Никола Саркози е првиот француски претседател што отиде в затвор

Никола Саркози во вторникот наутро влезе во затворот „Призон де ла Санте“, со што се заокружи неговиот драматичен пад — првпат во историјата на Републиката поранешен претседател оди во затвор.

Саркози го напушти својот дом држејќи се за рака со сопругата Карла Бруни, мавтајќи кон насобраните граѓани додека се качуваше во црн автомобил. Француските телевизиски екипи го следеа цело време, а неговото „Рено“ подоцна помина низ белата врата на озлогласениот париски затвор, која се затвори зад него.

Малку е веројатно дека ќе ја отслужи целосната петгодишна казна, а еден од неговите адвокати изјави дека веќе е поднесено барање за ослободување, кое ќе биде разгледано на суд за околу еден месец.

Адвокатот Кристоф Ингрен веднаш откако автомобилот на Саркози влезе во „Ла Санте“ изјави дека поранешниот француски претседател „нема никакви поплаки“. „Не побара ништо, ниту посебен третман,“ додаде Ингрен. „Стои достоинствено.“

Од безбедносни причини, Саркози ќе биде сместен во самостојна ќелија — ќе му биде дозволено еден час дневно физичка активност на отворено, сам во ограден двор, рече Ингрен. Освен три дозволени посети неделно од семејството и средби со неговиот правен тим, нема да има контакт со никого освен со затворските чувари.

Претходно, Саркози за списанието „Ле Фигаро“ изјави дека за да го мине времето ќе ги понесе двата тома на „Грофот од Монте Кристо“ од Александар Дима и биографија за Исус од Жан-Кристијан Петифис. Додаде дека планира да напише книга.

Затворањето на Саркози доаѓа во време на продолжена политичка нестабилност во Франција, откако претседателот Емануел Макрон минатата година распиша предвремени избори кои доведоа до длабоко поделен парламент. Оттогаш се смениja четири влади, а последната, предводена од премиерот Себастијан Лекорну, е на кревки основи и покрај тоа што преживеа гласање за недоверба минатата недела.

Саркози беше осуден на 25 септември поради тоа што неговите соработници наводно барале изборно финансирање од режимот на либискиот лидер Моамер Гадафи. Тој постојано ги негираше обвинувањата. Парискиот суд отфрли низа обвиненија, вклучувајќи и корупција, но го осуди Саркози за формирање криминална завера како одговор на понудата од покојниот Гадафи за финансирање на неговата претседателска кампања во 2007 година.

Во вторникот, Саркози повторно ја изрази својата невиност преку објава на социјалните мрежи:

„Додека се подготвувам да го преминам ѕидот на затворот „Санте“, моите мисли се насочени кон Французите од сите слоеви и убедувања,“ напиша Саркози. „Сакам да им кажам со непоколеблива сила дека не е поранешен претседател на републиката што се затвора, туку невин човек.“

Во Франција, подемот и падот на Саркози е тема на големи дебати. Тој ги освои гласачите и ја доби претседателската функција во 2007 година, носејќи нов политички јазик со нагласена строгост кон законот и имиграцијата.

Но, брзо потоа беше критикуван за прославата на победата со директори и ѕвезди од шоу-бизнисот, како и за краткиот одмор на јахтата на милијардерот Винсент Болоре. Пет години подоцна, длабоко непопуларен, Саркози ја загуби реизборната трка во услови на рекорден јавен долг и растечка невработеност.

Овој викенд, неколку дена пред затворањето на Саркози, Макрон се сретна со поранешниот француски претседател.

„Секогаш сум бил многу јасен во моите јавни изјави за независноста на судството,“ рече Макрон во понеделникот, за време на патувањето во Словенија. „Но, беше сосема природно, на човечко ниво, да угостам еден од моите претходници.“