На Џон Текстор му требале само 12 месеци за трансоформација од фанатичен фудбалски фан, со изгледани стотици натпревари годишно, во еден од најголемите инвеститори во овој спорт.
Тој се здобил со удели во тимови од Лондон до Рио де Жанеиро, градејќи фудбалска империја како бизнис со кој сака да ѝ се спротивстави на ултра-богатата елита во спортот. Ова е втор чин за Текстор, кој со децении ја „ковал“ својата репутација и богатство како инвеститор во дигитални технологии.
Преминувањето во сферата на фудбалот било брзо дури и според сегашниот стандард со кој Американците се ориентираат кон овој спорт. И тој сè уште не е готов, откако неодамна влезе во преговори за купување на францускиот тим од Лига 1, Олимпик Лион, што ќе биде неговиот најголем влог во играта досега. Ако се заврши проектот, фудбалската колекција на Текстор ќе има вредност од околу милијарда долари со вклучен долг.
„Мојот фудбалски план е да создадам екосистем на кооперативни клубови од највисоко ниво, кои ќе имаат корист од споделувањето на глобалниот систем за идентификација на таленти“, рече во интервју Текстор, кој се наоѓа во Флорида.
Патувањето на 56-годишникот како сопственик на фудбалски тимови започнало пред една година, кога го купил англискиот премиерлигаш Кристал Палас. Инвестициите во бразилскиот клуб Ботафого и белгискиот РВД Моленбик уследиле брзо потоа.
Овој повеќеклупски модел е фаворизиран и од други инвеститори со седиште во САД кои сакаат да ги намалат трошоците за сопственост во фудбалот. Тие веруваат дека со споделување на играчите низ тимовите, потребата за трошење милиони долари за скапи трансфери, плати и хонорари на агентите е во голема мера искоренета.
Текстор на овој пристап гледа како на „противотров“ за клубовите од рангот на Пари Сен Жермен, Манчестер Сити и Челзи, чии неодамнешни успеси беа финансирани од богати компании и милијардери.
„И Тед Ласо може да победи со ростерот на Манчестер Сити“, вели Текстор, мислејќи на фиктивниот тренер од популарната серија на Apple TV+. „Се надевам дека ќе покажам оти мора да се истражува за алтернативни пристапи кон конкурентноста во спортот“.
Bloomberg Mercury
Големи клубови
Критичарите на моделот со повеќе клубови велат дека тој создава тимови - „фарми“ со единствена цел да му служат на трофејниот предводник во групата. Но, Текстор беше храбар со изборот на клубови бидејќи малку е веројатно дека фановите на Кристал Палас и Лион би сакале да го гледаат својот тим како „втора виолина“.
Сосема спротивно: фановите ќе бараат инвестиции во тимовите и инфраструктурата за да се овозможи освојување на трофеи и квалификации за попрестижни и профитабилни натпреварувања.
Кристал Палас минатата сезона ја заврши со 45 поени зад шампионот Манчестер Сити. Тимот, кој нема освоено голем трофеј, ја започна својата актуелна кампања во Премиер Лигата минатата недела со пораз од 0-2 од Арсенал. Лион, кој е повеќе навикнат на успеси во домашното првенство, во последниве години e во сенка на ПСЖ, клуб поддржан од Катар, додека Ботафого бара враќање на славата по периодот на финансиски превирања.
„Ако изградиме контролирани, интегрирани врски меѓу земјите и клубовите, може да бидеме препознаени од играчите во подем, како одлична средина за развој, што ќе ни овозможи да потпишуваме играчи пред големите клубови да можат да ги купат“, објаснува Текстор. „За конкурентен успех и за нашиот бизнис развивањето играчи е подобро од тргувањето со играчи“.
Страст, профит
Како голем фудбалски фан, страста на Текстор за спортот е лесно забележлива, особено на социјалните мрежи. Како чест корисник на „Твитер“ тој во објава му се обрати на бразилски судија да си даде отказ откако досуди пенал против Ботафого, што е невообичаен потег за сопственик на клуб и се потсмеваше на ривалот на Лион, Олимпик Марсеј, шегувајќи се дека деветкратниот шампион е „мал клуб“.
За разлика од традиционалните европски сопственици на фудбалски клубови, американските инвеститори покажаа дека се повеќе фокусирани на генерирање поврат на капиталот во спортот и Текстор се обидува да го искористи своето искуство во дигиталната технологија за да најде нови начини за генерирање приходи од навивачите на неговите клубови.
„Фудбалот е во мрачни времиња кога станува збор за ангажманот на навивачите“, рече тој, додавајќи дека публиката е повредна од тимот.
Bloomberg Mercury
Спој на два интереса
Еден од највредните договори на Текстор беше спојувањето на стриминг платформата fuboTV Inc. во 2020 година, каде што некогаш беше извршен претседател, со Facebank Group, компанија што тој ја основа. Facebank е специјализирана за технологија за препознавање лица, за која Текстор вели дека може да се искористи за навивачите да се зближат повеќе со клубовите што ги поддржуваат и што е најважно, да се поттикне трошењето на реквизити.
Тој воведе систем за препознавање лица во Ботафого што поддржувачите можат да го користат за купување билети, влез на стадион и купувања на денот на натпреварот. Планот е истото да се понуди и во Кристал Палас, каде што Facebank веќе има спонзорски договор, а потоа да се вклучи и Лион.
Секако, деловното досие на Текстор не е без дамки. Пред десет години, Digital Domain Media Group Inc., група за визуелни ефекти што тој ја предводел, која креирала графика за филмови вклучувајќи го и „Титаник“, поднела барање за стечај. „Не изгубив пари од тој договор. Но, изгубив се друго што ми беше важно во тоа време“, вели тој.
Во однос на иднината, Текстор не ја отфрла можноста да инвестира и во други фудбалски клубови.
.webp){kind=icon}
