Како реална можност звучи мултимилионската инвестиција во центар за одржување авиони - МРО (анг. MRO – Maintenance, reparations and operations - Одржување, поправки и операции) во Србија, која вклучува заеднички инвестиции на „Туркиш ерлајнс“ и „Ер Србија“, сметаат експерти од воздухопловната индустрија, додавајќи дека за Србија - и нејзиниот национален авиопревозник - тоа би значело многу токму поради низата проблеми што ја засегаат компанијата.
Претседателот на извршниот одбор на „Туркиш ерлајнс“, Ахмет Болат, претходно изјави дека неговата компанија размислува да инвестира во нов центар за одржување авиони, а како потенцијални локации ги спомена Србија, Индонезија и Казахстан.
Компанијата „Туркиш техник“ потврди за српската редакција на „Блумберг Адрија“ дека размислуваат за можностите за инвестирање надвор од Турција, но дека сè уште не постигнале договор за заедничко вложување со „Ер Србија“, која во неделата најави оптимизација на распоредот на летови (и можни откажувања) затоа што некои од нејзините авиони едноставно не пристигнале.
„Белград е одлично место за таква инвестиција, бидејќи тогаш сте во центарот на Југоисточна Европа“, вели консултантот Курт Хофман, извршен директор на „Хофман авиејшн“ (Hofmann Aviation).
Ваквиот потфат значителна ќе им користи и на „Туркиш ерлајнс“ и на „Ер Србија“, бидејќи и двете компании планираат понатамошно проширување. Имено, се шпекулира дека турската авиокомпанија наскоро би можела да нарача неверојатни 600 авиони (додуша, тоа не е лесно). Минатата година „Туркиш ерлајнс“ заврши со 394 авиони, а оваа година планира да ја заврши со 435. Сепак, компанијата уште во април објави дека би сакала да има 813 авиони до стогодишнината во 2033 година (постарите авиони ќе бидат пензионирани).
Од друга страна, „Ер Србија“ најави отворање рекорден број нови линии и со тоа го надмина бројот на дестинации што ги покрива нејзиниот „дедо“, Југословенскиот авиотранспорт (ЈАТ). Сепак, огромниот раст донесе и нарушувања.
Потенцијалот на соработката „Туркиш ерлајнс“ - „Ер Србија“
Во интервју за „Блумберг Адрија“ во април, извршниот директор на „Ер Србија“, Јири Марек, изјави дека најголемиот проблем на неговата компанија во однос на набавката на нови авиони се роковите за одржување, подготовка и бојадисување.
„Ако се покаже дека шпекулациите за започнување заедничко вложување се точни, тоа може да биде од значителна корист за Србија и јасно ќе покаже дека Турција ја дава својата доверба во земја што традиционално има блиски односи со Русија, што може да биде проблематично во моментот“, вели Џејсон Шо, главниот уредник на страницата посветена на авијацијата Ер 101 (Air101) за „Блумберг Адрија“.
Од „Туркиш техник“, компанија за одржување авиони во сопственост на „Туркиш ерлајнс“, на која „Ер Србија“ се потпираше во услови на влошена соработка со „ЈАТ техника“, не ја прецизираа вредноста на идната инвестиција во центарот за одржување на авионите или центрите што ги разгледуваат. Сепак, оперативните трошоци на една линија во центрите на МРО се околу 1,5 милион евра годишно, велат извори од индустријата. Вкупната инвестиција секако би зависела од капацитетот.
Bloomberg
„Краткорочно, не треба да има големо влијание врз пазарот на МРО во Европа, бидејќи ќе биде потребно извесно време за да се подигнат капацитетите и да работат“, вели Шо. „Долгорочно, тоа може малку да ја промени динамиката, но многу зависи од големината на инвестицијата“, додава тој, алудирајќи на огромната побарувачка на пазарот.
„И покрај фактот дека влијанието на поширокиот пазар би можело да биде мало, ’Ер Србија’ веројатно би била постојан клиент. ’Туркиш ерлајнс’ би бил повремен (кога нивните други центри се преполни), а помалите компании што имаат соработка со ’Ер Србија’, како грчката компанија ’Скај експрес’ и бугарскиот ’Булгариа ер’, исто така би можеле да бидат потенцијални клиенти“, вели Шо.
.webp){kind=icon}
