И покрај насловите за масовни отпуштања во технолошката индустрија, пазарот на трудот сè уште е жежок. Стареењето на населението и недостигот од имиграција значат дека конкуренцијата за работници ќе остане жестока.
Се разбира, платата е најважна за луѓето - но освен атрактивна плата, во сегашното опкружување компаниите треба да најдат нови начини за да се етаблираат како посакуван работодавец, велат експертите.
„На почетокот компаниите фрлаа пари кон проблемот: даваа бонуси поради задржување на работниците или корекции на платите. И тоа навистина даде одредени резултати“, вели Мелиса Свифт, раководителка на оддел во консултантската фирма „Мерсер“ (Mercer). „Но сега гледаме примена и на поинакви стратегии: што можете да направите за да ги задржите луѓето, а да не мора да се расфрлате со пари“.
Издвојуваме пет од најдобрите стратегии и придобивки што експертите велат дека ќе бидат важни во 2023 година. Совет: Бидете подготвени да направите малку повеќе од бесплатен ручек, намирување на патните трошоци и други „засладувачи“ што доминираа во текот на 2022 година.
1. Работа од далечина
Можноста да се работи од дома е на врвот на листата на приоритети за повеќето луѓе што претпочитаат работа од далечина. Истражувањата покажаа дека работата од далечина го подобрува ангажманот, го намалува трошењето и ја зголемува продуктивноста - и покрај тоа што многу шефови извонредно го ценат враќањето на вработените на нивните работни места.
„Очекувам преминот кон хибридна работа и работа од каде било да биде долгорочно приспособување, со оглед на тоа што флексибилноста им помага на компаниите да привлечат и задржат разновидни висококвалитетни таленти“, вели Притвирај Чудхури, професор на бизнис-школата „Харвард“. „Компаниите што нудат флексибилност ќе имаат најголема корист и предност, а оние што заостануваат ќе бидат принудени да фатат чекор за да го спречат одлевањето на таленти“.
2. Флексибилност
Ова е новиот магичен збор за регрутерите. И со добра причина: флексибилноста (или недостигот од неа) е постојано меѓу најголемите причини што вработените ги наведуваат за останување или напуштање на работата, според Кетрин Хартман, шефица на Одделот за работа, награди и кариера во консултантската фирма „Вилис тауерс Вотсон“ (Willis Towers Watson Plc). Сепак, работата од дома е само еден аспект од овој концепт. Тој се однесува на контрола врз вашиот распоред на поопшт начин.
„Дури и компаниите каде што работата продолжи од канцеларија направија некои значајни промени во начинот на кој размислуваат за флексибилноста“, вели Бен Гренџер, главен психолог во „Куалтрикс“ (Qualtrics). Некои сега им дозволуваат на родителите распределба на работното време во текот на денот, како на пример заминување попладне за да ги земат децата од училиште и потоа да се логираат подоцна.
3. Одржлива работа
Компаниите го редизајнираат начинот на работа за да овозможат проактивен одмор што ја спречува исцрпеноста наместо да реагираат откако ќе се случи таа, вели Кејтлин Дафи, истражувачка директорка во консултантската фирма „Гартнер“ (Gartner Inc.). Некои стратегии вклучуваат денови без состаноци, летни петоци, четиридневни недели, зголемување на времето за одмор, намалување на технолошкото преоптоварување, па дури и дневна дремка.
Оваа промена штотуку започна. „Мислам дека уште бараме одржлива стратегија за задржување - мислам дека ќе треба да се направи повеќе во поглед на секојдневното искуство на вработените“, појаснува Свифт.
Дали вработените се преоптоварени, дали менаџерите даваат поддршка? „Компаниите што ќе излезат како победници во оваа трка ќе бидат оние каде што за шест месеци отсега работната атмосфера навистина ќе изгледа поинаку“, додава таа.
4. Финансиско здравје
Со оглед на тоа што компензацијата не успева да држи чекор со зголемените трошоци, работниците бараат работодавци што ќе најдат други начини да ја ублажат болката од инфлацијата. Анализата на „Лајткест“ (Lightcast.io), компанија за аналитика на пазарот на трудот, откри дека една зголемена придобивка е помошта за школарина - понудена во околу 8 отсто од огласите за работа во 2022 година, за разлика од 7 отсто во 2021 година.
„Во минатото, кога луѓето размислуваа за финансиска благосостојба, дефинитивно беа фокусирани повеќе на пензионирањето и на долгорочното богатство“, вели Хартман. „Но, постојат и други начини на кои луѓето можат да имаат подобра финансиска благосостојба, како помош за грижа за стари лица или грижа за деца. Тој трошок што го покрива компанијата е начин да имате повеќе пари во вашиот џеб“.
5. Безбедност на работа
Иако пазарот на трудот останува силен, апликантите најверојатно ќе станат повнимателни како што се менуваат економските услови. Стартапите и технолошките компании се особено нестабилни, бидејќи завршува ерата на лесни пари и започнува нов бран на штедење.
„Во 2022 година, вработените беа казнети со таканаречен ’данок на лојалност’ кога остануваа кај својот работодавец наместо да заминат поради зголемување на платата на друго место“, вели Хартман. Оваа година, компаниите со репутација на стабилност дури и при предизвикувачки економски услови ќе бидат во подобра позиција да привлечат врвни таленти од блескавите нови стартапи што допрва треба да остварат профит.
„Сигурноста на работата ќе биде особено важна“, додава таа, при што апликантите ги проценуваат силата на раководството, деловните изгледи и финансиската отпорност.
.webp){kind=icon}
Во моментов нема коментари за веста. Биди прв да коментира...