Цените на најпосакуваните модели на „Ролекс“ (Rolex), „Патек Филип“ (Patek Philippe) и „Одемар Пиге“ (Audemars Piguet) сè уште паѓаат, но имаат подобри резултати од акциите и криптовалутите, според „Морган Стенли“ (Morgan Stanley).
Луксузните часовници на секундарниот пазар минатата година се намалиле за 8 отсто според вредноста, покажува индексот составен од истражувачката платформа „Воч чартс“ (WatchCharts). Ова се споредува со падот од 19 отсто на берзанскиот индекс S&P 500 и падот од 65 отсто на биткоинот.
„Речиси сите класи на средства се намалени во текот на изминатите 18 месеци, но пазарот на половни часовници е всушност помалку паднат во споредба со другите“, велат аналитичарите на „Морган Стенли“.
Луксузните часовници сè уште се држат добро наспроти акциите и криптовалутите
Bloomberg
По невидениот наплив во 2021 година и првиот квартал од 2022-та, поттикнат од потрошувачите на готовина заглавени во своите домови за време на пандемијата и криптоинвеститорите кои сакаа да ги диверзифицираат своите добивки, цените за најбараните швајцарски часовници драстично паѓаат на секундарните пазари.
Преплавен пазар
Пазарот е преплавен со некогаш тешко достапни модели, како „ролекс дејтона“ (Rolex Daytona), „патек наутилус“ (Patek Nautilus) и „ројал оук“ (AP Royal Oak) додека дилерите на часовници и индивидуалните инвеститори ги симнуваат своите акции.
Бројот на ролекс часовници на секундарниот пазар се зголеми за 19 отсто само во четвртиот квартал, проценуваат „Морган Стенли“ и „Воч чартс“. Во цела 2022 година, понудата на часовници „Ролекс“, „Патек Филип“ и „Одемар Пиге“ се зголеми за 104, 110 и 78 отсто, соодветно.
Од „Морган Стенли“ посочуваат дека корекцијата на цените на трите големи бренда била најдлабока во четвртиот квартал кога „Одемар Пиге“ изгубил 6,8 отсто, „Патек Филип“ паднал за 6,7 отсто, а „Ролекс“ за 5,1 отсто првенствено поради загубите од моделите „дејтона“, „ГМТ мастер 2“ (GMT Master II) и „сабмаринер“ (Submariner).
Соборување на трендот
Сепак, часовниците направени од A.Lange & Sohne, германски производител на часовници во сопственост на „Рихемонт“ (Richemont) кој произведува врвни часовници во многу ограничени количини, доживеаја пораст од 1,7 отсто во четвртиот квартал.
Цените на секундарниот пазар на „ТАГ Хојер“ (TAG Heuer), бренд за поширока потрошувачка во сопственост на LVMH, и Tissot, уште еден популарен мас бренд во сопственост на „Своч груп“ (Swatch Group AG), се зголемија за 3,3 отсто и 3,2 отсто, соодветно во текот на кварталот.
.webp){kind=icon}
