„Луфтханза“ може да укине 100 летови неделно заради високите аеродромски такси

„Дојче Луфтханза“ (Deutsche Lufthansa AG) може да елиминира околу 100 домашни летови неделно следното лето, бидејќи високите даноци и такси за авијација во Германија влијаат врз профитабилноста, изјави главниот извршен директор Карстен Шпор за „Велт ам зонтаг“ (Welt am Sonntag).

„Без намалување на трошоците за локација, понатамошните намалувања ќе бидат неизбежни“, рече Шпор во интервјуто за германскиот весник. „Ова вклучува околу 100 домашни летови неделно, кои би можеле да се елиминираат следното лето“.

Рутите што се разгледуваат вклучуваат врски од Минхен до Минстер-Оснабрик и Дрезден, каде што авиокомпанијата моментално работи со загуба, изјави Шпор. Како причина тој го посочи двојното зголемување на државните трошоци за работење во Германија од 2019 година.

Шпор, исто така, рече дека „Луфтханза“ забележува повисоки стапки на зафатеност во првата, бизнис и премиум економската класа, што е одраз на тоа како даноците и таксите влијаат повеќе врз билетите во економска класа.

Челниците на авиокомпаниите долго време се жалат на високите аеродромски такси и даноци во Германија. Неделава „Рајанер холдингс“ (Ryanair Holdings Plc) соопшти дека како резултат на трошоците ќе го намали својот зимски капацитет во Германија за 800.000 седишта и ќе откаже 24 рути.

„Луфтханза“ се обидува да закрепне од минатогодишниот пад на профитот и маржите, со планови за намалување на 4.000 административни работни места низ целата групација до 2030 година. Компанијата се бори да ги подобри приносите, особено кај нејзиниот истоимен превозник, додека некои од нејзините помали нискобуџетни авиокомпании, како што е линијата „Дискавер“ (Discover), остваруваат подобри резултати.

„Дискавер“ оваа недела соопшти дека до 2028 година планира да додаде 10 авиони во својата флота, вклучувајќи четири авиони А350-900 кои ќе ја подобрат ефикасноста на горивото на долгите рути.