text size
Менаџерите на германските компании никогаш не биле позагрижени за продажбата бидејќи се борат со енергетската криза, мрачните прогнози за глобалната економија и стравуваат дека најлошото допрва доаѓа, покажува последното истражување.
Околу 52 отсто очекуваат влошување на состојбата во следните 12 месеци, според истражувањето спроведено врз 24.000 компании од страна на Здружението на германските комори за индустрија и трговија (ДИХК). Само осум отсто очекуваат подобрување.
„Ова се најлошите резултати што ги измеривме откако се спроведува истражувањето од 1985 година“, изјави шефот на ДИХК, Мартин Ванслебен. „Дури и за време на пандемијата на коронавирус и глобалната финансиска криза, уделот на оптимисти беше над 10 отсто“.
Најголемата европска економија, чиј индустриски сектор во голема мера зависи од евтиниот гас од Русија, тешко настрада откако Москва го намали снабдувањето, предизвикувајќи скок на цените. Рекордни 82 отсто од анкетираните компании ги гледаат цените на енергијата и суровините како деловен ризик, покажува истражувањето на ДИХК.
Кризата ги принуди компании кои се големи потрошувачи на енергенти да го затворат производството – тоа се случува со секој четврти производител на хемиски производи и секој шести производител на автомобили, при што 17 отсто од производителите на автомобили сега размислуваат да го преселат производството во странство. Истражувањето покажа дека 41 отсто од германските компании велат дека нивната финансиска состојба е тешка, наспроти 31 отсто минатата година.
Владата веќе усвои итен пакет од 200 милијарди евра (197 милијарди долари) за субвенционирање на цените на гасот и електричната енергија, но планот допрва треба да се спроведе.
.webp){kind=icon}
