Анкета на Фед: Половина од фирмите користат ВИ за да ги намалат трошоците за плати

Работниците кои стравуваат дека нивните работодавци би можеле да користат вештачка интелигенција за да ги заменат, можеби се во право, според податоците во извештајот на Банката на федерални резерви (Фед) од Ричмонд.

Во истражувањето спроведено во текот на месец јуни за фирми кои користат вештачка интелигенција во регионот Ричмонд од почетокот на 2022 година, 45 отсто посочиле дека ги автоматизираат задачите за да ги намалат трошоците за персонал и работна сила.

Истражувањето исто така покажа дека скоро сите фирми користат технологија за автоматизација за да го зголемат производството. Во неодамнешен говор, претседателот на Фед Ричмонд, Томас Баркин, рече: „Можеби ќе гледаме зголемување на продуктивноста, најверојатно поттикнато од автоматизацијата, па дури и вештачката интелигенција“.

Но, работниците утеха можат да побараат во податоците на Фед од Далас, кои покажаа дека кај речиси 40 отсто од фирмите во Тексас кои сега користат вештачка интелигенција, влијанието врз вработувањето досега беше минимално.

Вештачката интелигенција сè уште ги нема преземено сите работни места, покажа истражувањето на Фед Ричмон. Само 46 отсто од фирмите посочиле дека додале технологија за автоматизирање на задачите на вработените од јануари 2022 година. Интеграцијата на вештачката интелигенција е почеста кај производствените фирми, при што 53 отсто од нив ја користат технологијата, отколку кај компаниите од услужниот сектор, каде искористеноста е на 43 отсто.