„Тесла“ претстави нови возила поевтини за 10.000 долари

Во време кога се заострува конкуренцијата „Тесла“ (Tesla Inc.) додаде две верзии со пониски спецификации на своите помалку популарни електрични возила „Модел С“ (Model S) и „Модел X“(Model X) во САД и Канада, намалувајќи ја цената за 10.000 долари.

Поевтините верзии доаѓаат со помал опсег и малку побавно забрзување од основните модели. Седанот „Стандард рејнџ“ (Standard Range) се продава по цена од 78.490 долари, додека спортскиот „Модел X“ со пониски спецификации чини 88.490 долари, според веб-страницата на „Тесла“.

Двата модели зафаќаат мал дел од продажбата на „Тесла“ односно помалку од пет проценти од испораките во вториот квартал од годинава. За разлика од моделите 3 и Y, кои се подобни за даночен кредит од 7.500 американски долари, за моделите С и X нема вакви попусти, што ја намалува нивната привлечност.

Главниот извршен директор Илон Маск во јули изјави дека „Тесла“ ќе мора да продолжи да ги намалува цените доколку каматните стапки продолжат да растат и предупреди дека е подготвен да жртвува поголема маржа за да го зголеми производството и продажбата.

„Тесла“ вчера ја намали цената на својот модел Ys со повисоки спецификации во Кина за 14.000 јуани (1.900 долари), поттикнувајќи ја загриженоста за обновената ценовна војна на кинескиот пазар.

 

Во моментов нема коментари за веста. Биди прв да коментира...

Остави коментар