Линкдин прогнозира дека вештините ќе станат поважни од дипломите

Како што светот на работата се трансформира, Линкдин (LinkedIn) се обложува дека начинот на кој работодавците вработуваат и начинот на кој луѓето наоѓаат работа исто така радикално ќе се променат во годините и децениите што следат.

Линкдин, популарната деловна онлајн платформа, верува дека во иднина работодавците ќе бидат подготвени да погледнат пошироко од традиционалните критериуми како што се факултетските дипломи и претходните позиции што ги имал кандидатот. Наместо тоа, фокусот ќе биде на докажаните вештини на лицето што аплицира, без разлика дали се работи за анализа на податоци, лидерски или комуникациски вештини, велат од компанијата.

Линкдин предвидува дека компаниите ќе тргнат по насоката во која самите навестуваат дека сакаат да одат.

Имено, повеќе од 80 отсто од работодавците веруваат дека треба да вработуваат врз основа на вештини, а не на дипломи, но повеќе од половина велат дека сè уште вработуваат кандидати со факултетски дипломи бидејќи тоа во моментот се чини помалку ризично. Ова се резултати од истражување спроведено минатото лето од страна на „Американ студент асистенс“ (American Student Assistance and Jobs for the Future), непрофитна организација за развој на работна сила.

„Вработувањето засновано на вештини е идеал, светиот грал на пазарот на трудот“, вели Џозеф Фулер, професор по менаџмент на бизнис школата на Харвард.

Depositphotos

По пукањето на dot.com меурот, Линкдин веќе успеа да ги промени критериумите за она што се подразбира како прифатливо однесување на пазарот на трудот. Веќе не се смета за нелојално, на пример, вработен да креира профил што им овозможува на регрутерите да најдат - и вработат - талентирани луѓе кои активно не бараат работа.

„Пред 20 години или активно баравте работа или воопшто не баравте“, вели Ден Шаперо, оперативен директор на Линкдин.

Сајтот, кој во мај одбележа 20-годишен јубилеј, собра база од повеќе од 930 милиони членови ширум светот и стана место каде извршните директори и работниците ги слават пресвртниците во кариерата, објавуваат поплаки и создаваат деловни мрежи, менувајќи го начинот на кој луѓето и компаниите бараат работа и кандидати. Минатата година, платформата сочинуваше околу шест отсто од приходите на матичната компанија „Мајкрософт“ (Microsoft Corp.) која изнесуваше скоро 200 милијарди долари, што е мал, но растечки дел од продажбата.

Во февруари, Линкдин лансираше нова функција што им овозможува на корисниците да видат како вештините што ги бара некоја позиција се совпаѓаат со нивните сопствени вештини. Раните резултати се позитивни: повеќе од 45 отсто од регрутерите на мрежата сега бараат кандидати користејќи податоци за вештините, посочува компанијата. Во меѓувреме, Линкдин ја вградува вештачката интелигенција во платформата, со цел да ги направи поефикасни совпаѓањата на лицата што бараат работа и работодавците.

Вработувањето базирано на вештини е идеал кој има долга историја. Се смета за начин да се прошират економските можности, особено за оние без факултетски дипломи. Сепак, досега нема голем напредок во таа насока.

„За вештините се зборува со години, децении“, вели Аниш Раман, потпретседател на Линкдин. „Во тие разговори често учествуваа истите луѓе - креатори на политики, академици, непрофитни организации. Оние кои недостасуваа во тие разговори беа работодавците“.

Екстремно тесниот пазар на труд во изминатите две години, сепак, ги принуди компаниите да ја прошират својата потрага. Работодавците сега конечно се приклучуваат на разговорот, вели тој. Кога станува збор за вработувањето засновано на вештини, Раман нагласува: „Работодавците повеќе не прашуваат 'Што е тоа?' Тие прашуваат: 'Како да го постигнам ова?'“.

Линкдин се надева дека ќе даде одговор, но нема да биде лесно.

За почеток, едно е да кажете дека имате одредена вештина, а друго е да го докажете тоа. „Надвор од одредени индустрии, како градежништвото и занаетот, немаме сертификати кои потврдуваат стекната вештина на која работодавците можат да сметаат“, вели Фулер од Харвард, кој минатата година напиша статија со наслов „Вработувањето засновано на вештини во пораст“ за „Харвард бизнис ривју“ (Harvard Business Review). Исто така, не постои заеднички јазик или стандарден систем за класификација на вештините и тоа е ризик дека начинот на кој различните вештини се опишани во биографиите е неускладен.

Додека техничките вештини како што е програмирањето се релативно лесни за тестирање, „меките“ вештини како комуникација или тимска работа тешко се потврдуваат. На пример, велите дека сте добар слушател, но дали е тоа навистина така? Ова е една од причините зошто работодавците многу се потпираат на факултетските дипломи како гаранција, иако несовршена, за сите видови социјална компетентност. Постигнат е одреден напредок, посочува Фулер, со користење на структурирани интервјуа и проценки на психологијата на однесувањето, но капацитетот на компаниите на овој фронт останува ограничен.

Важна шанса за Линкдин може да биде неговата способност да ги искористи предностите на напредокот на „Мајкрософт“ во сферата на вештачката интелигенција. Тоа би можело да ѝ помогне на платформата да открие кандидати кои често се занемаруваат, како што се оние кои немаат диплома од четири години или се осудени за кривично дело, и успешно да ги поврзе со работодавците, објаснува Фулер. „Можеби deus ex machina овде е вештачка интелигенција“.