.webp){kind=icon}
„Самсунг“ (Samsung Electronics Co.) го пријави својот прв пад на профитот од 2019 година, со што се нагласува длабочината на глобалниот пад во секторот за компјутери и мемориски чипови.
Оперативниот профит се намали за 32 отсто на 10,8 илјади милијарди вони (7,7 милијарди долари) за кварталот завршен во септември, објави во петокот најголемата јужнокорејска компанија. Аналитичарите во просек проценуваа 12,1 илјади милијарди вони. Продажбата исто така е послаба од очекуваното и изнесувала 76 илјади милијарди вони. Samsung ќе ги објави бројките за нето приходот и деталите за перформансите по оддели во детален извештај на крајот на месецот.
Светските производители на мемориски чипови во последниве недели предупредија дека се соочуваат со проблеми на пазарот бидејќи залихите се трупуаат, а технолошките компании кои се бават со бази на податоци и оние кои се потрошувачки ориентирани ги намалија нарачките бидејќи побарувачката за компјутери и паметни телефони ослабе повеќе од очекуваното. „Микрон технолоџи“ (Micron Technology Inc.) и „Киоксија“ (Kioxia Holdings Corp.) го намалуваат производството во обид да ја ребалансираат понудата и да спречат пад на цените.
Непосредно пред објавувањето на резултатите на Samsung, американскиот производител на процесори и графички чипови AMD (Advanced Micro Devices Inc.) исто така објави дека продажбата во третиот квартал била полоша од очекуваната и достигнала една милијарда долари помалку од сопствената прогноза. „Макроекономските услови ја намалија побарувачката за компјутери повеќе од очекуваното и доведоа до значителна корекција во залихите“, изјаву Лиза Су, извршен директор на AMD.
Акциите на Samsung по веста во петокот паднаа за цели 2 отсто.
„Овој пад на циклусот не е поттикнат само од типичната динамика на понудата и побарувачката, туку се разликува од минатите циклуси поради геополитичките ризици“, вели Хео Пил-Сеок, извршен директор на „Мајдас“ (Midas International Asset Management) во Сеул. „Контролата на извозот на американската влада дополнително ќе ја ограничи продажбата на ИТ компаниите во Кина и голем дел од побарувачката за чипови ќе биде ослабена. Ако AMD, Nvidia не можат да ги продаваат своите чипови во Кина, заработката на производителите на меморија дополнително ќе се влоши“.
Јужна Кореја, дом на двата најголеми светски производители на мемориски чипови, пријави пад на производството на чипови во август за прв пат по повеќе од четири години, според податоците на Корејската агенција за статистика. Сонародникот на Samsung, „Хиникс“ (SK Hinix Inc.) во својот најнов извештај за заработката објави дека следната година ќе биде неизбежно значителното прилагодување на капиталните расходи.
Bloomberg
Ненадејниот пад на пазарот на чипови доаѓа по серијата макроекономски шокови предизвикани од руската инвазија на Украина, до зголемувањето на инфлацијата и цените на гасот, заедно со зголемувањето на каматите од страна на американски ФЕД. Чувството на потрошувачите брзо се влоши и купувачите на мемориски чипови, како што се производителите на компјутери, ги намалија нарачките, користејќи ги нивните постоечки залихи.
Иако годинава опадна побарувачката за електроника, „Морган Стенли“ (Morgan Stanley) претходно неделава ги зголеми очекувањата за раст во секторот на полупроводници, што ги зголеми цените на акциите на Samsung и Hinix поради очекувањата за закрепнување на пазарот во втората половина на 2023 година.
Сепак, директорот за чипови на Samsung, Кјунг Кјехјун, вели дека малку е веројатно оти пазарот за меморија ќе фати динамика на закрепнување во текот на следната година. Кјунг на интерен настан им соопштил на вработените дека Samsung ги намалил насоките за продажба на чипови во втората половина од оваа година за 32 отсто во споредба со прогнозата во април, објави „Кореја економик дејли“ (Korea Economic Daily).
„Поради екстремно малата побарувачка, купувачите почнаа да ги намалуваат залихите од крајот на вториот квартал на 2022 година“, вели Сонг Мјунг-суп, аналитичар во „Хај инвестмент“ (HI Investment & Securities), истакнувајќи дека цените на DRAM и NAND паднале за 15 проценти во третиот квартал. „Со исклучок на некои големи технолошки компании, клиентите ги намалуваат нарачките на чипови и покрај наглото намалување на цените“, посочува тој.
