text size
„Мајкрософт“ одлучи годинава да ги замрзне платите на сите работници со полно работно време за да се обиде да се справи со макроекономските тешкотии. Со овој потег, компанијата стана најновиот американски технолошки гигант што го стегна ременот во време на зголемена неизвесност.
Извршниот директор Сатја Надела го објасни овој потег во интерен меморандум како неопходен за да се генерираат „доволно средства“ за инвестирање во големото поместување кон вештачката интелигенција. „’Мајкрософт’ веќе ги зголеми платите во 2022 година“, додаде тој. Компанијата сепак ќе размисли за зголемување на платите за вработените што заработуваат по час, а истовремено ќе го задржи системот на бонуси и награди преку акции, но нема да има „прекумерно финансирање“, посочи Надела без да наведе детали.
„Како компанија препознаваме дека навигацијата низ динамичното економско опкружување и големите технолошки промени бараат од нас да донесеме клучни одлуки за тоа како инвестираме во нашите луѓе“, рече портпаролот на „Мајкрософт“. „Инсајдер“ прв јави за замрзнувањето на платите во средата.
Технолошките компании го намалија бројот на вработени и ги намалија трошоците низ светот за да ја надоместат слабата побарувачка на потрошувачите и да ги зајакнат финансиите пред потенцијална рецесија. Оваа година „Мајкрософт“ започна да отпушта илјадници работници, приклучувајќи им се на компании како „Мета“ и „Амазон“.
Софтверскиот гигант минатиот месец соопшти дека кварталниот профит и продажбата ги надминуваат проекциите и дека планира да направи голем пресврт, насочувајќи се кон вештачката интелигенција. Тоа ги вклучува инвестициите од 10 милијарди долари во „Опен еј-ај“ (OpenAI) и интернет-пребарувачот Бинг.
„Како висок менаџмент, не ја сфаќаме одлуката лесно и ја разгледувавме неколку месеци“, посочува Надела во соопштението. „Годинава економските услови се многу различни по многу параметри, вклучувајќи ги побарувачката на клиентите, пазарот на трудот и инвестициите потребни за следниот циклус на иновации“, додаде тој.
.webp){kind=icon}
