Доколку продолжи недостигот на природен гас, „Фолксваген“ (VW) би можел да го премести производството од Германија и Источна Европа, предупреди компанијата. Ова е еден голем пример како енергетската криза која настана поради руската инвазија на Украина се заканува да предизвика целосен пресврт во европската индустрија.
Најголемиот производител на автомобили појасни дека едно од нивните среднорочни решенија е преместување на производството, во случај недостигот на гас да трае подолго од зимата што претстои. Имено, освен во Германија, VW има фабрики и во Чешка и Словачка, европски земји кои се најмногу зависни од испораките на руски гас.
„Со среднорочните алтернативни мерки, ние сме фокусирани на поголема локализација, преместување на производствениот капацитет или технички опции, слични на мерките што се вообичаена практика за предизвиците поврзани со недостиг на полупроводници и други нарушувања на синџирот на снабдување“, рече Генг Ву, шеф на секторот за набавки во VW.
Германија би можела да биде принудена да ја рационализира потрошувачката на енергенси поради руската одмазда со испораките на гас во Европа. Неодамнешната вест дека капацитетот на германските складишта за гас достигнал 90 отсто го ублажи стравот од акутен недостиг на гас оваа зима, но Германците сè уште се соочуваат со друг предизвик - како ќе ги обноват исцрпените резерви без руски гас следното лето.
Покрај останатите, VW има фабрики во Германија, Чешка и Словачка / Bloomberg
Колку за споредба, германскиот производител на пластика Covestro не стравува од недостиг на гас оваа зима, туку токму поради високите трошоци за енергија не планира нови инвестиции во Европа, објасни извршниот директор на компанијата, Маркус Штајлеман на климатска конференција во Берлин. Тој додаде дека цените во Азија, која ја гледа како растечки пазар, се значително пониски.
Портпаролот на VW телефонски појасни дека делови од Европа со подобар пристап до течен природен гас (ЛНГ) би можеле да имаат значителна корист од какви било промени во производството, алудирајќи на југозападна и северна Европа. Имено, Volkswagen Group управува со фабрики и во Португалија, Шпанија и Белгија, а токму во овие земји има терминали за ЛНГ.
„Фолксваген“ е загрижен и за ефектот што високите цени на гасот може да го имаат врз добавувачите, иако, велат дека направиле сè што е во нивна моќ за да се подготват за недостиг од гас оваа зима.
„Политичарите мора да ја спречат моментно неконтролираната експлозија на цените на гасот и струјата. Во спротивно, малите и средни енергетски компании ќе имаат големи проблеми во синџирот на снабдување, што пак ќе го забави или целосно ќе го запре нивното производство“, вели Томас Стег, шеф за односи со јавноста во VW.
.webp){kind=icon}
