500 ќе ја заврши годината на 4.000 бода.
- Стратезите од Банката на Америка (Bank of America Corp.) ги повикуваат инвеститорите да го продадат последното зголемување на каматите и прогнозираат дека индексот S&P 500 ќе ја заокружи годината на 4.000 бода.
За многу ризични средства веќе е проценет пресвртот во политиката на ФЕД, но не е пресметана и економската штета што може да дојде заедно со таквиот пресврт.
„Пазарите обично го одредуваат намалувањето на цените пред да се случи рецесијата, но често има лажни сигнали и моменталните падови на цените изгледаат премногу големо“, рече Кристијан Милер-Глисман, раководител за истражување на распределба на средства во „Голдман Сакс“.
Сепак, лесно е да се разбере зошто некои инвеститори останаа оптимисти. Американските акции пораснаа по завршувањето на шест од минатите седум циклуси на зголемување на стапките и остварија просечен принос од 13 проценти во текот на следните шест месеци.
„Слабите перформанси по последното покачување, кога кривата е превртена, честопати се предизвикани од наглото забавување на растот и заработката. Сметаме дека тие ризици постојат денес“, рече Ендрју Шитс, главен стратег за вкрстени средства во „Морган Стенли“.
Но инфлацијата останува тврдоглаво висока и тоа ќе го притисне профитот.
„Имаме речиси три намалувања на каматните стапки за втората половина, а во исто време нашите прогнози укажуваат на повисока вкупна инфлација и полеплива базична инфлација во втората половина годинава. Ова е дилема што практично е нерешлива, едно од нив многу веројатно ќе се покаже како погрешно“, рече Макс Кетнер, главен стратег за повеќе средства во ХСБЦ (HSBC).
Во меѓувреме се зголемуваат очекувањата за нагло намалување на стапките. Своп-договорите поврзани со датумите на состаноци на ФЕД паѓаат бидејќи пазарите проценуваат намалувања од околу 70 базични поени до крајот на годината.
„Не можеме да видиме дека ФЕД ќе ги намали стапките во отсуство на значително забавување на американската економија. Нешто мора да се жртвува“, рече Јохана Киркланд, главна инвестициска директорка во „Шродер инвестмент“ (Schroder Investment Management Ltd), која е слабо позиционирана кон американските акции.
.webp){kind=icon}
