Трговците со обврзници во неверица: загубите на новиот долг на „Спејс екс“ и понатаму растат

Продажбата на обврзници на „Спејс екс“, најавувана како спектакуларен успех, толку брзо бледнее на секундарниот пазар што трговците велат дека не можат да се сетат на некаква тазе зделка што се соочила со толку остар пад.

Еден голем дилер во петокот нудеше обврзници на „Спејс екс“ со рок на достасување во 2056 година со распон на принос што беше и до 0,32 процентни поени поголем од нивото на емисија од 1,75 процентни поени над приносот на американските државни обврзници, според луѓе запознаени со ситуацијата, кои побараа да останат анонимни бидејќи разговараа за приватни трансакции на вонберзанскиот пазар (ОТС).

Нереализираните загуби на емисијата на „Спејс екс“ вредна 25 милијарди долари постојано се зголемуваат од почетокот на секундарното тргување и од четврток беа околу 305 милиони долари споредено со трезорските записи. Обврзниците на „Спејс екс“ со најдолг рок, кои се соочија со поголем скептицизам на пазарот од нивните краткорочни еквиваленти, практично го избришаа секој ефект на затегнување на распонот што инвестициските банки коишто ја водат работата, го спроведоа кога вредноста на нарачките скокна на речиси 90 милијарди долари.

Трговците велат дека овие движења сугерираат оти во овој аранжман масовно се вклучиле фондови коишто бркаат брза заработка, а не традиционални инвеститори фокусирани на долгорочно држење позиција, и тоа со намера веднаш да ги препродадат обврзниците за брза заработка. Притисокот за продажба е уште повпечатлив со оглед на тоа што акциите на „Спејс екс“ се главно стабилни откако цената на обврзницата беше одредена во вторник, откако претрпеа остар пад од 16 проценти претходниот ден.

Дури и ако зад оваа распродажбата стојат технички причини, како што се хеџ -фондови што затвораат позиции или ги хеџираат своите кратки позиции, невидениот интензитет укажува на специфичен профил на „Спејс екс“.  Компанијата, која достигна пазарна вредност од 2,64 билиони долари овој месец, доби инвестициски рејтинг и покрај очекувањата дека со години ќе има негативен паричен тек, како и дека ќе биде зависна  од  Илон Маск, што агенцијата „Фич“ го оцени како „клучно ограничување за рејтингот“.

„Очекувавме дека спредот на обврзниците на Спејс екс ќе се прошири во однос на нивото од примарната емисија, но не толку многу“, рече Тони Трчинка, менаџер за портфолио во „Импакс“ (Impax Asset Management). „Овој интензивен пад веројатно е резултат на ‘совршена бура’: фактот дека вредноста на акциите на компанијата падна за повеќе од 600 милијарди долари од нејзината првична јавна понуда, слабите технички показатели среде зголемениот обем на понуда, како и инвеститорите коишто сè уште си ја чукаат главата околу тоа како да го проценат нејзиниот уникатен профил на ризик.“

Вакво ширење на спредот е вистинска реткост во споредба со тоа како другите неодамнешни мега-пакети на обврзници се тргуваа на секундарниот пазар. Земете ја „Енвидија“, на пример, која овој месец собра 25 милијарди долари во седум транши на примарна понуда на висококвалитетни обврзници. Спредовите на нејзините обврзници со купон од  5,55 проценти што доспеваат во 2046 година се проширија за само осум базични поени од моментот на издавањето, слично на спредот и за нејзините обврзници со купон од 5,625 проценти што доспеваат во 2056 година.

Во меѓувреме, премиите за ризик на долгорочните обврзници на „Алфабет“, кои беа издадени во февруари, дури и се стеснија. Повисоките спредови обично сигнализираат дека инвеститорите гледаат малку поголем ризик дека компанијата би можела да  има тешкотии да ги исполни своите обврски. По слабеењето, кривата на принос на „Спејс екс“ сега се движи повеќе во согласност со онаа на „Оракл“, која има сличен кредитен рејтинг, а чиишто долгорочни обврзници исто така се соочија со проширување на спредот кратко време по првичната понуда.

Технолошките акции ги повлекоа глобалните индекси надолу во петокот, среде новиот бран на распродажба на акции на производителите на чипови, додека извештајот дека „Опен еј-ај“ може да ги одложи своите планови за ИПО дополнително го влоши расположението на инвеститорите. Во меѓувреме, два од најистакнатите хеџ- фондови во Кина предупредија дека бумот на вештачката интелигенција на глобалните берзи се претвори во неодржлив меур.

Bloomberg

 

Понудата на „Спејс екс“ предизвика најголем интерес за петгодишната обврзница, што ѝ овозможи на компанијата да ги намали трошоците за позајмување во тој дел од понудата повеќе отколку за подолгите рокови на доспевање. Побарувачката беше послаба за 20 и 30-годишните обврзници, кај коишто има најголем пад на побарувачката.

Претставникот на „Спејс екс“ не одговори веднаш на барањето за коментар, а банките што ја водеа продажбата на обврзници одбија да коментираат за нивоата на кои се тргува со долгот на компанијата.

Инвеститорите беа преплавени со понуди на мега-обврзници оваа година, бидејќи технолошките гиганти се тркаат да соберат милијарди долари за финансирање на проекти за вештачка интелигенција. Обемот на американски обврзници со инвестициски рејтинг, кој достигна 175 милијарди долари до вторник, постави нов рекорд за месец јуни, надминувајќи го претходниот рекорд од 169 милијарди долари во 2020 година.

Своповите за кредитен дефолт (CDS) поврзани со обврзниците на „Спејс екс“ почнаа активно да се тргуваат оваа недела, објави Блумберг во четврток, дозволувајќи им на инвеститорите да се заштитат од потенцијални загуби или да шпекулираат со кредитната способност на компанијата. Тоа создава двонасочна активност на пазарот и нуди повеќе начини за преземање инвестициска изложеност, што би можело да го зголеми и обемот на тргување со самите обврзници.

-Помош при пишувањето обезбедија Брајан В. Смит, Давиде Барбусија, Бејли Липшулц и Брајан Чапата