Компанија Uber Technologies лобирала кај политичари и ги прекршила законите во периодот од 2013 до 2017 година за да се пробие на глобалниот пазар, според истечени извештаи кои медиумите ги презентираа во јавноста.
Според извештаите објавени од британски Guardian и француски Le Monde, проширувањето на компанијата било помогнато од политичари, вклучувајќи го и францускиот претседател, Емануел Макрон. Таканаречените Uber Files вклучуваат повеќе од 124.000 документи собрани од непрофитната организација Меѓународен конзорциум на истражувачки новинари (International Consortium of Investigative Journalists). Овие документи се од периодот кога главен извршен директор на компанијата бил нејзиниот ко-основач Тревис Каланик и откриваат што сè направил тој за да се прошири во клучните градови како Париз.
Во коментар испратен веднаш по објавувањето на документите, Uber не негираше ниту еден од наводите, туку се фокусира на промените што се случиле во компанијата откако Дара Косровшахи ја презеде функцијата во 2017 година.
„Објавени се илјадници приказни за почетоците на Uber и грешките што ги направи пред 2017 година, напишани се неколку книги, па дури и снимена е телевизиска серија“, велат од такси компанијата со седиште во Сан Франциско.
Од таму истакнуваат дека дека Косровшахи ја трансформирал компанијата и ја ставил безбедноста на прво место.
„Кога велиме дека Uber е поинаква компанија денес, тоа го мислиме буквално: 90 отсто од сегашните вработени во Uber ни се придружија откако Дара стана извршен директор“, напишаа тие во изјавата.
За агресивните тактики на Uber во обидите да го преземе такси пазарот се пишува со години. На пример, Bloomberg News во 2018 година објави дека компанијата користи системи кои ја спречуваат полицијата да пристапи до внатрешните податоци за време на претресите.
Улогата на Макрон
Француски Le Monde објави кореспонденција меѓу Каланик и Макрон додека тој сè уште беше министер за финансии. Дуото се сретнало четири пати и бил постигнат „таен договор“ меѓу раководството на Uber и француските политичари, пишува весникот.
Од Елисејската палата коментираа дека во тој период Макрон соработувал со бројни компании на пазарот со цел да ја олесни нивната борба со административните и регулаторни пречки.
Bloomberg
Според објавените документи, Uber ја повлекол услугата во Франција во 2015 година, а потоа по само неколку месеци се променил законот што го отежнувал издавањето лиценца за возачите. Ова, секако, ги налутило таксистите.
За време на протестите против Uber во Париз и другите европски градови во 2016 година, Каланик не беше премногу загрижен за можното насилство врз возачите на Uber. Компанијата наместо тоа се обиде да ги искористи насилните напади врз своите возачи за да придобие симпатии во јавноста, се вели во извештаите.
Портпаролот на Каланик ги отфрли ваквите наводи во изјава за Washington Post.
„Каланик никогаш не верувал дека Uber треба да користи насилство на сметка на безбедноста на возачите. Секое обвинување дека Каланик така раководел или бил вклучен во некоја од горенаведените активности е целосно лажно“, нагласи портпаролот.
.webp){kind=icon}
