text size
Корпорацијата „Мајкрософт“ соопшти дека планира да укине 10.000 работни места, или околу пет проценти од својата работна сила оваа година, преземајќи чекори за да се справи со сè помрачната перспектива што загрози многу од најголемите компании во технолошката индустрија.
„Компанијата во вториот квартал ќе плати 1,2 милијарда долари во врска со овој потег, што ќе ја намали заработката по акција за 12 центи“, соопшти компанијата.
Отказите доаѓаат откако софтверскиот гигант рече дека гледа претпазливост кај клиентите, затоа што некои делови од светот се во рецесија, а други се движат кон таква состојба.
„Мајкрософт“ треба да ги објави резултатите од своето работење на 24 јануари и се предвидува дека ќе го забележи најмалиот раст на приходите во последните шест години. Зборувајќи во текот на денот, пред објавувањето на отказите, главниот извршен директор Сатја Надела предупреди дека индустријата минува низ период на забавување и ќе треба да се приспособи.
„За време на пандемијата имаше нагло забрзување. Мислам дека денес поминуваме низ фаза каде што има одредена доза на нормализација на побарувачката. Ќе мора да направиме повеќе со помалку, ќе мора да ги покажеме нашите сопствени придобивки во продуктивноста со нашата сопствена технологија“, рече Надела во интервјуто на Светскиот економски форум во Давос, Швајцарија.
Од „Мајкрософт“ велат дека трошоците ќе бидат за испратнини, промени во хардверското портфолио и за консолидирање на закупот на недвижности, бидејќи компанијата создава голема густина низ своите работни простори.
По објавата на заработката на 24 јануари, „Мајкрософт“ очекува да забележи зголемување на продажбата во вториот квартал од два отсто. Тоа би било најбавното квартално зголемување на приходите од фискалната 2017 година. Некои од производите на „Мајкрософт“ поттикнаа оживување на растот во изминатата деценија, но дури и тој бизнис почна да забавува. Аналитичарите предвидуваа дека „Мајкрософт“, кој ги преброди минатите забавувања без масивни кратења на работни места, ќе го почувствува притисокот оваа година.
Во вторникот, „Гугенхајм“ (Guggenheim) го намали рејтингот на оваа компанија, што е прв опаѓачки рејтинг на овој производител на софтвер од страна на аналитичката компанија во повеќе од три години.
Ривалот „Амазон“ (Amazon.com Inc) веќе го започна својот круг на отпуштања, што ќе резултира со повеќе од 18.000 откази, односно кратење најголем број работни места во неговата историја.
Фирмата-мајка на „Фејсбук“, „Мета“, минатата есен најави широкораспространето намалување на работните места, а социјалната мрежа Твитер веќе намали околу половина од својата работна сила.
.webp){kind=icon}
