Вкупните средства на останатите финансиски институции (ОФИ), во вториот квартал на 2023 година изнесуваат 196,8 милијарди денари (3,2 милијарди евра) денари и се зголемени за 8,9 милијарди денари (145 милиони евра), на квартално ниво, покажуваат податоците на Народната банка. Останатите финансиски институции учествуваат со 19,3 проценти во средствата на финансиските институции.
Од аспект на потсекторите, пензиските фондови имаат најголем удел во вкупните средства на ОФИ од 65,4 проценти, а по нив следуваат осигурителните друштва со учество од 17,3 проценти.
„Во вториот квартал на годината, вкупните средства на останатите финансиски институции (ОФИ), остварија квартален раст од 4,8 проценти, главно под влијание на повисоките средства на пензиските фондови, при помал позитивен придонес и на останатите потсектори, со исклучок на друштвата за управување со пензиските и инвестициските фондови, коишто забележаа пад на средствата“, соопшти Народната банка.
Во останатите финансиски институции се вклучени: инвестициските фондови, пензиските фондови, осигурителните друштва, друштвата за управување со инвестициските фондови и друштвата за управување со пензиските фондови, финансиските друштва и друштвата даватели на финансиски лизинг.
Годишниот раст од 16,1 проценти во најголем дел произлегува од зголемените средства на пензиските фондови, а позитивни движења се остварени и кај останатите потсектори.
Каде се вложуваат парите?
Најголем дел од средствата на ОФИ се вложувања во должнички и сопственички хартии од вредност (учество од 51,2 проценти и 24,9 проценти, соодветно), а на страната на обврските, најголем дел се однесува на технички резерви на осигурување и капитални сметки (учество од 56,6 проценти и 33,7 проценти, соодветно).
Анализирано по инструменти, на страната на средствата, кварталниот и годишниот раст во најголем дел се должи на повисоките вложувања во должнички и сопственички хартии од вредност, како и пласманите во кредити. На страната на обврските, растот на квартално и годишно ниво во најголем дел е одраз на порастот на техничките резерви на осигурување и капиталните сметки, а во помала мера и од обврските врз основа на кредити.
Какви се резултатите по сектори?
Кварталната и годишната стапка на раст на вкупните средства на пензиските фондови (задолжителни и доброволни) во вториот квартал на годината, изнесува 4,7 и 16,9 проценти, соодветно, што главно е одраз на повисоките вложувања во должнички од вредност, при дополнителен позитивен придонес и на вложувањата во сопственички хартии од вредност. На страната на обврските, кварталниот и годишниот раст се објаснуваат со зголемените технички резерви на осигурување и капитални сметки.
Вкупните средства на осигурителните друштва на крајот на јуни, забележаа квартално зголемување од 4,6 проценти, што во најголем дел е резултат на зголемените технички резерви на осигурување, останатите побарувања и вложувањата во должнички хартии од вредност, а во помал дел и на повисоките инвестирања во сопственички хартии од вредност. Годишниот раст од 8,3 проценти пред сѐ произлегува од зголемените инвестирања во должнички хартии од вредност, а позитивен придонес имаа и вложувањата во сопственички хартии од вредност и останатите побарувања. На страната на обврските, кварталното и годишното зголемување во најголем дел се одраз на зголемените технички резерви на осигурување, при позитивно влијание и на капиталните сметки и останатите обврски.
Во вториот квартал на годината, вкупните средства на инвестициските фондови бележат квартален и годишен раст од 1,8 и 13,6 проценти, соодветно, во најголем дел под влијание на зголемените инвестирања во сопственички и должнички хартии од вредност, во услови на пад на валутите и депозитите. На страната на обврските, кварталниот раст е предводен од зголемените капитални сметки, коишто во целост придонесуваат и за растот на годишно ниво. Вкупните средства на финансиските друштва остварија месечно и годишно зголемување од 6,3 и 29,5 проценти, соодветно. Кредитите на овој потсектор како главен инструмент на страната на средствата, на крајот на јуни достигнаа 8,6 милијарди денари (140 милиони евра).
„Кредитната активност на финансиските друштва е зголемена за 5,9 проценти на квартална основа и 22,6 проценти на годишна основа. На страната на обврските, кварталниот и годишниот раст се должат на повисоките капитални сметки, останатите обврски и обврските врз основа на кредити“, информираат од Народната банка.
Во вториот квартал на 2023 година, кварталната и годишната стапка на раст на вкупните средства на друштвата даватели на финансиски лизинг изнесуваат 10,4 и 28 проценти, соодветно. Најголемиот дел од средствата на овој потсектор се побарувањата врз основа на кредити, во износ од 7,3 милијарди денари (119 милиони евра). Кредитирањето е зголемено за 13,2 проценти споредено на квартално ниво, при годишен раст од 31,7 проценти. На страната на обврските, кварталниот и годишниот раст пред сѐ се објаснуваат со зголемените обврски врз основа на кредити, а во помал дел и од останатите обврски.
Вкупните средства на друштвата за управување со пензиски и инвестициски фондови, на крајот на јуни, бележат квартален пад од 3,3 проценти, во најголем дел под влијание на намалените валути и депозити, а помал пад е остварен и кај вложувањата во сопственички хартии од вредност.
„Сепак, во однос на јуни минатата година, средствата на овој потсектор се зголемија за 9,9 проценти, главно како резултат на зголемените вложувања во должнички хартии од вредност, а во помала мера и на останатите побарувања и сопственичките хартии од вредност, во услови на пад на валутите и депозитите“, велат од Народната банка.
На страната на обврските, падот на квартална основа пред сѐ е одраз на намалените останати обврски, во услови на раст на капиталните сметки. Годишниот раст е предводен од повисоките капитални сметки, а позитивно влијание имаат и останатите обврски.
.webp){kind=icon}
Во моментов нема коментари за веста. Биди прв да коментира...