.webp){kind=icon}
„Мајкрософт“, „Адоб“, „Нетфликс“ и „Голдман Сакс“ се меѓу растечката листа на компании кои се префрлаат од понуда на платено фиксно слободно време на вработените кон неограничен одмор. На работниците тоа може да им изгледа како сон. Таквите планови, исто така, можат да имаат придобивки за бизнисите, па дури и да им заштедат пари. Сепак, постојат потенцијални стапици и за вработените и за работодавците кои можат да го направат слободното време без ограничувања „премногу добра работа“.
1. Зошто една компанија би понудила неограничено слободно време?
Постојат неколку причини:
Регрутирање и задржување: Студијата на „Гласдор“ (Glassdoor) во 2022 година покажа дека прегледите на вработените на споменатите политики за неограничен личен одмор (PTO) се зголемени за 75 проценти од нивоата пред пандемијата - и биле убедливо позитивни.
Борба против исцрпеноста: Професионалците за човечки ресурси велат дека ваквата политика може да покаже доверба и да им покаже на работниците дека се ценети, што пак може да го подобри моралот и ангажманот.
Заштеда на пари: Компаниите не мора да го исплатат неискористеното време кога вработен ќе замине како што тоа би го правеле според традиционалните политики. Тоа значи и помала административна мака.
Извршна слобода: Ваквите политики се почести за извршните директори чии работни места бараат од нив да одговараат на повици и е-пошта дури и во слободни денови, работи што се во корист на компанијата. Исто така, генерално е во согласност со другите политики за извршните директори, како што е отсуството на обрската за прецизна евиденција на работно време.
2. Кои се лошите страни за работодавците?
Може да има контраефект: регрутерите сакаат неограничен одмор затоа што им помага да избегнат расправии околу времето за одмор во преговорите. Но, ако културата на компанијата го обесхрабрува да земе отсуство, вработениот може да се чувствува измамен.
Не е сребрен куршум: Иако неограничениот одмор е широко ценета придобивка, експертите за човечки ресурси велат дека тоа не е лек. За да намали исцрпеноста, можеби е потребна промена на работното место.
Потенцијална злоупотреба: Некои вработени се помалку одговорни од другите. Ако отсуството од работа стане проблем, вработениот може да ги оптоварува своите соработници и да ја попречи продуктивноста.
Преклопувачки одмори: Без ограничувања, одредени периоди од годината како летните и зимските одмори може да донесат многу испразнети канцеларии. Тоа може да ги остави оние што сè уште работат без доволно ресурси.
3. Што е со вработените?
Политиката не функционира со вработени на час и може да предизвика нееднаквост и недоследност бидејќи зависи од одобрението на менаџерот. Дополнително, истражувањето сугерира дека вработените честопати добиваат помалку слободно време според неограничените политики отколку традиционалните поради страв од пречекорување или губење на предноста од оние кои остануваат во канцеларијата. Тоа е особено точно во високо конкурентни индустрии како што е инвестициското банкарство. Некои луѓе се жалат дека политиките ги елиминираат упатствата за тоа колку навистина треба да земат одмор вработените.
4. Колку слободно време добиваат повеќето луѓе?
Се разбира, тоа се разликува по земја и индустрија. САД се единствената напредна економија без гарантирано платено отсуство. Во други како Франција, Германија и Обединетото Кралство работодавците имаат обврска да обезбедат одредена сума за платено отсуство. Истражувањето од 2021 година на Бирото за статистика на трудот на САД покажа дека американските работници од приватниот сектор добивале во просек 11 дена платен одмор по една година стаж, плус во просек седум платени боледувања.
Истражување од 2022 година покажа дека американските работници со неограничени денови и оние со фиксен износ завршуваат приближно исто толку годишно - 11 или 12 дена. Тоа забележително се разликува од резултатите од 2018 година, според кои на оние со неограничен одмор им требаа 13 дена, додека на оние со традиционални планови им беа потребни 15. Промените делумно се припишуваат на економските фактори и „неизвесностите создадени од глобалната пандемија“. За да се спротивстави на ризикот од слабеење на рамнотежата помеѓу работата и приватниот живот, некои работодавци кои нудат неограничен одмор поставија минимален услов за одмор од две недели секоја година.
5. Дали е тоа само мода?
Досега, неограниченото слободно време е сè уште релативно ретко. Само околу 6 проценти од работодавците го нудат тоа, според истражувањето за придобивките на вработените од 2022 година од страна на Друштвото за управување со човечки ресурси. Многумина, како „Мајкрософт“ и „Нетфликс“, се во технолошката индустрија, каде конкуренцијата за таленти може да биде жестока. Сепак, тоа е најпопуларната придобивка за американските работници, од кои 72 проценти се изјасниле позитивно за можноста за неограничен одмор, според извештајот на „Метлајф“ (MetLife) за 2019 година. Флексибилноста на работното место е на врвот на листата на приоритети на вработените во анкетата откако пандемијата на Ковид ја отвори вратата за далечинска и хибридна работа. Експертите за човечки ресурси велат дека флексибилноста, од работа на далечина до неограничен одмор веројатно ќе ги движи тремдовите во однос на придобивки кои ќе ги нудат работодавачите во различните индустрии во наредните години.
