Четириесет од најголемите светски производители на добиток може колективно да забележат пад на профитот за речиси 24 милијарди долари до 2030 година во однос на нивоата од 2020 година, главно како резултат на климатските промени, проценува големата инвеститорска група позната како ФАИРР (FAIRR).
Прогнозираното намалување на профитот главно го одразува скокот на цените на добиточната храна и даноците за јаглерод. Групата од 40 компании може да забележи пад на профитните маржи за седум отсто. Тие во Северна Америка, вклучувајќи ги „Тајсон фудс“ (Tyson Foods Inc) и производителот на јајца „Кал-Мејн фудс“ (Cal-Maine Foods Inc), ќе бидат меѓу најтешко погодените, бидејќи профитните маржи ќе им паднат во просек за 11 проценти, покажуваат податоците.
Други големи производители на месо, како што се бразилската ЈБС (JBS SA) и кинеската ВХ (WH Group Ltd) исто така ќе бидат погодени, според ФАИРР. Кравите се добиток со најголема емисија, така што компаниите што произведуваат говедско месо и млечни производи се повеќе изложени на даноци за јаглерод, велат од ФАИРР.
Процените се засноваат на претпоставката дека просечните глобални температури ќе се зголемат за два Целзиусови степена до 2100 година. Според ова сценарио, без ублажување, половина од 40-те проценети сточарски компании ќе работат со загуба во 2030 година.
„Има многу вредност на ризик. Сакаме инвеститорите да имаат јасен глас кога ги убедуваат производителите на месо да ги проценат и управуваат ризиците од повисоки температури за нивните синџири на снабдување и евентуалната профитабилност“, рече Марија Летини, извршна директорка на ФАИРР, непрофитна организација што се фокусира на ризиците за ЕСГ во глобалниот прехранбен сектор со поддршка на инвеститори што управуваат со имот од 70 илјади милијарди долари.
ФАИРР е основана од Џереми Колер, главен инвестициски директор на британската компанија за приватен капитал „Колер капитал“ (Coller Capital). Неодамнешниот извештај на Меѓувладиниот одбор на Обединетите нации (ОН) за климатски промени предупреди дека е веројатно дека светот во блиска иднина ќе надмине 1,5 Целзиусов степен затоплување.
Производителите на добиток се ранливи бидејќи снабдувањето со добиточни култури, како што се пченката и сојата, може да биде под влијание на вишокот топлина, сушата и променливите количества на врнежи. Во моментов само шест од 40-те анализирани компании извршиле анализи на климатските сценарија.
„Повеќето компании немаат анализа на климатските сценарија. Тоа е нешто за што дефинитивно би се залагале во нашите ангажмани“, рече Товиа Роснер, аналитичарка на Фондот за безбедност на храната на „Алијанц глобал“ (Allianz Global Investors), кој управува со средства во вредност од 69 милиони долари.
Потенцијалниот удар врз профитот на индустријата е предизвикан главно од повисоките трошоци поврзани со климата, кои се предвидува да се зголемат во просек за над девет отсто, според ФАИРР. Од тоа зголемување, пет проценти се однесуваат на повисоките цени на добиточната храна и четири отсто на очекуваните даноци за јаглерод на емисиите на добитокот.
Непрофитната организација сугерира дека големите производители на месо и млечни производи можат да го намалат ризикот со диверзификација на производите, користење алтернативни состојки за добиточна храна и преориентирање на портфолијата кон алтернативи базирани на растенија.
Се чини дека северноамериканските компании се најизложени на потенцијални загуби. Од шест анализирани компании, профитните маржи ќе паднат во просек за 11 отсто до 2030 година, поттикнати од 15 проценти зголемување на просечните трошоци, главно како одраз на повисоките цени на добиточната храна, проценува ФАИРР.
„Едно клучно откритие е дека Северна Америка ќе се соочи со поголеми влијанија поради цената на пченката“, рече Сими Тамби, климатски економист во непрофитната организација. Може да биде потешко да се утврди влијанието на данокот на јаглерод.
Ниту една земја сè уште не воведе данок на јаглерод во земјоделството, иако механизмите за одредување на цените на јаглеродот за емисиите во другите индустрии веќе станаа популарни. Нов Зеланд, каде што половина од сите емисии произлегуваат од земјоделството, е меѓу првите земји што предложија давачка за земјоделските емисии.
„Податоците на ФАИРР претставуваат споредба на сценарија што може да им помогне на сточарските компании и инвеститорите да ја разберат неизвесноста што доаѓа со климатските промени“, рече Летини.
.webp){kind=icon}
Во моментов нема коментари за веста. Биди прв да коментира...