.webp){kind=icon}
На крајот на јуни 2023 година, официјалните девизни резерви изнесуваат 4,18 милијарди евра и во однос на претходниот месец бележат зголемување за 15 милиони евра, покажуваат новите податоци на Народната банка. Всушност, статистиката на централната банка открива дека тие се на рекордно високо ниво и дека се неколку пати зголемени во однос на почетокот на овој век.
Најголем дел од девизните резерви се пласирани во хартии од вредност (65,9 проценти), по што следуваат валутите и депозитите (24,9 проценти) и монетарното злато (9,2 проценти).
Приватните трансфери повисоки од очекувањата
Народната банка во последниот јунски извештај за макроекономските показатели соопшти дека анализата на показателите на адекватноста на девизните резерви покажува дека тие и понатаму се во сигурната зона.
„Во однос на последните расположливи податоци од надворешниот сектор, податоците за надворешнотрговската размена во април 2023 година засега упатуваат на понизок трговски дефицит од очекувањата за вториот квартал од годината според априлската проекција, но периодот на оцена е премногу кус за да можат да се изведат попрецизни заклучоци. Податоците за менувачкото работење заклучно со крајот на мај 2023 година укажуваат на можност за остварување нето-приливи од приватните трансфери коишто се повисоки од очекувањата за вториот квартал од 2023 година според априлската проекција“, соопшти Народната банка.
Оттаму додаваат дека остварувањата кај билансот на плаќања за првиот квартал од 2023 година упатуваат на суфицит во тековната сметка наспроти очекувањата за мал дефицит според априлската проекција, при истовремено остварување нето финансиски приливи пониски од очекуваните.
Раст на извозот, пад на увозот
Неодамна и Меѓународниот монетарен фонд укажа на позитивните текови во монетарната политика. Од фондот посочија дека Народната банка продолжила со неопходната нормализација на монетарната политика преку повисоки каматни стапки и други мерки, за да се осигури дека високата инфлација нема да се вкорени.
„Овие промени во политиката помогнаа да се стабилизираат инфлациските очекувања и придонесуваат за постепен пад на инфлацијата. Поважно, тие исто така обезбедуваат девизните резерви да останат соодветни, што е клучно за Северна Македонија“, соопшти ММФ.
Државниот завод за статистика неодамна објави дека вкупната вредност на извозот на стоки од во периодот јануари – мај 2023 година, изнесува 3,55 милијарди евра и бележи пораст од шест проценти во однос на истиот период од претходната година. Од друга страна, вредноста на увeзената стока, во истиот период, изнесува 4,60 милијарди евра, што е за 7,5 проценти помалку во споредба со истиот период од претходната година.
Иако, трговскиот дефицит, во периодот јануари – мај 2023 година изнесува 1,04 милијарди евра, Македонија по долго време бележи раст на извозот, а истовремено пад на увозот, што секако е позитивен знак за македонската економија.
