Македонските девизни резерви ќе се инвестираат во странски инвестициски фондови

Народната банка во иднина да може да ги инвестира средствата од девизните резерви во странски инвестициски фондови. Ова е една од новините предвидени во предлог-законот за измени на Законот за Народната банка, кој е веќе влезен во собраниска процедура.  Прашавме во Народната банка што ќе донесат законските измени.

„Со предложените измени се овозможува стекнување удели во странски инвестициски фондови, коишто претставуваат вложувања во средства застапени во одредени индекси на должнички хартии од вредност, зелени обврзници, злато, валути и други високоликвидни финансиски инструменти со ниско ниво на ризик коишто се веќе прифатени како дозволени инструменти за пласмани на девизните резерви, а коишто се стручно и професионално водени од меѓународни финансиски институции и странски финансиски друштва специјализирани за управување со имот“, велат од Народната банка. 

Оттаму објаснуваат дека со предложените законски измени не е одреден обемот на вложувања во инвестициските фондови, туку тоа ќе се регулира со подзаконската регулатива (политика и правила за управување и инвестирање на девизните резерви). 

„Одредувањето на оптималниот износ на инвестиции во странски инвестициски фондови во најголема мера ќе биде приспособено на инвестициските цели и ниската склоност кон преземање ризик, притоа водејќи сметка за целите при управувањето и инвестирањето на девизните резерви: сигурност, ликвидност и профитабилност, по истиот редослед на приоритет“, посочуваат од Народната банка.  

Какви се критериумите за избор на фондовите?

На прашањето какви ќе бидат критериумите за избор на странски инвестициски фондови во кои би можеле да се инвестираат девизните резерви, од централната банка прецизираат дека стекнувањето удели во странски отворени инвестициски фондови ќе биде во согласност со прудентниот инвестициски пристап на Народната банка и високата одбивност за преземање финансиски ризици.

„Помеѓу критериумите за избор што ќе бидат земени предвид и дополнително ќе се утврдат во подзаконските акти секако ќе бидат: стручноста и кредитниот профил на управувачот на имот, инвестициската стратегија, пристапноста до инструментот, трошковната ефективност, историските перформанси, ликвидноста и правната рамка“, велат од НБРМ. 

Инаку, од Народната банка информираат дека заклучно со 31.1.2024 година нивото на девизни резерви изнесува 4,34 милијарди евра.

„Најголем дел од средствата (2,44 милијарди евра или 56,4 проценти) е инвестиран во најбезбедни хартии од вредност, односно најголем дел во државни обврзници издадени од земјите во еврозоната со највисок кредитен рејтинг, при што преостанатиот дел од инструментите вклучува валути и депозити (1,48 милијарди евра или 33,9 проценти), како и монетарно злато (416,41 милион евра или 9,6 проценти)“, велат од Народната банка

Кои инструменти носат најголем поврат на девизните резерви?

На прашањето кои инструменти досега носеле најголем поврат на девизните резерви, од Народната банка велат дека повратот на девизните резерви е определен од динамиката на приносите и каматните стапки на инструментите на финансиските пазари, што упатува на фактот дека во различни периоди поединечните класи на средства покажуваат различни остварувања.

„На долг рок, инвестирањето во хартии од вредност носи поповолни резултати, заради што и најголем дел од девизните резерви се инвестира во ваков тип инструменти“, објаснуваат од Народната банка.

Во однос на прашањето како се одлучува каде ќе се инвестираат девизните резерви и на колкав период се ревидира инвестициската политика, од Народната банка велат дека Законот за Народната банка и политиката за управување и инвестирање на девизните резерви ги дефинираат видовите на средства во кои може да се инвестираат девизните резерви и начините на управување со ризиците.

„Оперативните аспекти на управувањето вклучуваат дефинирање на структурата на инструменти во кои се инвестираат девизните резерви, при што оваа рамка се ревидира најмалку еднаш годишно и е во согласност со основните принципи за управување. Притоа, на континуирана основа се следат движењата на меѓународните пазари, при што инвестициската поставеност се приспособува во согласност со променетите пазарни услови и согледаните трендови“, укажуваат од Народната банка.

Какви други измени предвидува новата регулатива?

Предложените законски измени, меѓу другото, предвидуваат проширување на задачите на Народната банка со нови, кои не се опфатени во постојната законска регулатива. На Народната банка ѝ се доверува вршење активности за решавање на банки. Новото законско решение предвидува надлежност на Народната банка за спроведување подготвителни активности за решавање на банка, започнување на постапката на решавање и примена на инструментите и овластувањата за решавање на банка. Со измените на законот се предлага воведување извршен одбор како орган на управување на Народната банка, покрај гувернерот и Советот на Народната банка. Извршниот одбор ќе биде составен од гувернерот и тројцата вицегувернери и ќе преземе дел од овластувањата и задачите на гувернерот во делот на одлучувањето за издавање дозволи и согласности за финансиски институции и преземање мерки кон банки, штедилници и други финансиски институции што се предмет на супервизија на Народната банка.

„Дополнително, извршниот одбор ќе има овластување да презема макропрудентни мерки заради спроведување на макропрудентната политика, одлучување за започнување постапка на решавање на банка со проблеми во работењето, како и за примена на инструментите и овластувањата за решавање на банка“, се наведува во предлог-законот.

Во моментов нема коментари за веста. Биди прв да коментира...

Остави коментар