Германија е во опасност да го загуби долгогодишниот статус на светска суперсила во автомобилската индустрија, предупреди Хилдегард Милер, претседателка на Германското здружение за автомобилска индустрија (ВДА) пред саемот „ИАА мобилити“ (IAA Mobility).
Милер истакнала за ДПА дека иако германските производители на автомобили можеби ќе можат да опстанат без сериозни реформи, Германија ќе плати висока цена во смисла на губење на статусот на центар на автомобилската индустрија.
Според неа, клучните предизвици што ѝ се закануваат на германската автомобилска индустрија вклучуваат прекумерна регулација, бавна политичка одлучност и недостиг од правна рамка за прашања како што е вештачката интелигенција. Сепак, таа нагласи дека најважен проблем е структурата на трошоците, која драматично ја нарушува меѓународната конкурентност на Германија.
Таа посочи дека трошоците за енергија се значително повисоки во Германија во споредба со другите големи производители на автомобили. Милер ја изрази потребата државата привремено да ги субвенционира цените на електричната енергија за да ги задржи производителите на батерии и полупроводници во земјата и да привлече странски компании во најголемата европска економија.
Bloomberg
Иако германската влада неодамна најави даночни олеснувања за компаниите во висина од 32 милијарди евра во следните четири години, субвенциите за електрична енергија остануваат предмет на дебата.
Милер се пожали и на недостиг од дигитализација, што резултира со губење време и дополнително ја усложнува целата ситуација. Во следните пет години индустријата сака да инвестира 250 милијарди евра во дигитализација. „Не можеме и нема да чекаме како индустрија, бидејќи во спротивно нема да ги постигнеме нашите климатски цели“, рече Милер.
Таа посочува дека и државата мора да стане побрза кога станува збор за инвестирање во технологиите на иднината. „Постои огромен потенцијал за заштеда на јаглерод диоксид во решенијата за дигитална мобилност“, продолжи Милер. Индустријата веќе има развиено решенија, но имплементацијата досега беше неуспешна поради дигиталната инфраструктура и законските рамки.
Трговскиот саем „ИАА мобилити“, кој ги обединува производителите на автомобили, доставувачите, технолошките компании и политичарите, ќе го отвори канцеларот Олаф Шолц, што ќе му даде дополнително значење на ова прашање.
.webp){kind=icon}
